Womi Ehe Nɛ Waa Kɛ Ma Ha!
1. Mɛni womi lɛ waa kɛ ma ha ngɛ November nyɔhiɔ ɔ nɔ, nɛ mɛni yi mi tomi heje nɛ a pee womi nɛ ɔ?
1 Ngɛ jeha 2009 “Yaa Nɔ Nɛ O Hwɔɔ!” Kpe Ngua nɛ a pee ɔ sisi ɔ, a je womi ehe nɛ e yi ji, The Bible—What Is Its Message? ɔ kpo. Ngɛ November nyɔhiɔ ɔ nɔ ɔ, asafohi tsuo ngɛ je kɛ wɛ ɔ maa je sisi ma bɔni womi nɛ ɔ ngɔmi kɛ ha nihi. Mɛni blɔ nɔ womi nɛ ɔ maa ye bua nihi nɛ a ngɛ wa zugba kpɔ ɔmɛ a mi ngɛ? E maa ye bua nihi babauu, titli ɔ, nihi nɛ a pi Kristofoli nɛ a li nɔ́ ko tsɔ ngɛ Baiblo ɔ he ɔ. Enɛ ɔ heje ɔ, a tsɔɔ nya ngɛ womi ɔ bafa 3 ɔ mi ke, a pee womi ɔ konɛ e “tu sanehi nɛ ngɛ Baiblo ɔ mi ɔ a he munyu kpiti.”
2. Mɛni blɔ nɔ wa maa gu kɛ ngɔ womi ɔ kɛ ha nihi?
2 Bɔnɛ Wa Ma Plɛ Kɛ Ngɔ Womi ɔ Kɛ Ha Nihi Ha: Wa ma nyɛ ma de ke: “Wa suɔ nɛ waa le bɔnɛ o susu ngɛ munyu nɛ ɔ he ha. [Kane 2 Timoteo 3:16.] Nihi fuu nɛ waa kɛ mɛ sɛɛ ní ɔ kplɛɛ munyu nɛ ɔ nɔ; ni komɛ hu susu kaa e ji womi kpakpa ko kɛkɛ. Kɛ moo o buu Baiblo ɔ ha kɛɛ? [Ngmɛɛ lɛ blɔ nɛ e ha heto.] E ngɛ mi kaa wɔ tsuo wa ngɛ jami ekpaekpahi a mi mohu, se wa ngɛ yi mi tomi kpakpahi a heje nɛ sa kaa waa le níhi nɛ ngɛ Baiblo ɔ mi. [Moo kane nya blimi munyu nɛ ngɛ womi ɔ bafa 3 ɔ kɛ tsɔɔ lɛ.] Ke o kane Baiblo ɔ mi sane nɛ a po lɛ kpiti ngɛ womi nɛ ɔ mi ɔ, o maa na kaa Baiblo ɔ ngɛ munyuyi.”
3. Mɛni ji blɔ kpa ko hu nɛ wa ma nyɛ maa gu nɔ kɛ ngɔ womi ɔ kɛ ha nihi, titli ɔ, ke wa ngɛ fiɛɛe kɛ ngɛ nihi nɛ a pi Kristofoli tsɔɔe?
3 Blɔ kpa ko hu nɛ wa ma nyɛ maa gu nɔ nɛ waa kɛ womi ɔ ma ha nihi, titli ɔ, ke wa ngɛ fiɛɛe kɛ ngɛ nihi nɛ a pi Kristofoli tsɔɔe ɔ ji nɛ ɔ nɛ: “Wa maa suɔ nɛ waa le o juɛmi ngɛ munyu nɛ a ngma ngɛ Ngmami ɔ mi (aloo womi klɔuklɔu nɛ ɔ mi) ɔ he. [Kane La 37:11.] Ke gbami nɛ ɔ ba mi ɔ, kɛ o susu kaa zugba a nɔ maa hi ha kɛɛ? [Ngmɛɛ lɛ blɔ nɛ e ha heto.] Enɛ ɔ ji hɛ nɔ kami kake nɛ nihi nɛ a je ma ekpaekpahi a nɔ nɛ a hɛɛ hemi kɛ yemi slɔɔtoslɔɔtohi ɔ ma nyɛ ma ná kɛ je Baiblo ɔ mi.” Moo kane kuku ɔ nɛ ngɛ womi ɔ bafa 3 ɔ yinɔ ɔ kɛ tsɔɔ lɛ, nɛ o ngɔ womi ɔ kɛ ha lɛ.
4. Kɛ wa ma plɛ kɛ ngɔ womi tɛtlɛɛ ɔ kɛ je Baiblo mi nikasemi sisi ha kɛɛ?
4 Moo Je Baiblo Mi Nikasemi Sisi: Ke wa kpale kɛ ya slaa nɔ ko nɛ wa ha lɛ womi ɔ eko ɔ, wa ma nyɛ ma kai lɛ munyu nɛ waa kɛ lɛ sɛsɛ he momo ɔ, lɔɔ se ɔ, e sa nɛ waa da sane bimi nɛ ngɛ womi ɔ fã amɛ a nyagbe ɔ ekomɛ a nɔ nɛ waa kɛ lɛ nɛ susu kuku kake loo enyɔ ko he ngɛ womi ɔ mi nɛ kɔɔ munyu nɛ waa kɛ lɛ susu he ɔ he. Aloo ke wa suɔ nɛ waa ngɔ Baiblo Tsɔɔmi womi ɔ kɛ ha lɛ nɔuu ɔ, wa ma nyɛ maa kane nɔ́ nɛ a ngma ngɛ womi tɛtlɛɛ ɔ se mi ɔ kɛ tsɔɔ lɛ konɛ waa ngɔ Baiblo Tsɔɔmi womi ɔ kɛ ha lɛ, nɛ wa bi lɛ yi nɛ e bua jɔ he wawɛɛ. Ke e tsɔɔ ɔ, waa kɛ lɛ ma nyɛ ma susu kuku kake loo enyɔ he. Nyɛ ha nɛ wɔ tsuo waa ngɔ wa he kɛ wo womi nɛ ɔ hami mi kɛ pi si ngɛ November nyɔhiɔ ɔ nɔ!