Mɛnɔmɛ Nɛ A Ngɛ Yehowa Suɔmi Nya Ní Pee Mwɔnɛ ɔ?
1. Mɛni be nɛ wa maa je Mɛnɔmɛ Nɛ A Ngɛ Yehowa Suɔmi Nya Ní Pee Mwɔnɛ ɔ? womiyo ɔ kasemi sisi, nɛ wa ma ná he se ngɛ mɛni blɔ nɔ?
1 Kɛ je October 28 otsi ɔ mi ɔ, waa kɛ Mɛnɔmɛ Nɛ A Ngɛ Yehowa Suɔmi Nya Ní Pee Mwɔnɛ ɔ? womiyo ɔ maa pee Asafo Baiblo Mi Nikasemi. A pee womiyo ehe nɛ ɔ nɛ a je kpo ngɛ ‘Poo O Tsui He Piɛ!’ Kpe Ngua a sisi ɔ konɛ wa kɛ ye bua wa Baiblo mi nikaseli nɛ a ba asafo ɔ mi. Womi nɛ ɔ nɛ wa maa kase ɔ ma ha nɛ wa bua maa jɔ kaa wa piɛɛ Yehowa asafo ɔ he, nɛ e maa ye bua wɔ nɛ waa le womi ɔ mi munyuhi saminya konɛ wa kɛ tsu ní ngɛ wa fiɛɛmi nítsumi ɔ mi.—La 48:13.
2. Kɛ wa ma plɛ kɛ kase womiyo nɛ ɔ ngɛ asafo ɔ mi ha kɛɛ?
2 Bɔnɛ Wa Maa Kase Womiyo ɔ Ha: E sa kaa nɔ nɛ maa hyɛ nikasemi ɔ nɔ ɔ nɛ e ngɔ be nɛ a to kaa a kɛ pee nikasemi ɔ kɛ tsu ní pɛpɛɛpɛ, konɛ a susu fã amɛ tsuo a he saminya. E maa kane sane bimi nɛ e ji nikasemi ɔ yi ɔ kɛ bli nikasemihi 28 ɔ eko tsuaa eko nya. Kɛkɛ ɔ, e ma ha nɔ nɛ maa kane ɔ maa kane nya blimi munyu ɔ. Ngɛ lɔɔ se ɔ, nikasemi ɔ nɔ hyɛlɔ ɔ ma bi tue buli sane ngɛ nya blimi munyu ɔ nɛ a kane ɔ he. Lɔɔ se hu ɔ, e sa nɛ a kane fã tsuaa fã nɛ ní ngmami agboagbo je sisi ɔ, nɛ a susu he kakaaka. Ke a kane fã ko ta a, nikasemi ɔ nɔ hyɛlɔ ɔ ma bi tue buli nɛ a tsɔɔ bɔnɛ jamɛ a fã a haa sane bimi nɛ ji nikasemi ɔ munyuyi ɔ heto ha. Fonihi fuu ngɛ womiyo ɔ mi nɛ a ma nyɛ maa tu he munyu. Ke be ngɛ ɔ, a ma nyɛ maa kane ngmamihi nɛ maa oti ɔmɛ a nɔ mi ɔ. Loko a maa ya nikasemi kpa nɔ ɔ, nikasemi ɔ nɔ hyɛlɔ ɔ maa bi sanehi nɛ ngɛ bafa a sisi ɔ kɛ nylɔ nikasemi ɔ mi. Ke daka nɛ ji, “Moo Le Níhi Fuu” ngɛ mi ɔ, mo ha nɛ a kane, nɛ o bi tue buli nɛ a tsɔɔ bɔnɛ ke Baiblo kaselɔ ko kɛ ga womi nɛ ngɛ lejɛ ɔ tsu ní ɔ, e ma ná he se ha. Ke be ngɛ ɔ, nikasemi ɔ nɔ hyɛlɔ ɔ ma nyɛ ma bi sane nɛ ji nikasemi ɔ yi ɔ kɛ nylɔ nikasemi ɔ mi. Nyɛ kadi kaa pi doo kaa waa kɛ blɔ tsɔɔmi nɛ ɔ nɛ tsu ní ke waa kɛ nɔ ko ngɛ Baiblo mi nikasemi pee.
3. Kɛ wa ma plɛ kɛ ná womiyo nɛ ɔ kasemi he se kɛ pi si ha kɛɛ?
3 Bɔnɛ pee nɛ wa ná nikasemi ɔ he se kɛ pi si ɔ, e sa nɛ wa dla wa he saminya. Moo bɔ mɔde nɛ o ha munyu heto. Ke wa ngɛ ní ɔ kasee ɔ, mo susu bɔnɛ o Baiblo mi nikaseli ma ná he se ha a he. E ba mi kaa womiyo ehe nɛ wa maa kase nɛ ɔ ma ha nɛ waa ye bua nihi nɛ a ba piɛɛ wa he kɛ pee Mawu suɔmi nya ní konɛ mɛ hu a ná neneene wami he hɛ kɛ nɔ fɔmi.—1 Yoh. 2:17.