Kpokpa Nɔ Kpe He Kaimihi
Blɔ Nya Tomi Be Ɔmɛ: Ngɛ ligbi etɛ ɔ tsuo mi ɔ, a maa je la nɛ a maa fia kɛ bli kpe ɔ nya a sisi mɔtu ngmlɛ 9:20. Ngɛ jamɛ a be ɔ mi ɔ, e sa nɛ wɔ tsuo wa ya hi si konɛ waa je blɔ nya tomi ɔ sisi ngɛ blɔ nɛ sa nɔ. Ngɛ Soha kɛ Hɔ ɔ, a ma kpa kpe ɔ gbɔkuɛ ngmlɛ 5:00, nɛ Hɔgba hu a ma kpa gbɔkuɛ ngmlɛ 4:00.
‘Mo La Kɛ Je Yehowa Yi’: Kɛ je blema lokoo ɔ, Mawu we bi laa kɛ jeɔ Yehowa yi. Mwɔnɛ ɔ hu ɔ, lahi a he hia wawɛɛ ngɛ wa Mawu jami mi. (La 28:7) Ngɛ kpokpa nɔ kpehi a sisi ɔ, a fiaa la bɔɔ loko mɔtu kɛ piani blɔ nya tomi ɔ jeɔ sisi. Pi kaa a po la nɛ ɔmɛ konɛ a fia kɛ bli kpe ɔ nya kɛkɛ, se a je blɔ nɛ a po konɛ waa kase nɛ wa kɛ je Mawu yi. Enɛ ɔ he ɔ, ke sɛnɔhilɔ ɔ fɔ wɔ nine kaa waa hi si nɛ waa bu la amɛ tue ɔ, e sa nɛ waa kɛ hɛsa nɛ pee jã mohu pe nɛ wa maa hi ní sɛɛe. Jã a nɛ wa maa pee ɔ tsɔɔ kaa wa hɛ sa dengme nɛ nyɛmimɛ gbo kɛ po la amɛ ɔ he. Nyɛmimɛ nyumuhi kɛ yihi komɛ woɔ mɛ nitsɛmɛ a blɔ hiami he hiɔ kɛ yaa Patterson ngɛ New York si enyɔ daa jeha nɛ a ya poɔ la ngɔngɔɛhi nɛ haa nɛ wa bua jɔɔ. Ke a fia la nɛ a kɛ bliɔ kpe ɔ nya a ta, nɛ a de wɔ ke waa te si nɛ wa la Matsɛ Yemi la a eko ɔ, e sa nɛ wa la kɛ bua jɔmi kɛ je Yehowa yi.
Lɔle Mami He: Ke pi hiɔ sane loo si fɔfɔɛ kpa ko nɛ e he hia wawɛɛ ɔ, lɛɛ e maa hi kaa wa maa hi si ngɛ kpe ɔ sisi nɛ waa bu munyu ɔ tue, mohu pe nɛ wa ma ya hi lɔle mi, ejakaa wa juɛmi ma nyɛ maa je munyu ɔ nɔ, loo wa maa hwɔ mahe. Ke wa hi kpe ɔ sisi, nɛ wa bu munyu ɔmɛ tue saminya a, lɔ ɔ tsɔɔ kaa wa ngɛ hɛsa kɛ ha mumi mi niye ní kpakpahi nɛ Yehowa to he blɔ nya ha wɔ ɔ. Akɛnɛ lɔle mami he ɔmɛ klee we he je ɔ, ke e maa hi ɔ, e sa nɛ nihi nɛ pee kake kɛ hi lɔle kake mi kɛ ya kpe ɔ.
Sɛ Nɛ A Maa Nu Kɛ Fɔ Si: Nyɛ ma nyɛ maa nu blɔ kɛ ha nihi nɛ nyɛɛ kɛ mɛ je we kake mi loo nihi nɛ nyɛɛ kɛ mɛ sɛ lɔle kake mi loo nyɛ Baiblo mi ní kaseli pɛ. Wa kpa mo pɛɛ nɛ o ko ngɔ níhi kɛ fɔ sɛhi nɛ nɔ ko be nɔ hii ɔ nɔ. Enɛ ɔ maa ye bua nɛ ni kpahi maa na he nɛ blɔ ngɛ nɛ a ma nyɛ maa hi. A to sɛ klɛdɛɛ he blɔ nya kɛ ha nihi nɛ a wa ngɛ jeha mi kɛ nihi nɛ a be he wami ɔ. Akɛnɛ sɛhi bɔɔ pɛ lɛ ngɛ lejɛ ɔ he je ɔ, nɔ kake loo nihi enyɔ pɛ lɛ a ma nyɛ maa hi a he ngɛ lejɛ ɔ.
Tade Nɛ Sa Womi: E sa nɛ tade nɛ wa maa wo kɛ ya kpe ɔ nɛ pee nɔ́ nɛ sa nɛ bu ngɛ he, pi kaa nɔ́ nɛ a pɔɔ womi ngɛ je ɔ mi ɔ. (1 Tim. 2:9) Ke wa ya nibwɔhi a hwɔ he loo wa ngɛ wa he mi jɔɔe loko a maa je kpe ɔ sisi loo benɛ a kpa a, e sɛ nɛ wa he dlami nɛ pee eko kɛ eko kɛkɛ. Ke wa dla wa he saminya a, e be yee ha wɔ kaa wa maa ma wa baaji ɔ ngɛ wa gugue nya, nɛ e be wɔ zo pee kaa wa maa ye nihi odase ke wa ná he blɔ. Ke wa ya kpe ɔ, wa he nɛ wa ma dla saminya, kɛ je mi bami kpakpa kpo nɛ wa ma je ɔ maa gbla nihi nɛ a hɛɛ tsui kpakpa a kɛ ba yi wami hemi munyu nɛ ngɛ Baiblo ɔ mi ɔ he, nɛ e ma ha Yehowa bua maa jɔ.—Zef. 3:17.
Klamahi Nɛ Waa Kɛ Ma Tsu Ní Ngɛ Nile Mi: E sa nɛ o bɔ mɔde nɛ o susu ni kpahi a he, nɛ o hyɛ nɛ o mobile phone ɔ ko pɛ, loo e kó hao nihi be mi nɛ kpe ɔ ngɛ nɔ yae ɔ. Ke o kɛ foni pomi klama ko ma tsu ní ɔ, e sa nɛ o susu ni kpahi a he nɛ o kó tsi a hɛ mi. Jehanɛ ɔ hu ɔ, ke wa susuɔ ni kpahi a he ɔ, wa be sɛ gbi manee ngɛ wa phone nɔ kpamkpam be mi nɛ kpe ɔ ngɛ nɔ yae ɔ.
Piani Niye Ní: Wa kpa nyɛ pɛɛ nɛ nyɛɛ ngɔ ní nɛ nyɛ maa ye piani kɛ ba, mohu pe nɛ nyɛ maa je kpe ɔ sisi kɛ ya he niye ní ngɛ he jɔɔmi be ɔ mi. Nyɛ ko ngɔ ní nguahi nɛ a kɛ niye ní woɔ mi, loo níhi nɛ ma nyɛ maa ywia kɛ ba kpe ɔ.
Yemi Kɛ Buami: Wa ma nyɛ ma ha yemi kɛ buami ngɛ kpe ɔ sisi konɛ a kɛ fĩ je kɛ wɛ ní tsumi ɔ se kɛ tsɔɔ kaa wa ngɛ hɛsa ha kpe ɔ blɔ nya tomi ɔ. Ke nyɛ maa gu check nɔ kɛ ha yemi kɛ buami ɔ, nyɛɛ ngma kaa a kɛ ha “Watch Tower.”
Tsopa Ngɔmi: Ke o ngɛ tsopa pɔtɛɛ ko nɛ o nuɔ daa a, wa kpa mo pɛɛ nɛ o ngɔ bɔ nɛ maa su mo kɛ ba kpe ɔ ejakaa eko be tsopa ngɔmi he ɔ hie ngɛ kpe ɔ sisi.
Wa He Nɔ Nɛ Wa Maa Hyɛ Saminya: Wa kpa nyɛ pɛɛ nɛ nyɛ hɛ nɛ hi níhi nɛ ma ha nɛ nyɛ maa sane si loo nyɛ tɛ si ɔ a he konɛ nyɛ ko plaa. Daa jeha a, nihi nɛ a plaa a fuu jee tokota nɛ a woɔ ɔ, titli ɔ tokota gagaa. E hi wawɛɛ kaa wa maa wo tokota nɛ sa konɛ wa nyɛ nɛ waa kuɔ atlaakpehi, loo wa nyɛ nɛ waa nyɛɛ dadehi nɛ puɔ ngɛ a mi nɛ a kɛ tsiɔ muɔhi a nya a nɔ, kɛ he kpahi slɔkee.
Oslaahi Kɛ Hiɔ Nɛ Fiaa Nɔ Tlukaa: Ke nɔ ko plaa loo hiɔ fia nɔ ko tlukaa ngɛ kpe ɔ sisi ɔ, wa kpa nyɛ pɛɛ nɛ nyɛ de nibwɔhi a kpeeli ɔmɛ a kpɛti nɔ kake, konɛ e ya wo nyɛmimɛ nɛ a tsuɔ ní ngɛ Tsopa Ngɔmi He ɔ a tue nɔ amlɔ, nɛ a ba hyɛ nɛ a tsu haomi ɔ he ní.
Falifali Peemi: Nɔ tsuaa nɔ nɛ ba kpe ɔ blɔ nya ní tsumi ji kaa e ma dla he nɛ e hi ɔ ke e ye ní ta. Akɛnɛ a ngɔ níhi nɛ a kɛ dwɔmi woɔ mi kɛ ma kpe ɔ sisi he je ɔ, wa kpa nyɛ pɛɛ nɛ nyɛɛ ngɔ pepa, niye ní, hlɔba nɛ a kɛ fiɔ nyu, kɛ dwɔmi kpahi kɛ wo ní ɔmɛ a mi. Ke wa pee jã a, lɔ ɔ tsɔɔ kaa wa ji nihi nɛ a he tsɔ.
Níhi A Se Yami: Wa kpa nyɛ pɛɛ nɛ nyɛ ko ngmɛɛ nyɛ bimɛ tsɔwi ɔmɛ a he nɛ a ya hi fiɛe ngɛ níhi a se yami he ɔ be mi nɛ kpe ɔ ngɛ nɔ yae ɔ. Ke jokuɛ ko maa ya níhi a se yami he ɔ, nyɛɛ hyɛ konɛ nɔ ko nɛ wa nɛ e piɛɛ e he kɛ ya.
Womihi Nɛ A Ma Je Kpo: Mawu Munyu ɔ wo wɔ ga ke “nyɛɛ kɛ suɔmi nɛ pee nɔ́ tsuaa nɔ́.” (1 Kor. 16:14) Akɛnɛ wa ngɛ suɔmi nɛ wa susuɔ ni kpahi a he he je ɔ, ke a je womi ko kpo ngɛ kpe sisi ɔ, e sɛ nɛ waa tu fo, nɛ waa tsitsɛɛ nihi bɔ nɛ pee nɛ wa nine nɛ su womi ɔmɛ a nɔ kekle. Ke wa ye wa he nɔ, nɛ wa to wa tsui si ɔ, lɔ ɔ tsɔɔ kaa wa ji Kristofohi nɛ a nane pi si ngɛ Mawu jami mi, nɛ wa suɔ a sibi.—Yoh. 13:35.
Womi Nɛ A Kɛ Hlaa Nɔ Se Blɔ (S-43): Ke wa ya kpe ɔ nɛ wa ye nɔ ko odase nɛ e bua jɔ munyu ɔ he ɔ, e sa nɛ waa ngma nɔ ɔ he sanehi ngɛ Please Follow Up (S-43) womi ɔ nɔ. Ke o ngma womi ɔ nɔ ní ta a, o ma nyɛ maa ngɔ kɛ ya Womi Ngɔmi He ɔ konɛ a tsu he ní, aloo o ma nyɛ maa ngɔ kɛ ha nyɛ asafo mi womi ngmalɔ ɔ ke nyɛ kpale nyɛ se kɛ ho nyɛ asafo ɔ mi ya.
Ní Yemi Hehi: Moo wo Yehowa biɛ ɔ hɛ mi nyami kɛ gu su kpakpa kpo nɛ o ma je ngɛ ní yemi hehi ɔ nɔ. E sa nɛ o he dlami ɔ nɛ pee nɔ́ nɛ sa Kristofo no. Mo si nike ní kɛ ha ní tsuli ɔmɛ ke a pɔɔ jã peemi ngɛ he nɛ o ya a.
Hwɔ He:
Ke nyɛ ya ba he ko nɛ nyɛ maa wo he hiɔ ɔ, wa kpa nyɛ pɛɛ nyɛ ko ha nɛ nihi fuu nɛ hi tsu ɔ mi pe bɔ nɛ a ngmɛ blɔ.
Ke nyɛ ya to ni komɛ a we mi ɔ, nyɛɛ pee falifali, nyɛɛ pee nyɛ ní pɛpɛɛpɛ nɛ nyɛ je hɛsa kpo ngɛ níhi nɛ a ma ha nyɛ ɔ a he.
E sɛ nɛ nyɛmimɛ nyumuhi kɛ yihi nɛ hwɔ tsu kake mi, ja a je weku kake mi.
Nyɛ ko hoo ní ngɛ tsu nɛ a ngmɛ́ blɔ kaa a hoo ní ngɛ mi ɔ mi.
Bɔ nɛ pee nɛ waa tsɔɔ kaa wa ngɛ je mi bami kpakpa a, nyɛ ko du nyɛ he ngɛ kpo nɔ. Ke hedu he be ɔ, nyɛ ma nyɛ maa ngɔ sa loo bo kɛ pee hedu he.
Kaa Kristofohi ɔ, e sɛ nɛ waa ngɔ níhi nɛ a to he blɔ nya kɛ ha nibwɔhi ɔ kɛ be nɔ.
Nyɛ je mumi ɔ yiblii ɔ kpo ngɛ bɔ nɛ nyɛɛ kɛ ní tsuli ngɛ nibwɔhi a to he loo weku nɛ nyɛ ya to ɔ mi bi ɔmɛ maa hi si ha a mi.
E sa nɛ fɔli a hɛ nɛ hi a bimɛ a he be tsuaa be ngɛ he nɛ a ma ya to ɔ.
Ke haomi ko ba ngɛ he nɛ nyɛ ya to ɔ, nyɛɛ bɔ mɔde kaa nyɛ ma wo Ní Tsumi He Nɛ Hyɛɛ Hwɔ He Nɔ ɔ a tue nɔ.
Nihi Nɛ A Kɛ A He Ha Kaa A Ma Tsu Ní: Nihi nɛ a suɔ kaa a ma tsu ní ngɛ kpe ɔ sisi ɔ nɛ a ya Volunteer Service Department ngɛ kpe ɔ sisi ɔ. Jokuɛwi nɛ a yí jeha 16 lolo ɔ ma nyɛ maa piɛɛ a fɔli, nihi nɛ hyɛɛ a nɔ, loo nihi nɛ a wa nɛ́ a fɔli le mɛ ɔ a he kɛ tsu ní. E sa nɛ ní tsumi nɔ hyɛli ɔmɛ nɛ a gu blɔ nya tomi nɛ a kɛ hlaa nihi ngɛ kpɔ ɔ mi ɔ nɔ kɛ hla nihi fuu loko kpe ɔ nɛ su.