Bɔnɛ Waa Kɛ Mɛnɔmɛ Nɛ A Ngɛ Yehowa Suɔmi Nya Ní Pee Mwɔnɛ ɔ?
Womiyo ɔ Ma Tsu Ní Ha Womiyo Ehe Nɛ A Pee Konɛ Wa Kɛ Ye Bua Wa Baiblo Mi Nikaseli Ɔmɛ Kɛ Ba Asafo ɔ Mi
1. Mɛni ji yi mi tomi etɛ heje nɛ a pee Yehowa Suɔmi Nya Ní womiyo ɔ ngɛ?
1 Anɛ o kɛ womiyo ehe nɛ ji Mɛnɔmɛ Nɛ A Ngɛ Yehowa Suɔmi Nya Ní Pee Mwɔnɛ ɔ? bɔni nítsumi lo? A pee konɛ (1) e ye bua nihi nɛ waa kɛ mɛ kaseɔ Baiblo ɔ nɛ a le nihi nɛ Yehowa Odasefoli a ji (2) e ye bua mɛ nɛ a le nítsumi nɛ wa tsuɔ, kɛ (3) nɛ́ e tsɔɔ mɛ bɔnɛ asafo ɔ tsuɔ ní ha. Ngɛ Yehowa Suɔmi Nya Ní womiyo ɔ mi ɔ, bafa tsuaa bafa hɛɛ nikasemi kake, nɛ ke nyɛ gbe nyɛ nikasemi ɔ nya a, o ma nyɛ maa ngɔ hɛngmɛfia enuɔ kɛ ya si nyɔngma konɛ nyɛ susu bafa kake he.
2. Moo kale bɔnɛ a pee womi nɛ ɔ ha kɛ níhi nɛ ngɛ mi.
2 Bɔnɛ A Pee Womi ɔ Ha: A gba womiyo nɛ ɔ mi etɛ, nɛ fã tsuaa fã tsɔɔ nɔ́ ko ngɛ Yehowa asafo ɔ he kaa bɔnɛ wa susu he momo ɔ. A pee munyuyi 28 ɔ tsuo ngɛ womi ɔ mi ɔ sane bimi, nɛ munyuyi wawi nɛ a ngma mɛ agboagbo nɛ a nyɛɛ se ɔ ha sane bimi ɔmɛ a heto. A kɛ fonihi nɛ a po ngɛ ma munomunohi nɛ hiɛ pe 50 nɔ ɔ wo womi ɔ mi konɛ a na kaa wa tsuɔ ní ngɛ je ɔ mi tsuo. Daka nɛ ji, “Moo Le Níhi Fuu” ɔ ngɛ nikasemi ɔmɛ babauu a mi nɛ o ma nyɛ maa wo o nikaselɔ ɔ he wami nɛ e tsu a he ní.
3. Kɛ wa ma plɛ kɛ ngɔ Yehowa Suɔmi Nya Ní womiyo ɔ kɛ tsu ní kɛɛ?
3 Bɔnɛ O Kɛ Ma Tsu Ní Ha: Mo bi sane nɛ ji nikasemi ɔ munyuyi ɔ kɛ je sisi. Kɛkɛ ɔ, ke o kɛ lɛ ngɛ ní ɔ kanee ɔ, o tsɔɔ lɛ munyuyi nyafii nɛ a ngma lɛ agboagbo ɔmɛ. Nyagbe ɔ, o kɛ lɛ nɛ susu mi nylɔmi sane bimihi nɛ ngɛ bafa a sisi ɔ he. O ma nyɛ maa kane nikasemi ɔ tsuo si kake nɛ nyɛ susu he loo ke nyɛ kane kuku ɔ, kɛkɛ nyɛ susu he. E sa nɛ waa kɛ nɔ́ se kɔmi nɛ tsu ní konɛ waa le ngmamihi nɛ a tsɛ se ɔmɛ a kpɛti nɔ́ nɛ sa kaa waa kane. O hɛ ko je nɔ kaa nyɛ maa susu fonihi kɛ “Moo Le Níhi Fuu” daka amɛ a he. E sa nɛ o kɛ o nikaselɔ ɔ nɛ kase womiyo nɛ ɔ nyatsɔɔ. Se, ke e he hia kaa o kɛ lɛ nɛ kase nikasemi pɔtɛɛ ko ɔ, o ma nyɛ maa pee jã. Kaa nɔ hyɛmi nɔ ɔ, ke kpe wayo loo kpe ngua be ma sumi ɔ, o kɛ lɛ ma nyɛ maa kase nikasemi 11 ɔ.
4. Mɛni heje nɛ o bua jɔ kaa o ná womiyo nɛ ɔ?
4 Ke waa kɛ nɔ ko kase Baiblo ɔ, wa yeɔ bua lɛ nɛ e leɔ wa hiɔwe Tsɛ ɔ. Se, e he hia hu nɛ waa tsɔɔ lɛ Yehowa asafo ɔ he ní. (Abɛ 6:20) Wa bua jɔ kaa wa nine su womiyo ehe nɛ́ ma ha ní tsɔɔmi maa pee gbɔjɔɔ nɛ ɔ nɔ!