Fiɛɛmi Munyuhi

Nɛ a kɛ maa je Baiblo mi nikasemi sisi ngɛ kekleekle Hɔ nɛ ngɛ May nyɔhiɔ ɔ mi ɔ nɔ

“Nɔ́ kake nɛ ngɛ adesahi a he ji kaa, wɔ tsuo wa tɔ̃ɔ. Anɛ o susu hyɛ kaa Mawu maa ngɔ wa he yayami nɛ hɛdɔ ngɛ he ɔ po kɛ pa wɔ lo?” [Ngmɛɛ lɛ blɔ nɛ e ha heto.] Moo tsɔɔ lɛ munyu nɛ ngɛ May 1 Hwɔɔmi Mɔ ɔ bafa 32 ɔ, nɛ o kɛ lɛ nɛ susu munyu nɛ ngɛ kekle sane bimi ɔ sisi ɔ he, nɛ ke e hí kulaa a, o kane ngmamihi nɛ a tsɛ se ɔ kake. O kɛ womi tɛtlɛɛ ɔmɛ nɛ ha lɛ nɛ o to blɔ nya nɛ o kpale ya slaa lɛ nɛ o kɛ lɛ nɛ susu sane bimi nɛ nyɛɛ se ɔ he.

Hwɔɔmi Mɔ May 1

“Wa suɔ nɛ waa le bɔnɛ o susu ngɛ munyu nɛ ɔ he ha. [Kane 1 Yohane 4:8.] Nihi fuu kplɛɛ munyu nɛ ɔ nɔ, se ni komɛ hu susu kaa Mawu yi mi wa, ejakaa a ke lɛ nɛ e ha nɛ adebɔ mi oslaahi baa, loo lɛ ji nɔ nɛ ngmɛ blɔ. Kɛ o susu kɛɛ? [Ngmɛɛ lɛ blɔ nɛ e ha heto.] Womi tɛtlɛɛ nɛ ɔ tsɔɔ yi mi tomi nɛ sisi numi ngɛ he heje nɛ e sɛ kaa waa kojo Mawu ngɛ blɔ nɛ dɛ nɔ kaa e yi mi wa.”

Awake! May

“Wa ngɛ nihi nɛ a ngɛ wa kpɔ ɔ mi ɔ slaae konɛ wa susu nyagba ko nɛ ngɛ nihi haoe ɔ he—nɛ ji awi yemi. Nihi fuu susu kaa ke polisihi a he hiɛ fuu ɔ, awi yemi se maa po. Kɛ o susu kɛɛ? [Ngmɛɛ lɛ blɔ nɛ e ha heto.] Anɛ o le kaa Baiblo ɔ gba kaa awi yemi maa ba nyagbe lo? [Kane La 37:10, 11.] A tsɔɔ munyu nɛ ɔ kɛ blɔ komɛ a nɔ nɛ wa maa gu kɛ po wa he piɛ ngɛ awi yemi he ɔ mi ngɛ womi tɛtlɛɛ nɛ ɔ mi.”