Níhi A Si Kpamihi

◼ Australia: John ji niheyo nɛ e le womi mi. Benɛ e ji jokuɛyo ɔ, e yaa sɔlemi, se benɛ e ba wa a, e “he we yi kulaa kaa Mawu ngɛ.” Blɔ gbalɔ ko ha lɛ Was Life Created? womiyo ɔ, nɛ lɔɔ se benɛ e kpale ya slaa lɛ ɔ, e ha lɛ Origin of Life womiyo ɔ. Blɔ gbalɔ ɔ ya nɔ nɛ e ha nɛ bua jɔmi nɛ John ná ngɛ munyu ɔ he ɔ ya hɛ mi kɛ gu womi tɛtlɛɛ ɔmɛ ehehi nɛ e ya haa lɛ ɔ nɔ. Ke blɔ gbalɔ ɔ kɛ womi tɛtlɛɛ ɔmɛ ya ha John ɔ, e gblaa John juɛmi kɛ yaa womi tɛtlɛɛ ɔ mi munyuhi nɛ kɔɔ adebɔ loo Baiblo mi gbamihi a he ɔ nɔ. Benɛ blɔ gbalɔ ɔ na kaa John suɔ kaa e maa kase ní babauu ɔ, e ha John womi nɛ ji, The Bible—God’s Word or Man’s? Benɛ John kane womi ɔ ta a, lɛ nitsɛ e de ke, “ye yi mi pee mi enyɔɔnyɔ bɔɔ.” Lɔɔ se ɔ, blɔ gbalɔ ɔ ha lɛ Baiblo Tsɔɔmi womi ɔ eko, nɛ e kɛ lɛ susu munyuhi nɛ ngɛ bafa 20 kuku 8 kɛ bafa 23-24 kuku 13-16 he. Ngmamihi nɛ a tsɛ se ngɛ kuku ɔmɛ a mi ɔ ta John tsui he wawɛɛ nɛ e de ke, “Eko ɔ, e sa nɛ ma kpale kase Baiblo ɔ ekohu.”

◼ Mexico: Nyumu ko de fiɛɛlɔ ko ke e he we yi kaa Baiblo ɔ je Mawu mumi mi. Fiɛɛlɔ ɔ de nyumu ɔ kaa e maa suɔ nɛ e tsɔɔ lɛ odase yemi nɛ tsɔɔ kaa Baiblo ɔ je Mawu mumi mi. Benɛ a kase Baiblo ɔ saii ɔ, ní kasemi ɔ bɔni nyumu ɔ nɔ he wami nami. Mawu mlaa amɛ nɛ e kase ɔ ji nɔ́ nɛ ná e nɔ he wami titli. Nyumu ɔ de fiɛɛlɔ ɔ ke: “Sisije ɔ, ke o kɛ mi kane Baiblo ɔ, e peeɔ mi kaa womi ko mi ga womi kɛkɛ, nɛ e ná we ye nɔ he wami. Se amlɔ nɛ ɔ, ke wa kane ɔ, e taa ye tsui he, titli ɔ, ga womi nɛ kɔɔ je mi bami he ɔ.”

◼ United States: Benɛ nyɛminyumu ko kɛ e yo ngɛ ma nɔ odase yemi klɛdɛɛ ngɛ ma ngua mi ɔ tsue ɔ, a kɛ yo ko nɛ je Taiwan sɛɛ ní. Yo ɔ he ye kaa Mawu ngɛ, se e susuɔ kaa Baiblo ɔ lɛɛ Amɛrikabi a nɔ. E ngɛ mi kaa yo ɔ ngɛ sika mohu lɛɛ, se e li yi mi tomi heje nɛ e ngɛ je mi. Lɔɔ he ɔ, e ya he nɛ a to womi ɔmɛ ngɛ ɔ kaa eko ɔ, Baiblo ɔ maa ye bua lɛ konɛ e le yi mi tomi heje nɛ e ngɛ je mi. Nɔ kɛ e yo ɔ kɛ lɛ bɔni Baiblo Tsɔɔmi womi ɔ kɛ womiyo nɛ ji, Lasting Peace and Happiness—How to Find Them ɔ kasemi. Jinɛ e sa kaa a kɛ yo ɔ ko kase Baiblo Tsɔɔmi womi ɔ yi 2 ɔ, se a kɛ lɛ susu womiyo ɔ mi munyu nɛ e yi ji, “A Guidebook for the Blessing of All Mankind.” (Blɔ Tsɔɔmi Womi Nɛ Ma Ha Nɛ A Jɔɔ Adesahi Tsuo) ɔ mohu he. Benɛ a kɛ yo ɔ susu munyuyi ɔ mi kuku ekpa a he ta a, e nya kpɛ e he ngɛ bɔnɛ e slo Baiblo ɔ ngɛ jami womi kpahi a he ɔ he. Benɛ a kɛ lɛ susu Baiblo ɔ mi gbamihi nɛ a ba mi ɔmɛ a he ɔ, e de ke, “Womi ko be nɛ ma nyɛ ma de ke e da kaa bɔnɛ Baiblo ɔ da a!”

◼ Japan: Wetsɛ ko de fiɛɛlɔ ko ke e he we yi kaa Mawu ngɛ, se fiɛɛlɔ ɔ pɔɔ wetsɛ ɔ ngɔ yami, nɛ e kɛ lɛ ya susuɔ Awake! ɔ mi munyu nɛ e yi ji, “Was It Designed?” (Anɛ Nɔ Ko Lɛ E Bɔ Lo?) ɔ he kpiti. Bɔɔbɔɔbɔɔ ɔ, wetsɛ ɔ tsake e juɛmi, nɛ e bɔni nɔ kplɛmi kaa eko ɔ, Bɔlɔ ko ngɛ. Amlɔ nɛ ɔ, wetsɛ ɔ he ye kaa Mawu ngɛ, nɛ fiɛɛlɔ ɔ kɛ lɛ ngɛ Sane Kpakpa Nɛ Je Mawu Ngɔ! womiyo ɔ kasee.

◼ Canada: Nyɛmiyo ko ha yo ko nɛ e je kpo kɛ je e we mi, nɛ e yaa sɛ e lɔle mi ɔ womi tɛtlɛɛ ɔ ehe nɛ ba a eko, nɛ yo ɔ ngɔ. Pee se benɛ nyɛmiyo ɔ kpale ya slaa lɛ ɔ, e de nyɛmiyo ɔ kaa e bua jɔɛ munyu ɔ he, nɛ e he ye kaa Mawu be. Nyɛmiyo ɔ ha we nɛ e kɔni mi nɛ jɔ, mohu ɔ, e to kaa pee se ɔ, e ma ba ha yo ɔ womiyo nɛ ji, A Satisfying Life—How to Attain It (Bɔnɛ O Maa Pee Nɛ O Ná Si Himi Nɛ Ngɛ Bua Jɔmi) ɔ eko. Benɛ nyɛmiyo ɔ ya na yo ɔ ngɛ we mi ɔ, e de yo ɔ ke, “i le kaa o he ye kaa Mawu be, se i ngɛ o he susue ejakaa i le kaa o ji fɔlɔ kake.” Nyɛmiyo ɔ kɛ yo ɔ susu womiyo ɔ bafa 4 kuku 6 nɛ tsɔɔ he nɛ e maa na ga womi kpakpa ngɛ ɔ he. Kɛkɛ nɛ nyɛmiyo ɔ wo yo ɔ he wami kaa e kane ní kasemi 2 nɛ kɔɔ bi tsɔsemi he ɔ. Yo ɔ bua jɔ wawɛɛ, nɛ e ngɔ womiyo ɔ.