Anɛ O Maa Pee Blɔ Gbali A Walɔ Lo?
1. Mɛni heje nɛ Kaimi ɔ yemi be ɔ ji be nɛ hi saminya nɛ waa kɛ ma bli wa sɔmɔmi nítsumi ɔ mi ɔ?
1 Kaimi ɔ yemi be ɔ ji be nɛ hi saminya nɛ waa kɛ ma bli wa sɔmɔmi nítsumi ɔ mi. Ngɛ be nɛ ɔ mi ɔ, wa susuɔ suɔmi agbo nɛ Yehowa je kpo kɛ ha wɔ kɛ gu e Bi ɔ nɛ e kɛ ha kaa kpɔmi nɔ́ ɔ nɔ ɔ he. (Yoh. 3:16) Enɛ ɔ haa nɛ wa naa hɛsa wawɛɛ, nɛ e peeɔ wɔ gɛjɛmi kaa wa ma de nihi Yehowa he níhi kɛ níhi nɛ e ngɛ pee ha adesahi ɔ. (Yes. 12:4, 5; Luka 6:45) E ji be hu nɛ waa kɛ nine fɔmi klɛdɛɛ ko haa wa huɛmɛ kɛ nihi ngɛ zugba kpɔ ɔ mi ɔ konɛ a kɛ wɔ ba ye Kaimi ɔ. Lɔɔ se ɔ, wa yeɔ bua nihi nɛ a ba Kaimi ɔ konɛ bua jɔmi nɛ a ná a ko ba si. Anɛ o ma nyɛ maa pee blɔ gbali a walɔ konɛ o bli o sɔmɔmi nítsumi ɔ mi ngɛ March, April, loo May lo?
2. Mɛni heje nɛ March nyɔhiɔ ɔ maa hi wawɛɛ kɛ ha blɔ gbali a wami nítsumi ɔ?
2 Mo Ha March Nyɔhiɔ ɔ Nɛ Pee Nyɔhiɔ Klɛdɛɛ: March nyɔhiɔ ɔ maa hi wawɛɛ kɛ ha blɔ gbali a wami nítsumi ɔ. Nihi nɛ a suɔ kaa a ma tsu blɔ gbali a wami nitsumi ɔ ma nya ma ha ngmlɛfia 30 loo ngmlɛfia 50. Ke kpokpa nɔ hyɛlɔ ɔ ba slaa asafo ɔ ngɛ March nyɔhiɔ ɔ mi ɔ, blɔ gbali a wali ma nyɛ maa ya kpe nɛ e kɛ daa blɔ gbali kɛ blɔ gbali klɛdɛɛ ɔmɛ maa pee ɔ eko, nɛ a maa hi si kɛ ya si benɛ a maa gbe kpe ɔ nya. A ha be nɛ a kɛ maa fɔ nihi nine kɛ ba Kaimi ɔ yemi ɔ ngɛ Pɛplɛgbi, March 26, 2013 ɔ mi ka pe jehahi nɛ be ɔ, nɛ e maa je sisi ngɛ March 1. Jehanɛ se hu ɔ, otsi nyagbe enuɔ sɔuu lɛ ngɛ March nyɔhiɔ ɔ mi. Enɛ ɔ he ɔ, mɛni heje nɛ o kɛ hɛdɔ susuu we he kaa o maa piɛɛ he kɛ pee nyɔhiɔ nɛ ɔ klɛdɛɛ ngɛ jeha a mi ɔ mɔ?
3. Mɛni blɔ nɔ wa maa gu kɛ to nihi a he blɔ nya konɛ waa bli wa fiɛɛmi nítsumi ɔ mi?
3 Moo To Blɔ Nya Nɔuu: Amlɔ nɛ ɔ ji be nɛ e sa kaa o hyɛ o níhi a he blɔ nya tomi konɛ o pee tsakemihi nɛ sa bɔnɛ pee nɛ o nyɛ nɛ o kɛ o he nɛ wo blɔ gbami nítsumi ɔ mi. E he hia nɛ weku ɔ mi bimɛ ɔmɛ nɛ a pee kake, lɔɔ he ɔ, ke nyɛ ngɛ gbɔkuɛ Weku Mawu Jami ɔ pee ɔ, nyɛ susu otihi nɛ nyɛɛ kɛ maa ma nyɛ hɛ mi kaa weku ɔ he konɛ nyɛɛ to níhi a he blɔ nya. (Abɛ 15:22) Ke o nyɛ we nɛ o tsu blɔ gbali a wami nítsumi ɔ, o kɔni mi ko jɔ. Anɛ o ma nyɛ maa to o níhi a he blɔ nya konɛ o se nɛ kɛ ligbi nɛ o maa ya fiɛɛmi ɔ lo? Anɛ o ma nyɛ maa ngɔ ligbi kake kɛ piɛɛ ligbihi nɛ o kɛ yaa fiɛɛmi ngɛ otsi ɔ mi ɔ he lo?
4. Ke wa bli wa fiɛɛmi nítsumi ɔ mi ngɛ March, April, kɛ May mi ɔ, mɛni se wa ma ná?
4 Ke wa bli wa fiɛɛmi nítsumi ɔ mi ngɛ March, April, kɛ May mi ɔ, wa ma ná bua jɔmi wawɛɛ nɛ wa tsui maa nɔ wa mi ngɛ Yehowa sɔmɔmi kɛ ni kpahi nɛ wa ngɛ ye buae ɔ heje. (Yoh. 4:34; Níts. 20:35) Nɔ́ nɛ he hia wawɛɛ ji kaa, Yehowa bua maa jɔ mɔde nɛ wa ngɛ bɔe kaa waa kɛ wa he maa sã afɔle ɔ he.—Abɛ 27:11.