Fiɛɛmi Munyuhi

Nɛ a kɛ maa je Baiblo mi nikasemi sisi ngɛ kekleekle Hɔ nɛ ngɛ February nyɔhiɔ ɔ mi ɔ nɔ

“Nihi fuu susuɔ kaa Abosiami ji nɔ nɛ ha nɛ nɔ́ yayami ba je ɔ mi. Se a bi ɔ ke: ‘Jije Abosiami je kɛ ba? Anɛ Mawu nɛ bɔ lɛ lo?’ Kɛ o susu kɛɛ? [Ngmɛɛ lɛ blɔ nɛ e ha heto.] Mo kadi nɔ́ nɛ wa maa kane ngɛ hiɔ ɔ.” Ngɔɔ munyu nɛ ngɛ February 1 Hwɔɔmi Mɔ a se ɔ kɛ tsɔɔ lɛ, nɛ o kɛ lɛ nɛ susu kekle kuku ɔ kɛ ngmami nɛ a tsɛ se ɔ he. Ha lɛ womi tɛtlɛɛ ɔmɛ, nɛ o to blɔ nya nɛ o kpale ya slaa lɛ nɛ o kɛ lɛ nɛ susu sane bimi nɛ nyɛɛ se ɔ he.

The Watchtower February 1

“Wa suɔ nɛ waa le o juɛmi ngɛ nɔ ko nɛ Kristofoli, Yudabi, kɛ Klamɔ jali tsuo buɔ lɛ wawɛɛ ɔ he. Nɔ ɔ ji Mose. Ke o nu biɛ nɛ ɔ, mɛni lɛ baa o juɛmi mi? [Ngmɛɛ lɛ blɔ nɛ e ha heto.] E ngɛ mi kaa Mose pee tɔmihi mohu lɛɛ, se bɔnɛ Baiblo ɔ kale lɛ ha a ngɛ bua jɔmi. [Kane 5 Mose 34:10-12.] Womi tɛtlɛɛ nɛ ɔ tu e suhi etɛ a he munyu kɛ bɔnɛ wa ma plɛ kɛ kase lɛ ha.”

Awake! February

“Ligbi etɛ nɛ ɔ, nihi babauu jeɔ a mahi a nɔ kɛ ya hlaa si himi kpakpa ngɛ ma kpahi a nɔ. Anɛ o susu kaa be tsuaa be nɛ a nine ya suɔ nɔ́ nɛ a ngɛ hlae ɔ nɔ lo? [Ngmɛɛ lɛ blɔ nɛ e ha heto.] Blɔ hiami kɛ ya ma se ɔ ngɛ kɛ je blema. Mo kadi nɔ hyɛmi nɔ́ nɛ ɔ ngɛ Baiblo ɔ kekle womi ɔ mi. [Kane 1 Mose 46:5, 6.] Womi tɛtlɛɛ nɛ ɔ tu sane bimi nɛ ɔmɛ a he munyu.” Moo tsɔɔ wetsɛ ɔ sane bimihi nɛ ngɛ bafa 6 nyagbe ɔ.