“Nyɛɛ Ba Nyɛ Je Mi Saminya Ngɛ Ma Je Li Ɔmɛ A Kpɛti”

1. Mɛni he je nɛ e he hia nɛ waa ba wa je mi saminya ke wa ya kpe ɔ?

¹ Daa jeha ke wa ya kpe ɔ, nihi yɔseɔ wɔ, enɛ ɔ he ɔ, e he hia nɛ wa ha nɛ wa je mi bami nɛ tsɔɔ Mawu nɛ wa ngɛ jae ɔ. (3 Mose 20:26) E sa nɛ wa tade womi kɛ wa he dlami, kɛ su kpakpa nɛ wa ma je kpo ɔ nɛ tsɔɔ heii kaa wa ji Kristo anɔkuale se nyɛɛli. Ke wa ya kpe ngua a, mɛni blɔ nɔ wa maa gu kɛ ‘ba wa je mi saminya ngɛ je ma amɛ a kpɛti’ konɛ wa kɛ wo wa hiɔwe Tsɛ ɔ hɛ mi nyami?—1 Pet. 2:12.

2. Ke wa ya kpe ngua a, mɛni he blɔhi wa ma ná kɛ je Kristofohi a su kpakpa kpo?

² Mo Je Kristofohi A Su Kpakpa Kpo: Suɔmi nɛ wa jeɔ kpo kɛ tsɔɔ wa nyɛmimɛ kɛ ‘ni kpahi’ ɔ ngɛ slɔɔto kulaa ngɛ su nɛ je ɔ jeɔ kpo ɔ he. (Kol. 3:10; 4:5; 2 Tim. 3:1-5) E sa nɛ wa je mi mi jɔmi kɛ tsui si tomi kpo kɛ tsɔɔ nihi nɛ a tsuɔ ní ngɛ nibwɔhi a hwɔ he kɛ ni yemi hehi ɔ, nɛ waa pee jã ke nyagbahi te si po. Su kpakpa nɛ wa ma je kpo ɔ hu biɔ kaa wa maa ke nihi nɛ a hyɛɛ wa nɔ ngɛ nibwɔhi a to he loo ní yemi he ɔ ní.

3. Mɛni a ngɛ fɔli kaie nɛ a pee, nɛ mɛni he je?

³ E sa nɛ fɔli a hɛ nɛ hi a bimɛ a he ngɛ kpe ɔ sisi, ngɛ ní yemi he, kɛ ngɛ a hwɔ he ɔ. (Abɛ 29:15) Yo ko nɛ e hyɛɛ ní yemi he ngɛ nibwɔhi a hwɔ he ko nɔ ɔ de nyɛmi ko kɛ e yo ke: “Wa suɔ nyɛ sane wawɛɛ. Nyɛ wekuhi kɛ nyɛ bimɛ ɔmɛ baa a je mi saminya nɛ a buu nɔ. Ní tsuli ɔmɛ ngɛ nyɛ he munyu kpakpa tue, wa bua ko jɔ ke nyɛ ba hwɔɔ hiɛ ɔ daa Hɔ kɛ Hɔgba.”

4. Ke wa ya he nɛ a maa pee kpe ɔ ngɛ ɔ, mɛni he je nɛ e sa nɛ wa dla wa he saminya a?

⁴ Tade Nɛ Sa Womi: E sa nɛ tade nɛ wa maa wo kɛ ya kpe ɔ nɛ pee nɔ́ nɛ sa nɛ bu ngɛ he, pi kaa nɔ́ nɛ a pɔɔ womi ngɛ je ɔ mi ɔ. (1 Tim. 2:9) Ke wa ya nibwɔhi a hwɔ he loo wa ngɛ wa he mi jɔɔe loko a maa je kpe ɔ sisi loo benɛ a kpa a, e sɛ nɛ wa he dlami nɛ pee eko kɛ eko kɛkɛ. Ke wa dla wa he saminya a, wa ma nyɛ maa ma wa baaji ɔ ngɛ wa gugue nya, nɛ e be wɔ zo pee kaa wa maa ye nihi odase ke wa ná he blɔ. Ke wa ya kpe ɔ, wa he nɛ wa ma dla saminya, kɛ je mi bami kpakpa kpo nɛ wa ma je ɔ maa gbla nihi nɛ a hɛɛ tsui kpakpa a kɛ ba yi wami hemi munyu nɛ ngɛ Baiblo ɔ mi ɔ he, nɛ e ma ha Yehowa bua maa jɔ.—Zef. 3:17.

2014 Kpe Ngua a He Kaimihi

◼ Blɔ Nya Tomi Be Ɔmɛ: Ngɛ ligbi etɛ ɔ tsuo mi ɔ, a maa je la nɛ a maa fia kɛ bli kpe ɔ nya a sisi mɔtu ngmlɛ 9:20. Ngɛ jamɛ a be ɔ mi ɔ, e sa nɛ wɔ tsuo wa ya hi si konɛ waa je blɔ nya tomi ɔ sisi ngɛ blɔ nɛ sa nɔ. Ngɛ Soha kɛ Hɔ ɔ, a ma la nɛ a maa sɔle kɛ kpa kpe ɔ gbɔkuɛ ngmlɛ 4:55 nɛ Hɔgba hu a ma kpa gbɔkuɛ ngmlɛ 3:50.

◼ Mahi A Kpɛti Kpehi: A maa pee mahi a kpɛti kpehi ngɛ he komɛ. Mo kadi kaa asafo ɔ ní tsumi he kɔni ɔ susu sɛhi abɔ, lɔle mami hehi, kɛ nibwɔhi a hwɔ hehi nɛ ngɛ ɔ he saminya loko a fɔ asafohi pɔtɛɛ komɛ kɛ nihi nɛ a je ma se nine kaa a ba kpe nɛ ɔmɛ. Ke fiɛɛli ya mahi a kpɛti kpe ngɛ bemi nɛ a fɔ we mɛ nine ɔ, e ma ha nihi a he maa hiɛ tsɔ. Ke si fɔfɔɛ komɛ bi nɛ o ya kpe kpa ko nɛ pi nyɛ kpe ɔ, e sɛ nɛ o ya mahi a kpɛti kpe.

◼ Lɔle Mami He: Ke pi hiɔ sane aloo si fɔfɔɛ kpa ko nɛ biɔ esɔ yemi ɔ, lɛɛ e maa hi kaa wa maa hi si ngɛ kpe ɔ sisi nɛ waa bu munyu ɔ tue, mohu pe nɛ wa ma ya hi lɔle mi, ejakaa wa juɛmi ma nyɛ maa je munyu ɔ nɔ, loo wa maa hwɔ mahe. Ke wa hi kpe ɔ sisi, nɛ wa bu munyu ɔmɛ tue saminya a, lɔ ɔ tsɔɔ kaa wa ngɛ hɛsa kɛ ha mumi mi niye ní kpakpahi nɛ Yehowa to he blɔ nya ha wɔ ɔ. Akɛnɛ lɔle mami he ɔmɛ klee we he je ɔ, e sa nɛ nihi nɛ pee kake kɛ hi lɔle kake mi kɛ ba kpe ɔ.

◼ Sɛ Nɛ A Maa Nu Kɛ Fɔ Si: Nyɛ ma nyɛ maa nu blɔ kɛ ha nihi nɛ nyɛɛ kɛ mɛ je we kake mi loo nihi nɛ nyɛɛ kɛ mɛ sɛ lɔle kake mi loo nyɛ Baiblo mi ní kaseli pɛ. A to sɛ klɛdɛɛ he blɔ nya kɛ ha nihi nɛ a wa ngɛ jeha mi kɛ nihi nɛ a be he wami ɔ. Akɛnɛ sɛhi bɔɔ pɛ lɛ ngɛ lejɛ ɔ he je ɔ, nɔ kake loo nihi enyɔ pɛ lɛ a ma nyɛ maa hi a he ngɛ lejɛ ɔ.

◼ Piani Niye Ní: Wa kpa nyɛ pɛɛ nɛ nyɛɛ ngɔ ní nɛ nyɛ maa ye piani kɛ ba, mohu pe nɛ nyɛ maa je kpe ɔ sisi kɛ ya he niye ní ngɛ he jɔɔmi be ɔ mi. Nyɛ ko ngɔ ní nguahi nɛ a kɛ niye ní woɔ mi, loo níhi nɛ ma nyɛ maa ywia kɛ ba kpe ɔ.

◼ Yemi Kɛ Buami: Wa ma nyɛ ma ha yemi kɛ buami ngɛ kpe ɔ sisi konɛ a kɛ fi je kɛ wɛ ní tsumi ɔ se kɛ tsɔɔ kaa wa ngɛ hɛsa ha kpe ɔ blɔ nya tomi ɔ. Ke nyɛ maa gu check nɔ kɛ ha yemi kɛ buami ɔ, nyɛɛ ngma kaa a kɛ ha “Watch Tower.”

◼ Oslaahi Kɛ Hiɔ Nɛ Fiaa Nɔ Tlukaa: Ke nɔ ko plaa loo hiɔ fia nɔ ko tlukaa ngɛ kpe ɔ sisi ɔ, wa kpa nyɛ pɛɛ nɛ nyɛ de nibwɔhi a kpeeli ɔmɛ a kpɛti nɔ kake, konɛ e ya wo nyɛmimɛ nɛ tsuɔ ní ngɛ Tsopa Ngɔmi He ɔ a tue nɔ amlɔ, nɛ a ba hyɛ nɛ a tsu haomi ɔ he ní.

◼ Falifali Peemi: Nɔ tsuaa nɔ nɛ ba kpe ɔ blɔ nya ní tsumi ji kaa e ma dla he nɛ e hi ɔ ke e ye ní ta. Akɛnɛ a ngɔ níhi nɛ a kɛ dɔmi woɔ mi kɛ ma kpe ɔ sisi he je ɔ, wa kpa nyɛ pɛɛ nɛ nyɛɛ ngɔ pepa, niye ní, hlɔba nɛ a kɛ fiɔ nyu, kɛ dɔmi kpahi kɛ wo ní ɔmɛ a mi. Ke wa pee jã a, lɔ ɔ tsɔɔ kaa wa ji nihi nɛ a he tsɔ.

◼ Foni Pomi: Akɛnɛ wa sume nɛ wa yeɔ jua ngɛ teokrase he nya buami sisi he je ɔ, wa be nihi nɛ a poɔ foni nɛ a heɔ sika nine fɔe kɛ ba kpe ɔ sisi nɛ a ba po nyɛmimɛ foni.—w84-E 7/1 bf. 25; hyɛ Organized womi ɔ ba fa 142, kuku 3 hulɔ.

◼ Weku Mi Bimɛ Nɛ A Maa Hi He Kake: E sa kaa fɔli kɛ a bimɛ nɛ hi he kake benɛ kpe ɔ ngɛ nɔ yae, pe nɛ a maa ngmɛ blɔ nɛ́ a bimɛ, nɛ́ nihewi kɛ yihewi hu piɛɛ he, kɛ nihewi loo yihewi kpa amɛ ma ya hi he kake. Ke fɔli kɛ a bimɛ hi he kake ɔ, a maa wo mɛ he wami konɛ a ngma otihi kɛ pue si benɛ kpe ɔ ngɛ nɔ yae ɔ.

◼ Tsopa Ngɔmi: Ke o ngɛ tsopa pɔtɛɛ ko nɛ o nuɔ daa a, wa kpa mo pɛɛ nɛ o ngɔ bɔ nɛ maa su mo kɛ ba kpe ɔ ejakaa eko be tsopa ngɔmi he ɔ hie ngɛ kpe ɔ sisi.

◼ Wa He Nɔ Nɛ Wa Maa Hyɛ Saminya: Wa kpa nyɛ pɛɛ nɛ nyɛ hɛ nɛ hi níhi nɛ ma ha nɛ nyɛ maa sane si loo nyɛ tɛ si ɔ a he konɛ nyɛ ko plaa. Daa jeha a, nihi nɛ a plaa a fuu jee tokota nɛ a woɔ ɔ, titli ɔ tokota gagaa. E hi wawɛɛ kaa wa maa wo tokota nɛ sa konɛ wa nyɛ nɛ waa kuɔ atlaakpehi, loo wa nyɛ nɛ waa nyɛɛ dadehi nɛ puɔ ngɛ a mi nɛ a kɛ tsiɔ muɔhi a nya a nɔ, kɛ he kpahi slɔkee.

◼ Womihi Nɛ A Ma Je Kpo: Mawu Munyu ɔ wo wɔ ga ke “nyɛɛ kɛ suɔmi nɛ pee nɔ́ tsuaa nɔ́.” (1 Kor. 16:14) Akɛnɛ wa ngɛ suɔmi nɛ wa susuɔ ni kpahi a he he je ɔ, ke a je womi ko kpo ngɛ kpe sisi ɔ, e sɛ nɛ waa tu fo, nɛ waa tsitsɛɛ nihi bɔ nɛ pee nɛ wa nine nɛ su womi ɔmɛ a nɔ kekle. Ke wa ye wa he nɔ, nɛ wa to wa tsui si ɔ, lɔ ɔ tsɔɔ kaa wa ji Kristofo li nɛ wa nane pi si ngɛ Mawu jami mi, nɛ wa suɔ wa sibi.—Yoh. 13:35.

◼ Níhi A Se Yami: Wa kpa nyɛ pɛɛ nɛ nyɛ ko ngmɛɛ nyɛ bimɛ tsɔwi ɔmɛ a he nɛ a ya hi fiɛe ngɛ níhi a se yami he ɔ nɔ be mi nɛ kpe ɔ ngɛ nɔ yae ɔ. Ke jokuɛ ko maa ya níhi a se yami he ɔ nɔ ɔ, nyɛɛ hyɛ konɛ nɔ ko nɛ wa nɛ e piɛɛ e he kɛ ya.

◼ Womi Nɛ A Kɛ Hlaa Nɔ Se Blɔ (S-43): Ke wa ya kpe ɔ nɛ wa ye nɔ ko odase nɛ e bua jɔ munyu ɔ he ɔ, e sa nɛ waa ngɔ womi nɛ ji Please Follow Up (S-43) kɛ ngma e he sanehi. Ke o ngma womi ɔ nɔ ní ta a, o ma nyɛ maa ngɔ kɛ ya Womi Ngɔmi He ɔ konɛ a tsu he ní, aloo o ma nyɛ maa ngɔ kɛ ha nyɛ asafo mi womi ngmalɔ ɔ ke nyɛ kpale nyɛ se kɛ ho nyɛ asafo ɔ mi ya.

◼ Ní Yemi Hehi: Moo wo Yehowa biɛ ɔ hɛ mi nyami kɛ gu su kpakpa kpo nɛ o ma je ngɛ ní yemi hehi ɔ nɔ. E sa nɛ o he dlami ɔ nɛ pee nɔ́ nɛ sa Kristofo no. Mo si nike ní kɛ ha ní tsuli ɔmɛ ke a pɔɔ jã peemi ngɛ he nɛ o ya a.

◼ Hwɔ He:

Ke nyɛ ya ba he ko nɛ nyɛ maa wo he hiɔ ɔ, wa kpa nyɛ pɛɛ nyɛ ko ha nɛ nihi fuu nɛ hi tsu ɔ mi pe bɔ nɛ a ngmɛ blɔ.
Ke nyɛ ya to ni komɛ a we mi ɔ, nyɛɛ pee falifali, nyɛɛ pee nyɛ ní pɛpɛɛpɛ nɛ nyɛ je hɛsa kpo ngɛ níhi nɛ a ma ha nyɛ ɔ a he.
E sɛ nɛ nyɛmimɛ nyumuhi kɛ yihi nɛ hwɔ tsu kake mi, ja a je weku kake mi.
Nyɛ ko hoo ní ngɛ tsu nɛ a ngmɛ́ blɔ kaa a hoo ní ngɛ mi ɔ mi.
Bɔ nɛ pee nɛ waa tsɔɔ kaa wa ngɛ jemiba kpakpa a, nyɛ ko du nyɛ he ngɛ kpo nɔ. Ke hedu he be ɔ, nyɛ ma nyɛ maa ngɔ sa loo bo kɛ pee hedu he.
Kaa Kristofohi ɔ, e sɛ nɛ waa ngɔ níhi nɛ a to he blɔ nya kɛ ha nibwɔhi ɔ kɛ be nɔ.
Nyɛ je mumi ɔ yiblii ɔ kpo ngɛ bɔ nɛ nyɛɛ kɛ ní tsuli ngɛ nibwɔhi a to he loo weku nɛ nyɛ ya to ɔ mi bi ɔmɛ maa hi si ha a mi.
E sa nɛ fɔli a hɛ nɛ hi a bimɛ a he be tsuaa be ngɛ he nɛ a ma ya to ɔ.
Ke haomi ko ba ngɛ he nɛ nyɛ ya to ɔ, nyɛɛ bɔ mɔde kaa nyɛ ma wo Ní Tsumi He Nɛ Hyɛɛ Hwɔ He Nɔ ɔ a tue nɔ.

◼ Nihi Nɛ A Kɛ A He Ha Kaa A Ma Tsu Ní: Nihi nɛ a suɔ kaa a ma tsu ni ngɛ kpe ɔ sisi ɔ nɛ a ya Volunteer Service Department ngɛ kpe ɔ sisi ɔ. Jokuɛwi nɛ a yí jeha 16 lolo ɔ ma nyɛ maa piɛɛ a fɔli, nihi nɛ hyɛɛ a nɔ, loo nihi nɛ a wa nɛ́ a fɔli le mɛ ɔ a he kɛ tsu ní. E sa nɛ ní tsumi nɔ hyɛli ɔmɛ nɛ a gu kpokpa a blɔ nya tomi ɔ nɔ kɛ hla nihi fuu loko kpe ɔ nɛ su.