Jemiba Nɛ Woɔ Mawu Hɛ Mi Nyami

1. Mɛni heje nɛ a yoɔ Yehowa Odasefoli ke a ya kpe nguahi ɔ?

¹ Ke wa yaa kpe ngua a, e he wɛ ha nihi kaa a ma yɔse kaa wa yaa kpe. Ngɛ mahi nɛ a peeɔ kpe nguahi ngɛ a nɔ ɔ babauu mi ɔ, adafi fiami nítsumi hehi haa mabi ɔmɛ lemi kaa wa ba kpe. Behi fuu ɔ, nihi nɛ a ya kpe ɔ yaa nibwɔhi a tomi hehi kɛ ní yemi hehi, nɛ nihi nɛ a ngɛ kpɔ ɔ mi ɔ naa nibwɔ ɔmɛ nɛ a wo kpe badge ɔ. Kaimihi nɛ nyɛɛ se ɔ maa ye bua wɔ konɛ waa ngɔ wa jemi bami kpakpa a kɛ wo Mawu hɛ mi nyami ngɛ ma nɛ wa maa ya kpe ɔ ngɛ nɔ ɔ mi.—1 Pet. 2:12.

2. Mɛni blɔ nɔ wa he dlami nɛ maa sa a ma nyɛ maa wo Mawu hɛ mi nyami ngɛ ma nɛ wa maa pee kpe ɔ ngɛ nɔ ɔ mi?

² Tade Nɛ Sa Womi: Ke wa yaa kpe nɛ wa dla wa he bɔnɛ sa a, nihi bua jɔɔ wa he. Se, tadehi nɛ wa woɔ ngɛ be kpahi a mi, kaa benɛ wa yaa nibwɔhi a tomi he, benɛ wa yaa ye ní ngɛ ní yemi hehi, kɛ benɛ wa yaa he ní ɔ, ma nyɛ ma ha nɛ nihi ma ná wa he juɛmi kpakpa. E ngɛ mi kaa e he hia we nɛ́ wa dla wa he kaa bɔnɛ wa ma dla ke wa yaa kpe ɔ sisi mohu, se e sa kaa tade nɛ wa maa wo ɔ nɛ pee nɔ́ nɛ sa nɛ bu ngɛ he; e sɛ nɛ wa he dlami ɔ nɛ pee eko kɛ eko kɛkɛ. E sa kaa nihi nɛ a na slɔɔto ngɛ wɔ kɛ nihi nɛ a he we yi ɔmɛ a kpɛti. (Rom. 12:2) Jehanɛ hu ɔ, e sa nɛ waa ma wa kpe badge ɔ ngɛ wa gugue nya, ejakaa e maa fia kpe ɔ he adafi, nɛ e ma bli blɔhi kɛ ha odase yemi, nɛ e ma ha ni kpahi nɛ a ba kpe ɔ ma yo wɔ.

3. Mɛni blɔ nɔ wa maa gu kɛ je tsui si tomi kɛ bu kpo?

³ Tsui Si Tomi Kɛ Bu Kpo Nɛ Wa Ma Je: Ngɛ be nɛ nihi fuu nɛ a ngɛ je ɔ mi ɔ foɔ mɛ pɛ a nɔ mi, nɛ a li sina a, hyɛ bɔnɛ wa tsui si nɛ wa maa to kɛ bu kpo nɛ wa ma je ɔ ma ha nɛ nibwɔhi a hwɔ he kɛ ní yemi he nɔ hyɛli ɔmɛ a bua maa jɔ wa he ha. (2 Tim. 3:1-5) Ke wa ngɛ sɛ nue kɛ fɔ si, loo wa ngɛ zã woe kɛ yaa ngɔ womi nɛ a je kpo ɔ, wa ko hla wɔ pɛ wa nɔ́, mohu ɔ, wa susu wa nyɛmimɛ a he. (1 Kor. 10:23, 24) Benɛ nyumu ko nɛ e ngɛ munyu ɔ he bua jɔmi ɔ ya e kekle kpe ɔ, e de ke, “I kai we munyu nɛ a tu jamɛ a ligbi ɔ ekoeko, se Odasefoli ɔmɛ a jemi bami ɔ lɛɛ ma kai daa.”

4. Ke e maa hi ɔ, mɛni heje nɛ e sa kaa waa kɛ wa he nɛ ha nɛ wa tsu ní ngɛ kpe ngua a sisi ɔ?

⁴ Nihi Nɛ A Je A Suɔmi Mi Nɛ A Kɛ A He Ha: A le anɔkuale Kristofoli kaa a suɔ kaa a kɛ a he ma ha faa. (La 110:3) Anɛ o ma nyɛ maa ngɔ o he kɛ ha konɛ o ye bua ngɛ kpe ɔ sisi lo? Ngɛ kpe ko sisi ɔ, nyɛmimɛ nyumuhi kɛ yihi maa pee 600 ngɔ a he kɛ ha nɛ a dla he nɛ a maa pee kpe ɔ ngɛ ɔ. Nihi nɛ a tsuɔ ní ngɛ lejɛ ɔ de ke: “Wa nɛ́ nɔ́ kaa kikɛ gblee! E he wa kaa wa ma he ye kaa nimli nɛ ɔmɛ tsuo ngɔ a he kɛ ha.” Waa kɛ bua jɔmi ngɛ 2013 kpe ngua a, nɛ́ ma ha wa ná he blɔ kɛ bu Mawu tue nɛ waa kase e he ní, konɛ waa wo e hɛ mi nyami ɔ blɔ hyɛe.

[Daka ngɛ bafa 3-6]

2013 Kpe Ngua a He Kaimihi

◼ Blɔ Nya Tomi Be Ɔmɛ: Ngɛ ligbi etɛ ɔ tsuo mi ɔ, a maa je la nɛ a maa fia kɛ bli kpe ɔ nya a sisi mɔtu 9:20. Ngɛ jamɛ a be ɔ mi ɔ, e sa nɛ wɔ tsuo wa ya hi si konɛ waa je blɔ nya tomi ɔ sisi ngɛ blɔ nɛ sa nɔ. Ngɛ Soha kɛ Hɔ ɔ, a ma la nɛ a ma kpa kpe ɔ gbɔkuɛ 4:50, nɛ Hɔgba hu a ma kpa gbɔkuɛ ngmlɛ 3:35.

◼ Lɔle Mami He: Ke pi hiɔ sane aloo si fɔfɔɛ kpa ko nɛ biɔ esɔ yemi ɔ, lɛɛ be tsuaa be ɔ, e maa hi kaa wa maa hi si ngɛ he nɛ wa ma nyɛ maa bu munyu ɔ tue, mohu pe nɛ wa ma ya hi lɔle mi, ejakaa wa juɛmi ma nyɛ maa je munyu ɔ nɔ, loo wa maa hwɔ mahe. Ke wa hi kpe ɔ sisi, nɛ wa bu munyu ɔmɛ tue saminya a, lɔɔ tsɔɔ kaa wa ngɛ hɛsa kɛ ha mumi mi niye ní kpakpahi nɛ Yehowa to he blɔ nya ha wɔ ɔ. Akɛnɛ lɔle mami he ɔmɛ klee we heje ɔ, e sa nɛ nihi nɛ pee kake kɛ hi lɔle kake mi kɛ ba kpe ɔ.

◼ Sɛ Nɛ A Maa Nu Kɛ Fɔ Si: Nyɛ ma nyɛ maa nu blɔ kɛ ha nihi nɛ nyɛɛ kɛ mɛ je we kake mi loo nihi nɛ nyɛɛ kɛ mɛ sɛ lɔle kake mi loo nyɛ Baiblo mi nikaseli pɛ.—1 Kor. 13:5.

◼ Piani Niye Ní: Wa kpa nyɛ pɛɛ nɛ nyɛɛ ngɔ ní nɛ nyɛ maa ye piani kɛ ba, mohu pe nɛ nyɛ maa je kpe ɔ sisi kɛ ya he niye ní ngɛ he jɔɔmi be ɔ mi. Nyɛ ko ngɔ ní nguahi nɛ a kɛ niye ní woɔ mi, loo níhi nɛ ma nyɛ maa ywia kɛ ba kpe ɔ.

◼ Womihi Nɛ A Ma Je Kpo: Mawu Munyu ɔ wo wɔ ga ke “nyɛɛ kɛ suɔmi nɛ pee nɔ́ tsuaa nɔ́.” (1 Kor. 16:14) Akɛnɛ wa ngɛ suɔmi nɛ wa susuɔ ni kpahi a he heje ɔ, ke a je womi ko kpo ngɛ kpe sisi ɔ, e sɛ nɛ waa tu fo, nɛ wa tsitsɛɛ nihi bɔnɛ pee nɛ wa nine nɛ su womi ɔmɛ a nɔ kekle. Ke wa ye wa he nɔ, nɛ wa to wa tsui si ɔ, lɔɔ tsɔɔ kaa wa ji Kristofoli nɛ wa nane pi si ngɛ Mawu jami mi, nɛ wa suɔ wa sibi.—Yoh. 13:35.

◼ Yemi Kɛ Buami: Wa ma nyɛ ma ha yemi kɛ buami ngɛ kpe ɔ sisi konɛ a kɛ fi je kɛ wɛ nítsumi ɔ se kɛ tsɔɔ kaa wa ngɛ hɛsa ha kpe ɔ blɔ nya tomi ɔ. Ke nyɛ maa gu check nɔ kɛ ha yemi kɛ buami ɔ, nyɛɛ ngma “Watch Tower” ngɛ nɔ.

◼ Oslaahi Kɛ Hiɔ Nɛ Fiaa Nɔ Tlukaa: Ke nɔ ko plaa loo hiɔ fia nɔ ko tlukaa ngɛ kpe ɔ, wa kpa nyɛ pɛɛ nɛ nyɛ de nibwɔhi a kpeeli ɔmɛ a kpɛti nɔ kake, konɛ e ya wo nyɛmimɛ nɛ tsuɔ ní ngɛ Tsopa Ngɔmi He ɔ a tue nɔ amlɔ, nɛ a ba hyɛ nɛ a tsu haomi ɔ he ní.

◼ Falifali Peemi: Nɔ tsuaa nɔ nɛ ba kpe ɔ blɔ nya nítsumi ji kaa e ma dla he nɛ e hi ɔ ke e ye ní ta. Akɛnɛ a ngɔ níhi nɛ a kɛ dɔmi woɔ mi kɛ ma kpe ɔ sisi heje ɔ, wa kpa nyɛ pɛɛ nɛ nyɛɛ ngɔ paper, niye ní, rɔba nɛ a kɛ fiɔ nyu, kɛ dɔmi kpahi kɛ wo ní ɔmɛ a mi. Ke wa pee jã a, lɔɔ tsɔɔ kaa wa ji nihi nɛ a he tsɔ.

◼ Foni Pomi: Akɛnɛ wa sume nɛ wa yeɔ jua ngɛ teokrase he nya buami sisi heje ɔ, wa be nihi nɛ a poɔ foni nɛ a heɔ sika nine fɔe kɛ ba kpe ɔ sisi nɛ a ba po nyɛmimɛ foni.—w84-E 7/1 bf. 25; hyɛ Organized womi ɔ bafa 142, kuku 3 hulɔ.

◼ Weku Mi Bimɛ Nɛ A Maa Hi He Kake: E sa kaa fɔli kɛ a bimɛ nɛ hi he kake benɛ kpe ɔ ngɛ nɔ yae, pe nɛ a maa ngmɛ blɔ nɛ́ a bimɛ, nɛ́ nihewi kɛ yihewi hu piɛɛ he, kɛ nihewi loo yihewi kpa amɛ ma ya hi he kake. Ke fɔli kɛ a bimɛ hi he kake ɔ, a maa wo mɛ he wami konɛ a ngma otihi kɛ pue si benɛ kpe ɔ ngɛ nɔ yae ɔ.

◼ Tsopa Ngɔmi: Ke o ngɛ tsopa pɔtɛɛ ko nɛ o nuɔ daa a, wa kpa mo pɛɛ nɛ o ngɔ bɔnɛ maa su mo kɛ ba kpe ɔ ejakaa eko be tsopa ngɔmi he ɔ hie ngɛ kpe ɔ sisi.

◼ Tokota: Daa jeha a, nihi nɛ a plaa a fuu jee tokota nɛ a woɔ ɔ mi, titli ɔ tokota gagaa. E hi wawɛɛ kaa wa maa wo tokota nɛ sa konɛ wa nyɛ nɛ waa kuɔ atlaakpeehi, loo wa nyɛ nɛ waa nyɛɛ dadehi nɛ puɔ ngɛ a mi nɛ a kɛ tsiɔ muɔhi a nya a nɔ, kɛ he kpahi slɔkee.

◼ Bimwɔwi A Tsɛ̃mi Níhi: E sɛ nɛ a ngɔ bimwɔwi a tsɛ̃mi níhi kɛ ba kpe ɔ sisi. Se kɛ̃ ɔ, a ma nyɛ maa ngɔ jokuɛwi a sɛ nɛ ngɛ slɔkee kɛ ma foli ɔmɛ a kasa mi.

◼ Womi Nɛ A Kɛ Hlaa Nɔ Se Blɔ: Ke wa ya kpe ɔ nɛ wa ye nɔ ko odase nɛ e bua jɔ munyu ɔ he ɔ, e sa nɛ waa ngɔ womi nɛ ji Please Follow Up (S-43) kɛ ngma e he sanehi. Ke o ngma womi ɔ nɔ ní ta a, o ma nyɛ maa ngɔ kɛ ya Womi Ngɔmi He ɔ konɛ a tsu he ní, aloo o ma nyɛ maa ngɔ kɛ ha nyɛ asafo mi womi ngmalɔ ɔ ke nyɛ kpale nyɛ se kɛ ho nyɛ asafo ɔ mi ya.

◼ Hwɔ He: (1) Ke nyɛ ya ba he ko nɛ nyɛ maa wo he hiɔ ɔ, wa kpa nyɛ pɛɛ nyɛ ko ha nɛ nihi fuu nɛ hi tsu ɔ mi pe bɔnɛ a ngmɛ blɔ. (2) Ke nyɛ ya to ni komɛ a we mi ɔ, nyɛɛ pee falifali, nyɛɛ pee nyɛ ní pɛpɛɛpɛ nɛ nyɛ je hɛsa kpo ngɛ níhi nɛ a ma ha nyɛ ɔ a he. (3) E sɛ nɛ nyɛmimɛ nyumuhi kɛ yihi nɛ hwɔ tsu kake mi, ja a je weku kake mi. (4) Nyɛ ko hoo ní ngɛ tsu nɛ a ngmɛ́ blɔ kaa a hoo ní ngɛ mi ɔ mi. (5) Bɔnɛ pee nɛ waa tsɔɔ kaa wa ngɛ jemiba kpakpa a, nyɛ ko du nyɛ he ngɛ kpo nɔ. Ke hedu he be ɔ, nyɛ ma nyɛ maa ngɔ sa loo bo kɛ pee hedu he. (6) Kaa Kristofoli ɔ, e sɛ nɛ waa ngɔ níhi nɛ a to he blɔ nya ha nibwɔhi kɛ be nɔ. (7) Nyɛ je mumi ɔ yiblii ɔ kpo ngɛ bɔnɛ nyɛɛ kɛ nítsuli ngɛ nibwɔhi a to he loo weku nɛ nyɛ ya to ɔ mi bi ɔmɛ maa hi si ha a mi. (8) Ke haomi ko ba ngɛ he nɛ nyɛ ya to ɔ, nyɛɛ bɔ mɔde kaa nyɛ ma wo Nítsumi He Nɛ Hyɛɛ Hwɔ He Nɔ ɔ a tue nɔ.

◼ Nihi Nɛ A Kɛ A He Ha Kaa A Ma Tsu Ní: Nihi nɛ a suɔ kaa a kɛ a he ma ha a ya Volunteer Service Department ngɛ kpe ɔ sisi. Jokuɛwi nɛ a yí jeha 16 lolo ɔ ma nyɛ maa piɛɛ a fɔli, nihi nɛ hyɛɛ a nɔ, loo nihi nɛ a wa nɛ́ a fɔli le mɛ ɔ a he kɛ tsu ní. E sa nɛ nítsumi nɔ hyɛli a bua nihi nɛ a kɛ a he ma ha bɔ nɛ sa nya loko kpe ɔ nɛ su kɛ gu circuit volunteer blɔ nya tomi ɔ nɔ.