Odase Nɛ A Yeɔ Kɛ Piɔ Si Ngɛ Gbɛjegbɛ He
1. Mɛni ji blɔ kake nɔ nɛ wa ma nyɛ maa gu kɛ kase Yesu?
1 Benɛ Yesu ngɛ sɔmɔmi nítsumi ɔ tsue ngɛ zugba a nɔ ɔ, e fiɛɛɔ kɛ haa nihi nɛ e kɛ mɛ kpeɔ ngɛ gbɛjegbɛ he, kɛ magbɛhi a nɔ nɛ e yi ha lɛ. (Luka 9:57-61; Yoh. 4:7) E suɔ nɛ e kɛ nihi babauu nɛ susu sɛgbi nɛ e hɛɛ ɔ he. Mwɔnɛ ɔ, gbɛjegbɛ he odase yemi ji blɔ nɛ hi wawɛɛ nɛ wa guu nɔ kɛ yeɔ bua nihi konɛ a ná Mawu he nile. (Abɛ 1:20) Ja wa suu nihi a he nɛ wa kɔɔ nɔ́ se loko wa maa ye manye ngɛ gbɛjegbɛ he odase yemi ɔ mi.
2. Ke wa ngɛ odase yee ngɛ gbɛjegbɛ he ɔ, mɛni blɔ nɔ wa maa gu kɛ su nihi a he?
2 Moo Su Nihi A He: E hi kaa o maa su nihi a he mohu pe nɛ o maa da si loo o maa hi si ngɛ he kake nɛ nihi nɛ a bee ɔ nɛ a su o he. Moo hyɛ nɔ ɔ hɛ mi, nɛ o muɔ ngɛ o nya he, nɛ o je huɛ bɔmi su kpo. Ke o kɛ fiɛɛli kpahi lɛ ngɛ ní tsue ɔ, behi fuu ɔ, e maa hi wawɛɛ kaa nyɛ maa su ni ɔmɛ a he kakaaka. Jehanɛ se hu ɔ, e he hia nɛ nyɛɛ bɔ mɔde nɛ nyɛɛ kɛ nihi nɛ nyɛɛ kɛ mɛ sɛɛ ní ɔ nɛ sɛɛ ní ekohu. Ke e maa hi ɔ, ke nyɛɛ kɛ mɛ sɛɛ ní ɔ ta a, nyɛ bi mɛ bɔnɛ nyɛ ma plɛ nɛ nyɛ nine maa su a nɔ ekohu. Fiɛɛli komɛ fiɛɛɔ ngɛ gbɛjegbɛ kake he daa, enɛ ɔ haa nɛ a nyɛɔ nɛ a kɛ nihi nɛ a kɛ mɛ sɛɛ ní be ko ɔ yaa nɔ nɛ a sɛɛɔ ní, nɛ ni ɔmɛ náa anɔkuale ɔ he bua jɔmi wawɛɛ.
3. Ke wa ngɛ gbɛjegbɛ he odase yee ɔ, mɛni blɔ nɔ wa ma nyɛ maa ngɔ níhi a se kɔmi kɛ tsu ní ngɛ?
3 E Sa Nɛ Wa Kɔ Nɔ́ Se: E sa nɛ waa kɛ níhi a se kɔmi nɛ tsu ní konɛ waa le he nɛ wa maa da ngɛ gbɛjegbɛ ɔ he, kɛ nihi nɛ e sa kaa waa kɛ mɛ nɛ tu munyu. E he hia we kaa doo waa fiɛɛ kɛ ha nɔ tsuaa nɔ nɛ bee ɔ. E sa nɛ waa to níhi a he hɛ. Kaa nɔ hyɛmi nɔ́ ɔ, ke nɔ ɔ ngɛ oya yee ɔ, e maa hi wawɛɛ kaa wa maa ngmɛ lɛ blɔ nɛ e be. Ke nítsumi hehi a hɛ mi nɛ wa ngɛ odase yee ngɛ ɔ, e sa nɛ waa kɛ nile nɛ tsu ní bɔnɛ pee nɛ nítsumitsɛ ɔmɛ a juɛmi nɛ ko ba wa nɔ. Behi fuu ɔ, e maa hi kaa wa maa ye nihi nɛ a je nítsumi he ɔ kɛ ma a odase mohu pe nihi nɛ kpaako a yaa nítsumi he ɔ. E sa nɛ waa su nihi a he ngɛ blɔ nɛ be hae nɛ a ye gbeye loo a tsui nɛ po nɔ. Jehanɛ se hu ɔ, ke wa ngɛ nihi womi hae ɔ, e sa nɛ waa kɛ níhi a se kɔmi nɛ tsu ní. Ke nɔ ɔ bua jɔɛ munyu ɔ he kpakpa ko ɔ, o ma nyɛ ma ha lɛ dɛ womi mohu pe nɛ o ma ha lɛ womi tɛtlɛɛ ɔmɛ eko.
4. Mɛni heje nɛ gbɛjegbɛ he odase yemi nítsumi ɔ ji fiɛɛmi nítsumi ɔ fã ko nɛ he ngɛ se nami nɛ bua jɔmi ngɛ mi ɔ?
4 Gbɛjegbɛ he odase yemi yeɔ bua wɔ nɛ wa nyɛɔ fĩaa anɔkuale wuhi fuu ngɛ be bɔɔ pɛ mi. (Fiɛlɔ 11:6) Ni komɛ nɛ waa kɛ kpeɔ ɔ ma nyɛ maa pee nihi nɛ wa ya nɛ mɛ ngɛ a wehi a mi be mi nɛ wa ngɛ wehi a mi fiɛɛmi nítsumi ɔ tsue ɔ. Mɛni heje nɛ o tui blɔ nya konɛ o kɛ o he nɛ wo gbɛjegbɛ he odase yemi nítsumi, nɛ ji fiɛɛmi nítsumi ɔ fã ko nɛ pi si nɛ bua jɔmi ngɛ mi ɔ mi mɔ?