Moo Ye Bua Nihi Nɛ A Bua Be Baiblo Tsɔɔmi Womi ɔ He Jɔe ɔ
1. Anɛ nɔ tsuaa nɔ nɛ e bua maa jɔ Baiblo Tsɔɔmi womi ɔ he lo? Moo tsɔɔ nya.
1 Loko nɔ ko ma ba pee Yehowa sɔmɔlɔ ɔ, ja e kase nɔ́ nɛ Baiblo ɔ tsɔɔ ɔ. Se ni komɛ ngɛ nɛ pi Kristofoli ji mɛ, nɛ a nɛ́ Baiblo ɔ kaa e ji Mawu Munyu. Ni komɛ hu he we yi kaa Mawu ngɛ, nɛ lɔɔ he ɔ, a be bu kɛ ha Baiblo ɔ. Mɛni waa kɛ maa ye bua nihi nɛ a bua jɔɛ Baiblo Tsɔɔmi womi ɔ he ɔ? A kɛ ga womihi nɛ nyɛɛ se nɛ ɔ da nɔ́ nɛ fiɛɛli nɛ a je mahi 20 a nɔ ɔ de ɔ nɔ.
2. Ke nɔ ko de wɔ ke e he we yi kaa Mawu ngɛ ɔ, mɛni nɛ e sa kaa waa bɔ mɔde nɛ waa le ngɛ he, nɛ mɛni heje?
2 Nihi Nɛ A He We Yi Kaa Mawu Ngɛ: Ke nɔ ko de ke e he we yi kaa Mawu ngɛ ɔ, e sa nɛ o bi lɛ nɔ heje nɛ e de jã a. Anɛ su tsakemi tsɔɔmi ɔ lɛ ha nɛ e he we yi kaa Mawu ngɛ ɔ lo? Anɛ dami sane nɛ a yi ngɛ je ɔ mi, loo osato nɛ ngɛ jami mi ɔ lɛ ha nɛ e he we yi kaa Mawu ngɛ ɔ lo? Ngɛ ma nɛ e je mi ɔ mi ɔ, anɛ a he we yi kaa Mawu ngɛ lo? Eko ɔ, pi kaa e he we Mawu yi kulaa, se pe e nui he kaa e sa nɛ e ná hemi kɛ yemi ngɛ Mawu mi. Fiɛɛli fuu na kaa ke a bi nɔ ɔ ke, “Anɛ jã ji bɔnɛ o heɔ yeɔ daa lo?” ɔ, e haa nɛ nɔ ɔ tsɔɔ nya. Moo bu nɔ ɔ tue, nɛ o ko po e munyu ɔ mi. Ke wa le nɔ́ heje nɛ nɔ ko he we yi kaa Mawu ngɛ ɔ, wa maa le bɔnɛ wa ma ha lɛ heto ha, kɛ womi nɛ waa kɛ ma ha lɛ.—Abɛ 18:13.
3. Mɛni blɔ nɔ wa ma nyɛ maa gu kɛ je bu kpo kɛ tsɔɔ nɔ ko, kɛ níhi nɛ e heɔ yeɔ?
3 Ke o ngɛ nɔ ɔ heto hae ɔ, moo hyɛ saminya nɛ o ko ha nɛ e nu he kaa o ngɛ munyu tue kɛ ngɛ nɔ́ nɛ e de ɔ sie. Ga womi nɛ ɔ je United States: “E sa nɛ waa nu sisi kaa, nɔ tsuaa nɔ ngɛ he blɔ kaa e maa hla nɔ́ nɛ e suɔ kaa e ma he ye. E sɛ nɛ waa kɛ mɛ nɛ je atsinyɛ kaa wa ma ha nɛ a na kaa nɔ́ nɛ wa ngɛ dee ɔ da, mohu ɔ, e sa nɛ wa bi mɛ sanehi nɛ ma ha nɛ a susu níhi a he konɛ mɛ nitsɛmɛ a hla nɔ́ nɛ a suɔ.” Nɔ́ nɛ kpokpa ngua nɔ hyɛlɔ ko pɔɔ peemi ji, ke nihi tsɔɔ a juɛmi ta a, e biɔ mɛ ke, “Nɔ́ nɛ o de nɛ ɔ, anɛ o susu he hyɛ kaa e ma nyɛ maa pee anɔkuale, nɛ e ma nyɛ maa pee lakpa lo?”
4. Mɛni blɔ nɔ wa maa gu kɛ ye bua Buddha jami ɔ mi bi?
4 Buddha jami ɔ mi bi fuu li Mawu he nɔ́ ko kulaa. Fiɛɛli komɛ nɛ a ngɛ Britain ɔ suɔ kaa a maa ngɔ Lasting Peace and Happiness—How to Find Them womiyo ɔ kɛ fiɛɛ kɛ ha mɛ. Ke a kɛ wetsɛ ɔ susu womi ɔ nya bli munyu ɔ he ta a, a kɛ lɛ susuɔ fã nɛ ji, “Is There Really a Most High Creator?” kɛ “A Guidebook for the Blessing of All Mankind” ɔ he. Lɔɔ se ɔ, a nyɛɔ nɛ a kɛ Baiblo Tsɔɔmi womi ɔ haa wetsɛ ɔ nɛ a deɔ lɛ ke, “Ke o he we yi kaa Mawu ngɛ po ɔ, Baiblo ɔ nɛ o maa kase ɔ maa ye bua mo ejakaa blɔ tsɔɔmi kpakpahi ngɛ mi.” Blɔ gbalɔ ko nɛ e ngɛ United States, nɛ e fiɛɛɔ kɛ haa nihi nɛ a tuɔ China gbi ɔ de ke: “Nihi fuu nɛ a ngɛ wa zugba kpɔ ɔ mi ɔ suɔ ní kanemi. Enɛ ɔ he ɔ, behi fuu ɔ, a kaneɔ womi nɛ wa haa mɛ ɔ tsuo loko wa kpaleɔ ya slaa mɛ. Se eko ɔ, a li bɔnɛ Baiblo mi nikasemi ngɛ ha. Enɛ ɔ he ɔ, i suɔ kaa ma ha nihi Sane Kpakpa womiyo ɔ ngɛ kekleekle ligbi nɛ i ya slaa mɛ ɔ nɔ, ejakaa bɔnɛ a ngma womiyo ɔ ha a ha nɛ e yi kaa i kɛ nɔ ko maa sɛɛ mi ní.” Kpokpa nɔ hyɛlɔ ko nɛ e ngɛ sɔmɔe ngɛ United States kpokpa ko nɛ a tuɔ China gbi ngɛ mi ɔ de kaa fiɛɛli ma nyɛ ma ha nihi Baiblo Tsɔɔmi womi ɔ ngɛ kekleekle ligbi nɛ a kɛ nɔ ko sɛɛ ní ɔ nɔ. Se e maa hi kaa a maa je nikasemi ɔ sisi ngɛ yi 2 nɛ tu Baiblo ɔ he munyu ɔ nɔ mohu pe nɛ a maa kase yi 1 nɛ tu Mawu he munyu ɔ.
5. Mɛni heje nɛ tsui si tomi he hia a?
5 E heɔ be loko nɔ ko ma ná Mawu mi hemi kɛ yemi, lɔɔ he ɔ, e sa nɛ wa ná nihi a he tsui. Eko ɔ, ní nɛ waa kɛ nɔ ko sɛɛ ngɛ kekle ligbi nɛ wa ya slaa lɛ ɔ nɔ ɔ pɛ be hae nɛ e kplɛɛ nɔ kaa Bɔlɔ ko ngɛ. Se eko ɔ, nyagbenyagbe ɔ, nɔ ɔ ma nyɛ ma ba kplɛɛ nɔ kaa nɔ́ nɛ wa ngɛ dee ɔ ji anɔkuale, aloo e ma nyɛ ma de kaa e nu nɔ́ heje nɛ ni komɛ he ye kaa Mawu ngɛ ɔ sisi.
6. Mɛni heje nɛ ni komɛ a bua jɔɛ Baiblo ɔ he ɔ?
6 Nihi Nɛ A Bua Jɔɛ Baiblo ɔ He Loo A He We Baiblo ɔ Yi: Be komɛ ɔ, nɔ ko maa kplɛɛ nɔ kaa eko ɔ Mawu ngɛ, se e bua jɔɛ nɔ́ nɛ Baiblo ɔ tsɔɔ ɔ he, ejakaa e he we yi kaa e ji Mawu Munyu. Eko ɔ, e ngɛ ma nɛ a pi Kristofoli, nɛ a buɔ Baiblo ɔ kaa e ji Kristofoli a womi ɔ mi. Aloo eko ɔ, e ngɛ Kristofoli a ma, nɛ je nɛ ɔ mi níhi a se dimi ha nɛ a nɛ́ se nami nɛ ngɛ Baiblo ɔ he ɔ mi. Mɛni blɔ nɔ wa maa gu kɛ ye bua nihi kaa jã nɛ a bua nɛ jɔ Baiblo ɔ he, konɛ a ha he blɔ nɛ waa kɛ mɛ nɛ kase Baiblo Tsɔɔmi womi ɔ?
7. Mɛni ji blɔ nɛ hi nɛ wa ma nyɛ maa gu nɔ kɛ ha nɛ nihi a bua nɛ jɔ Baiblo ɔ he?
7 Asafo ɔ nítsumi he kɔni nɛ ngɛ Greece ɔ ngma ke: “Blɔ nɛ hi pe kulaa nɛ wa maa gu nɔ kɛ ye bua nihi nɛ a bua jɔɛ Baiblo ɔ he ji kaa wa ma bli Baiblo ɔ, nɛ waa tsɔɔ mɛ níhi nɛ ngɛ mi. Fiɛɛli fuu yɔse kaa Baiblo ɔ mi munyu ɔmɛ náa nihi a nɔ he wami pe nɔ́ ko nɛ mɛ nitsɛmɛ a ma de kɛ je a yi mi. (Heb. 4:12) Mawu biɛ ɔ nɛ nihi na ngɛ Baiblo ɔ mi ɔ ye bua a kpɛti nihi fuu nɛ a bua jɔ he kaa a maa kase Baiblo ɔ.” Asafo ɔ nítsumi he kɔni nɛ ngɛ India a ngma ke: “Anɔkuale nɛ kɔɔ wami kɛ gbenɔ he, kɛ jehanɛ ɔ hu Baiblo ɔ si womi kaa je ehe maa ba nɛ a be nihi a mi gbae ɔ tleɔ Hindubi fuu a bua jɔmi si nɛ a kɛ mɛ sɛɛ ní.” Ke fiɛɛli tu níhi nɛ gbaa ni ɔmɛ a nya a he munyu ɔ, e haa nɛ a náa he blɔ nɛ a deɔ ni ɔmɛ nɔ́ nɛ Baiblo ɔ tsɔɔ kaa Mawu Matsɛ Yemi ɔ ma ba pee.
8. Mɛni wa ma nyɛ ma de nihi nɛ lakpa Kristofoli ha nɛ a ná juɛmi nɛ dɛ ngɛ Baiblo ɔ he ɔ?
8 Ke nɔ ko ná juɛmi nɛ dɛ ngɛ Baiblo ɔ he ngɛ lakpa Kristofoli a heje ɔ, ha nɛ e le kaa lakpa Kristofoli nɛ ɔmɛ plɛ Baiblo ɔ mi munyu ɔ kɛ e mi tsɔɔmi ɔmɛ a hɛ mi kɛ bu si. Asafo ɔ nítsumi he kɔni nɛ ngɛ India a ngma ke: “Be komɛ ɔ, e biɔ nɛ waa ye bua ni kakaakahi nɛ a le kaa Baiblo ɔ pi sɔlemi ɔmɛ a nɔ́.” A bɔ amaniɛ kaa behi fuu ɔ, Hindubi a bua jɔ What Is the Purpose of Life? How Can You Find It? womiyo ɔ fã 4 nɛ tsɔɔ bɔnɛ sɔlemi ɔmɛ bɔ mɔde kaa a ma kpata Mawu Munyu ɔ hɛ mi ɔ he wawɛɛ. Nɔ́ nɛ blɔ gbalɔ ko nɛ ngɛ Brazil ɔ deɔ nihi ji: “Moo kase munyuhi nɛ ngɛ Baiblo ɔ mi ɔ nɛ o hyɛ. Nihi fuu nɛ a be jami ko mi ɔ kɛ juɛmi nɛ da ngɛ jã pee. Níhi nɛ o maa kase ɔ maa pee mo nyakpɛ.”
9. Ke wa ya na nɔ ko, nɛ nɔ ɔ bua jɔɛ nɔ́ nɛ Baiblo ɔ tsɔɔ ɔ he ɔ, mɛni heje nɛ e sɛ kaa wa kɔni nɛ gbo ɔ?
9 Yehowa hyɛɛ nɔ tsuaa nɔ tsui mi. (1 Sam. 16:7; Abɛ 21:2) E ngɛ nihi nɛ a ngɛ tsui kpakpa a gblae kɛ ngɛ anɔkuale jami mi bae. (Yoh. 6:44) Tsui kpakpatsɛmɛ nɛ ɔmɛ a kpɛti nihi fuu li Mawu loo Baiblo ɔ he nɔ́ ko kulaa. Wa fiɛɛmi nítsumi ɔ bliɔ blɔ kɛ haa mɛ nɛ a “le anɔkuale ɔ, konɛ a he a yi wami.” (1 Tim. 2:4) Enɛ ɔ he ɔ, ke o ya na nɔ ko, nɛ nɔ ɔ bua jɔɛ nɔ́ nɛ Baiblo ɔ tsɔɔ ɔ he ɔ, o kɔni nɛ ko gbo! Moo ngɔ womihi nɛ eko ngɛ nyɛ je gbi mi ɔ kɛ tle e bua jɔmi si. Nyagbenyagbe ɔ, o ma nyɛ ma tsake ní sɛɛmi ɔ kɛ ya Mɛni Tutuutu Ji Baiblo ɔ Tsɔɔmi? womi ɔ nɛ waa kɛ peeɔ Baiblo mi nikasemi ɔ nɔ.
[Foni he ningma ngɛ bafa 4]
Ke wetsɛ ɔ he we yi kaa Mawu ngɛ ɔ, moo ka enɛ ɔ nɛ o hyɛ:
• Bi lɛ ke, “Anɛ jã ji bɔnɛ o heɔ yeɔ daa lo?” konɛ o na nɔ heje nɛ e de jã a.
• Ke e ji Buddha jami ɔ mi no ɔ, o kɛ lɛ nɛ susu Lasting Peace and Happiness—How to Find Them womiyo ɔ bafa 9-12 ɔ he.
• Ke e heɔ su tsakemi tsɔɔmi ɔ yeɔ ɔ, o kɛ lɛ ma nyɛ maa susu womi nɛ ɔmɛ a he:
Awake! mi munyu nɛ e yi ji, “Was It Designed?”
Video nɛ ji, The Wonders of Creation Reveal God’s Glory
A Satisfying Life—How to Attain It womiyo ɔ fã 4; Was Life Created?; kɛ The Origin of Life—Five Questions Worth Asking
• Ke dami sane nɛ a yi, kɛ nɔ́ nami heje nɛ nɔ ɔ he we Mawu yi ɔ, womihi nɛ nyɛɛ se nɛ ɔmɛ maa ye bua:
Womi nɛ ji, Is There a Creator Who Cares About You?, yi 10
Womiyohi nɛ ji, Does God Really Care About Us?, fã 6, kɛ What Is the Purpose of Life?, fã 6
• Ke o yɔse kaa wetsɛ ɔ ngɛ nae kaa eko ɔ, Mawu ngɛ ɔ, mo tsake kɛ ya Baiblo Tsɔɔmi womi ɔ nɔ nɔuu. E maa hi kaa o kɛ lɛ maa je sisi ngɛ yi 2 ɔ mi aloo o kɛ lɛ maa kase munyuyi kpa nɛ sa.
[Foni he ningma ngɛ bafa 5]
Ke wetsɛ ɔ he we Baiblo ɔ yi ɔ, moo ka enɛ ɔ nɛ o hyɛ:
• O kɛ lɛ nɛ susu womi nɛ ji, Life—How Did It Get Here? By Evolution or by Creation? ɔ yi 17 kɛ 18 ɔ he
• Ke Hinduno ɔ, moo ngɔ womiyo nɛ ji, Why Should We Worship God in Love and Truth? ɔ kɛ tsu ní
• Ke Yudano ɔ, moo ngɔ womiyo nɛ ji, Will There Ever Be a World Without War?, bafa 3-11 ɔ kɛ tsu ní.
• O kɛ nɔ ɔ nɛ susu se nami nɛ ngɛ Baiblo sisi tomi mlaahi a he ɔ he. Womihi nɛ o ma nyɛ kɛ maa tsɔɔ nɔ ko se nami nɛ ngɛ Baiblo ɔ he ji:
Awake! mi munyu nɛ e yi ji, “Help for the Family”
Video nɛ ji, The Bible—Its Power in Your Life
Womiyohi nɛ ji, Sane Kpakpa Nɛ Je Mawu Ngɔ!, ni kasemi 9 kɛ 11; A Book for All People, bafa 22-26; kɛ A Satisfying Life—How to Attain It, fã 2
Ke Buddhano ɔ, moo ngɔ womiyo nɛ ji, The Pathway to Peace and Happiness, bafa 3-7 ɔ kɛ tsu ní.
Ke Klamɔ jalɔ ɔ, moo ngɔ womiyo nɛ ji, Real Faith—Your Key to a Happy Life, fã 3 ɔ kɛ tsu ní.
Ke o ngɛ fiɛɛe ngɛ he nɛ nihi hɛɛ juɛmi nɛ dɛ ngɛ Baiblo ɔ he ɔ, e maa hi kaa o be ni ɔmɛ dee kaa nile munyu nɛ o ngɛ tue ɔ je Baiblo ɔ mi, ja o ya a ngɔ si abɔ.
• Moo tsɔɔ bɔnɛ Baiblo gbamihi ba mi ha. Womihi nɛ o ma nyɛ kɛ ma tsu ní ji:
Video nɛ ji, The Bible—Accurate History, Reliable Prophecy
Womiyo nɛ ji, A Book for All People, bafa 27-29
• Ke nɔ ɔ bɔni sane nɛ kɔɔ níhi nɛ Baiblo ɔ tsɔɔ ngɛ munyuyi komɛ a he ɔ bimi ɔ, mo tsake kɛ ya Baiblo Tsɔɔmi womi ɔ nɔ nɔuu.
[Foni he ningma ngɛ bafa 6]
Ke wetsɛ ko de ke: “I he we yi kaa Mawu ngɛ” ɔ, o ma nyɛ ma de ke:
• “Anɛ o maa suɔ nɛ maa tsɔɔ mo nɔ́ nɛ ha nɛ i he ye kaa Bɔlɔ ko ngɛ ɔ lo?” Kɛkɛ ɔ, o kɛ lɛ nɛ susu munyuhi nɛ ngɛ Reasoning womi ɔ bafa 84-86 mi ɔ he, aloo moo to blɔ nya nɛ o ya ha lɛ wa womi ko nɛ o kane nɛ o bua jɔ he.
• “Se ke Mawu ko ngɛ ɔ, kɛ o maa suɔ nɛ e hi ha kɛɛ?” Wetsɛmɛ fuu deɔ kaa a maa suɔ Mawu nɛ e ngɛ suɔmi, nɛ e yeɔ dami sane, nɛ e mi mi hi, nɛ e hyɛ we nɔ hɛ mi. Kɛkɛ ɔ, moo tsɔɔ lɛ kɛ je Baiblo ɔ mi kaa Mawu ngɛ su nɛ ɔmɛ. (O ma nyɛ maa ngɔ Baiblo Tsɔɔmi womi ɔ yi 1 kɛ tsu ní, o ma nyɛ maa ngɔ kuku 6 kɛ je sisi.)
Ke wetsɛ ko de ke: “I he we Baiblo ɔ yi” ɔ, o ma nyɛ ma de ke:
• “Nihi fuu deɔ jã. Ni komɛ susuɔ kaa Baiblo ɔ kɛ adebɔ he nikasemi kɔ we aloo wa be nyɛe maa ngɔ Baiblo sisi tomi mlaahi kɛ tsu ní. I kpa mo pɛɛ, anɛ o kane Baiblo ɔ hyɛ lo? [Ngmɛɛ lɛ blɔ nɛ e ha heto. Lɔɔ se ɔ, moo ngɔ nya blimi munyuhi nɛ ngɛ womiyo nɛ ji, A Book for All People ɔ bafa 3 ɔ kɛ tsɔɔ lɛ, nɛ o kɛ womi ɔ nɛ ha lɛ.] Nihi fuu he we Baiblo ɔ yi ejakaa sɔlemi ɔmɛ plɛ Baiblo ɔ mi tsɔɔmi ɔ hɛ mi kɛ bu si. Be kpa ke i ba a, ma suɔ nɛ i kɛ mo nɛ susu enɛ ɔ he nɔ hyɛmi nɔ́ nɛ ngɛ bafa 4 kɛ 5 ɔ he.”
• “Nihi fuu hɛɛ susumi nɛ ɔ. Anɛ o maa suɔ nɛ ma tsɔɔ mo nɔ́ nɛ ye bua jɔ he ngɛ Baiblo ɔ he lo? [Kane Hiob 26:7 loo Yesaya 40:22, nɛ tsɔɔ kaa Baiblo ɔ da ngɛ adebɔ he ní kasemi nya a.] Munyuhi nɛ nile ngɛ mi nɛ maa ye bua wekuhi ngɛ Baiblo ɔ mi hulɔ. Be kpa ke i ba a, ma suɔ nɛ maa tsɔɔ mo eko.”
• “Mo tsu mi kaa o de mi. Ke niinɛ nɛ Mawu ngma womi kɛ ha adesahi ɔ, o susu kaa mɛni níhi nɛ maa hi womi ɔ mi?” Lɔɔ se ɔ, moo tsɔɔ lɛ nɔ́ ko nɛ kɔɔ heto nɛ e ma ha a he kɛ je Baiblo ɔ mi.