Benɛ o ji jokuɛ ɔ, anɛ o nɔ si nɛ o plaa hyɛ lo? Eko ɔ, benɛ o ngɛ fiɛe ɔ, nɔ́ ko po mo nɛ o plaa. Anɛ o kai bɔ nɛ o yayo wo o bua ha a lo? Eko ɔ, e ngɔ tsopa kɛ to o pa a nɔ ha mo. Benɛ o ngɛ ya foe ɔ, e fua mo, nɛ e tu munyu ngɔngɔɛ kɛ wo o tue mi nɛ lɔ ɔ ha nɛ o bua jɔ. Jamɛ a be ɔ, e yi kaa o maa na nɔ ko nɛ maa wo mo bua.

Se ke wa ngɛ wae ɔ, waa kɛ nyagba slɔɔtohi nɛ a mi wa kpeeɔ. Be komɛ ɔ, waa kɛ nyagbahi nɛ a mi wa wawɛɛ kpeeɔ, nɛ e yee kaa ni kpahi maa wo wa bua. Nyagbahi nɛ nikɔtɔmahi kɛ kpee ɔ be gbɔjɔɔ, e be kaa nyagbahi nɛ a kɛ kpe benɛ a wɛ ɔ. Ha nɛ wa susu enɛ ɔ he nɔ hyɛmi níhi bɔɔ komɛ a he nɛ waa hyɛ.

• Anɛ o ní tsumi puɛ hyɛ lo? Nyumu ko nɛ a tsɛɛ lɛ ke Julian ɔ tsɔɔ kaa benɛ a fie lɛ ngɛ ní tsumi mi ɔ, e dɔ lɛ wawɛɛ nitsɛ. E bi e he ke, ‘Kɛ ma plɛ kɛ hyɛ ye weku ɔ nɔ ha kɛɛ? Ngɛ dengme nɛ i gbo kɛ tsu ní jeha babauu nɛ ɔ tsuo se ɔ, anɛ ye he be se nami hu lo?’

• Eko ɔ, o gba puɛ nɛ lɔ ɔ ha nɛ o pee basaa. Yo ko nɛ a tsɛɛ lɛ ke Raquel ɔ de ke, “Jeha kake kɛ fa ji nɛ ɔ nɛ ye huno ɔ je ye he. E dɔ mi wawɛɛ. I ye tsui hluu nɛ i nu hiɔ po. Si himi ɔ ha nɛ ye hɛ kɛ nɔ fɔmi tsuo ta.”

• Eko ɔ, hiɔ ko nɛ mi wa fia mo jeha babauu ji nɛ ɔ nɛ e hi tsami. Eko ɔ, e suu be komɛ nɛ e peeɔ mo kaa hɛ nɔ kami ko be hu. Benɛ Hiob nɛ hi si blema a kɛ si himi kaa jã kpe ɔ, e de ke: “Je mi si himi pee we mi akɔnɔ hu; i be si hie kɛ maa ya neneene.” (Hiob 7:16) Nyumu ko nɛ a tsɛɛ lɛ ke Luis nɛ e ye maa pee jeha 80 ɔ de ke, “Be komɛ ɔ, e peeɔ mi kaa ke i gbo mohu ɔ, jinɛ e hi.”

• Aloo eko ɔ, o suɔlɔ ko gbenɔ ha nɛ o ngɛ aywilɛho yee wawɛɛ. Nyumu ko nɛ a tsɛɛ lɛ ke Robert ɔ de ke, “Benɛ ye bi nyumu ɔ gbo ngɛ ɛloplee oslaa mi ɔ, sisije ɔ, i he we yi. Se bɔɔbɔɔbɔɔ ɔ, i bɔni aywilɛho yemi wawɛɛ. Dɔdɔɛ ɔ nya wa kaa nɔ́ nɛ a kɛ ha gbɔ ye mimi.”​—Luka 2:35.

Benɛ Robert, Luis, Raquel, kɛ Julian ya je si himi slɔɔtohi nɛ a mi wa nɛ ɔmɛ a mi ɔ, a ná bua womi. A ná bua womi nitsɛnitsɛ kɛ je Mawu Ope ɔ ngɔ. Mɛni blɔ nɔ Mawu guɔ kɛ woɔ nihi a bua? Anɛ e maa wo mo hu o bua lo?

Bɔfo Paulo tsɔɔ kaa Yehowaa ji ‘Mawu nɛ woɔ nɔ bua ngɛ nɔ́ tsuaa nɔ́ mi. E woɔ wa bua ngɛ haomihi tsuo a mi.’ (2 Korinto Bi 1:3, 4) Munyu nɛ ɔ maa nɔ mi kaa Mawu ma nyɛ maa ye bua nɔ tsuaa nɔ. Wa hiɔwe Tsɛ ɔ ma nyɛ maa wo wa bua ngɛ nyagba fɛɛ nyagba nɛ waa kɛ ngɛ kpee ɔ mi.

Ngɛ anɔkuale mi ɔ, ke wa suɔ nɛ Mawu nɛ wo wa bua a, lɛɛ e sa kaa waa pee nɔ́ ko. Kaa nɔ hyɛmi nɔ́ ɔ, ke wa be he wami nɛ wa yɛ hiɔ tsɔmi he ɔ, kɛ dɔkita a ma plɛ kɛ ye bua wɔ kɛɛ? Enɛ ɔ he ɔ, Ngmami ɔ de ke: “Nyɛɛ hɛ nyɛ kɛ su Mawu he, nɛ e maa hɛ lɛ kɛ su nyɛ he.”​—Yakobo 4:8.

Mɛni tsɔɔ kaa Mawu maa hɛ lɛ kɛ su wa he? Kekleekle ɔ, Mawu de wɔ si abɔ kaa e suɔ nɛ e ye bua wɔ. (Hyɛ daka nɛ e yi ji, Nɔ́ He Je Nɛ Wa Le Kaa Mawu Suɔ Nɛ E Wo Wa Bua.) Enyɔne, odase ngɛ nɛ tsɔɔ bɔ nɛ Mawu wo ni komɛ nɛ a hi si blema kɛ mwɔnɛ ɔ tsuo a bua ha.

Mwɔnɛ ɔ, nihi fuu sɔleɔ konɛ Mawu nɛ ye bua mɛ ngɛ nyagbahi nɛ a kɛ ngɛ kpee ɔ mi. Matsɛ David hu kɛ nyagbahi fuu kpe ngɛ e si himi mi. Be ko ɔ, e sɔle nɛ e de Yehowa ke, ke “i fa kue kɛ bi mo yemi kɛ buami ɔ, moo bu mi tue.” Anɛ Yehowa bu lɛ tue lo? Ee. Pee se ɔ, David de ke: “E piɛɔ ye he, nɛ e haa mi bua jɔmi.”​—La 28:2, 7.

NƆ́ NƐ YESU PEEƆ KƐ WOƆ NIHI NƐ A NGƐ KƆMƆ YEƆ A BUA

Mawu to kaa Yesu nɛ tsu ní tsumi klɛdɛɛ ko kɛ wo nihi a bua. Ní tsumihi nɛ Mawu kɛ wo Yesu dɛ ɔ ekomɛ ji kaa, e ye bua “nihi nɛ a ní ngɛ mɔbɔ,” nɛ e “wo kɔmɔ yeli a bua.” (Yesaya 61:1, 2) Kaa bɔ nɛ a gba kɛ fɔ si ɔ, Yesu ye bua nihi nɛ a ‘tloo tlomi nɛ pɔ tɔ mɛ’ ɔ.​—Mateo 11:28-30.

Yesu kɛ ga womi kpakpa ha nihi, e je mi mi jɔmi kpo, nɛ be komɛ po ɔ, e tsa nihi nɛ a be he wami ɔ. E gu blɔ nɛ ɔmɛ a nɔ kɛ wo a bua. Be ko ɔ, nyumu ko nɛ e ngɛ he womi nɔ hiɔ yaya nue ɔ kpa Yesu pɛɛ, nɛ e de ke: “Ke o suɔ ɔ, o ma nyɛ ha ye he nɛ tsɔ!” Yesu muklii mi sã lɛ ngɛ nyumu ɔ he nɛ e de lɛ ke: “I suɔ! O he nɛ tsɔ!” (Marko 1:40, 41) Kɛkɛ nɛ nyumu ɔ ná tsami.

Mwɔnɛ ɔ, Mawu Bi ɔ be zugba a nɔ nɛ e maa wo wa bua. Se e-Tsɛ Yehowa nɛ e ji “Mawu nɛ woɔ nɔ bua ngɛ nɔ́ tsuaa nɔ́ mi” ɔ, yaa nɔ nɛ e yeɔ buaa nihi tsuo nɛ a ngɛ haoe ɔ. (2 Korinto Bi 1:3) Ha nɛ wa susu blɔhi pɔtɛɛ eywiɛ komɛ a nɔ nɛ Mawu guu kɛ woɔ wa bua a he.

• Baiblo ɔ. “Nɔ́ tsuaa nɔ́ nɛ ngɛ ngmami ɔmɛ a mi ɔ, a ngma konɛ a kɛ tsɔɔ wɔ ní. Kɛkɛ ɔ, ngmami ɔmɛ ma ha wa maa to wa tsui si; nɛ a maa wo wɔ he wami nɛ wa na hɛ kɛ nɔ fɔmi.”​—Roma Bi 15:4.

• Mawu Mumi Klɔuklɔu ɔ. Benɛ Yesu gbo se bɔɔ ɔ, Kristofohi asafo ɔ tsuo ná tue mi jɔmi. Mɛni he je? Ejakaa ‘a nyɛɛ ngɛ Mawu gbeye yemi mi nɛ mumi klɔuklɔu ɔ hu wo mɛ he wami.’ (Bɔfo Ɔmɛ A Ní Tsumi 9:31) Mumi klɔuklɔu ɔ ji he wami nɛ Mawu kɛ tsuɔ ní. Enɛ ɔ he ɔ, Mawu ma nyɛ maa ngɔ mumi klɔuklɔu ɔ kɛ ye bua nɔ tsuaa nɔ ngɛ si himi saisaa nɛ nɔ ko ma ya je mi ɔ mi.

• Sɔlemi. Baiblo ɔ kɛ ga womi ha ke, ‘nyɛ ko hao ngɛ nɔ́ ko nɔ́ ko he; se mohu, nyɛɛ kɛ sɔlemi, kɛ pɛɛ kpami nɛ wo nyɛ hiami ní ɔmɛ a ta ha Mawu; nɛ Mawu he jɔmi nɛ pã adesa juɛmi tsuo ɔ maa bu nyɛ tsui, kɛ nyɛ juɛmi he.’​—Filipi Bi 4:6, 7.

• Nyɛmimɛ Kristofohi ji huɛmɛ kpakpahi nɛ wa ma nyɛ maa ngɔ wa hɛ kɛ fɔ a nɔ ke wa ya je si himi nɛ mi wa mi. Bɔfo Paulo de ke, e nyɛmimɛ Kristofo ɔmɛ ‘ye bua lɛ wawɛɛ’ be nɛ e ya je ‘amanehlu kɛ nɔ nami mi’ ɔ.​—Kolose Bi 4:11; 1 Tesalonika Bi 3:7.

Eko ɔ, o ma bi ke, kɛ Mawu maa pee kɛɛ kɛ wo o bua ngɛ blɔ nɛ ɔmɛ a nɔ? Ha nɛ wa susu ni komɛ nɛ a kɛ nyagbahi nɛ a wo a ta kɛ sɛ hlami ɔ ekomɛ kpe ɔ a he nɛ waa hyɛ. Kaa bɔ nɛ e ba ngɛ a blɔ fa mi ɔ, mohu o ma ba ná nɔmi mami kaa loloolo ɔ, Mawu yeɔ e si womi nɛ ngɛ bua jɔmi nɛ ɔ nɔ: “Bɔ nɛ binyɛ haa e bi naa bua jɔmi ɔ, jã ma ha nyɛ bua maa jɔ nyɛ he.”​—Yesaya 66:13.

KE O NÍ TSUMI PUƐ

Nyumu ko nɛ a tsɛɛ lɛ ke Setha ɔ de ke, “I kɛ ye yoɔ tsuo wa ní tsumi puɛ ngɛ bɛ kake mi. Ngɛ jeha enyɔ sɔuu mi ɔ, wa weku li ji nihi nɛ ye bua wɔ. Jehanɛ hu, wa tsu ní tsumi tsɔwitsɔwi komɛ nɛ wa kɛ hyɛ wa he. Enɛ ɔ ha nɛ ye yo Priscilla hao wawɛɛ. Nɛ e pee mi kaa se nami ko be ye he.

“Kɛ wa plɛ kɛ da si himi nɛ ɔ nya ha kɛɛ? Ye yo Priscilla pɔɔ e he kaimi kɛ munyu nɛ Yesu tu ngɛ Mateo 6:34. Yesu tsɔɔ ngɛ lejɛ ɔ kaa wa ko hao ngɛ hwɔɔ he, ejakaa ligbi fɛɛ ligbi kɛ e mi haomihi. Jehanɛ ɔ se hu, e tsui mi tsuo nɛ e jeɔ kɛ sɔleɔ ɔ ye bua lɛ nɛ e nyɛ nɛ e da haomi nɛ ba a nya. Ngɛ ye blɔ fa mi ɔ, munyu nɛ ngɛ La 55:22 ɔ ji nɔ́ nɛ wo mi he wami. Kaa bɔ nɛ la polɔ ɔ pee ɔ, i ngɔ ye haomi ɔmɛ kɛ ha Yehowa, nɛ i na kaa e ye bua mi niinɛ. Piɔ lɛɛ, i ná ní tsumi e kpa, nɛ waa kɛ ga womi nɛ Yesu kɛ ha ngɛ Mateo 6:20-22 ngɛ ní tsue, nɛ wa pee wa si himi kpokploo. Nɔ́ nɛ hi pe kulaa ji kaa, huɛ bɔmi nɛ ngɛ waa kɛ Yehowa wa kpɛti ɔ mi ba wa, nɛ suɔmi nɛ wa ngɛ ha wa sibi ɔ mi hu wa.”

Nyumu ko nɛ a tsɛɛ lɛ ke Jonathan ɔ de ke, “I kɛ ye yo ɔ to ní tsumi ko sisi nɛ wa tsuɔ bɔɔbɔɔbɔɔ. Benɛ wa ní tsumi ɔ puɛ ɔ, i hao wawɛɛ ngɛ bɔ nɛ wa hwɔɔ se si himi maa pee ha a he. Bɔ nɛ si himi ɔ mi ba wa ngɛ ma a mi ha he je ɔ, dengme nɛ wa gbo jeha 20 sɔuu ɔ tsuo pee yaka. I kɛ ye yo ɔ bɔni nya sami ngɛ sika he. Wa nyɛ we nɛ waa kɛ credit card ya he ní po, ejakaa wa ngɛ gbeye yee kaa wa be hiɔ nyɛe maa wo.

“Mawu mumi klɔuklɔu ɔ kɛ blɔ tsɔɔmihi nɛ ngɛ Baiblo ɔ mi ɔ ye bua wɔ nɛ wa nyɛ pee yi mi kpɛmi kpakpa. I tsu ní tsumi saisaa ko nɛ ye nine maa su nɔ, nɛ wa he we níhi nɛ a he hia we tsɔ. Wa nyɛmimɛ Yehowa Odasefo ɔmɛ hu ye bua wɔ. Benɛ wa ya je si himi nɛ mi wa nɛ ɔ mi ɔ, a wo wɔ he wami nɛ a ye bua wɔ ngɛ blɔ slɔɔtohi a nɔ nɛ lɔ ɔ ha nɛ wa ná hɛ kɛ nɔ fɔmi nɛ mi wa.”

KE O GBA PUƐ

Yo ko nɛ a tsɛɛ lɛ ke Raquel ɔ de ke, “Benɛ ye huno ɔ je ye he ɔ, e gba ye nya nɛ e dɔ mi wawɛɛ nitsɛ. I ye aywilɛho hluu. Se, i hɛ kɛ su Mawu he ngɛ sɔlemi mi nɛ e wo mi bua. Akɛnɛ i sɔleɔ daa ligbi he je ɔ, tue mi jɔmi nɛ Mawu haa nɔ ɔ ye bua mi. I na kaa Yehowa to ye tsui nɔ nine.

“Baiblo ɔ hu ye bua mi nɛ i ye abofu kɛ dɔdɔɛ nɛ ngɛ ye mi ɔ nɔ kunimi. I kɛ ga womi nɛ ɔ nɛ bɔfo Paulo kɛ ha ngɛ Roma Bi 12:21 ɔ tsu ní: ‘Nyɛ ko ha yayami nɛ ye nyɛ nɔ, se mohu nyɛɛ ngɔ kpakpa peemi kɛ ye yayami nɔ kunimi.’

“Ye huɛ ko ye bua mi nɛ i na kaa e sa nɛ ma je ye juɛmi kɛ je nɔ́ nɛ ba a nɔ. E kɛ mi susu Fiɛlɔ 3:6 he nɛ e ye bua mi nɛ i na kaa wa ‘nɔ́ ko ma nyɛ maa laa’ ngɛ be komɛ a mi. E be gbɔjɔɔ kaa i kɛ e ga womi ɔ ma tsu ní, se nɛ i kɛ tsu ni ɔ e ye bua mi. Amlɔ nɛ ɔ, i kɛ otihi nɛ ma ha mi bua jɔmi ma ye hɛ mi.”

Yo ko nɛ a tsɛɛ lɛ Elizabeth ɔ de ke, “Ke o gba puɛ ɔ, o hia yemi kɛ buami wawɛɛ. Ye huɛ ko ye bua mi saminya benɛ ye gba a puɛ ɔ. E ye kɔmɔ ha mi, e wo ye bua, nɛ e kua we mi kɔkɔɔkɔ. E je suɔmi kpo kɛ tsɔɔ mi be tsuaa be. I ná nɔ mi mami kaa Yehowa lɛ gu e nɔ kɛ to ye tsui nɔ nine.”

BE MI NƐ HIƆ FIA MO ALOO O BWƆ

Luis nɛ a wo e ta kɛ sɛ hlami ɔ ngɛ tsui hiɔ. Si enyɔ ko nɛ hiɔ ɔ mi ba wa wawɛɛ ɔ, e piɛ nguɛ nya nɛ e gbo. Amlɔ nɛ ɔ, jã a kɛ oxygen ma e nɔ maa pee ngmlɛfia 16 daa ligbi loko e ma nyɛ maa hi wami mi. Luis de ke, “I sɔleɔ kɛ biɔ Yehowa yemi kɛ buami be tsuaa be. Ke i sɔle ta a, i naa kaa Mawu mumi ɔ woɔ mi he wami. Sɔlemi haa nɛ i náa ka kɛ daa nyagba a nya, ejakaa i ngɛ Yehowa mi hemi kɛ yemi, nɛ i le kaa e susuɔ ye he.”

Yo ko nɛ a tsɛɛ lɛ ke Petra nɛ e ye maa pee jeha 80 ɔ de ke, “Níhi fuu ngɛ nɛ i suɔ nɛ ma pee se i nyɛ we. E dɔɔ mi kaa ye he wami nɔ ngɛ gbɔe. Pɔ tɔɔ mi mla, nɛ daa nɛ ɔ i ngɛ tsopa nue. Behi fuu ɔ, i susuɔ bɔ nɛ Yesu bi e-Tsɛ ɔ kaa ke e maa hi ɔ, e je nɔ́ nami ɔ kɛ je e blɔ mi ɔ he. Yehowa wo Yesu he wami nɛ e nyɛ nɛ e da nyagba a nya. Imi hu Yehowa yaa nɔ nɛ e woɔ mi he wami ja nɔuu. I sɔleɔ daa kaa bɔ nɛ i nuɔ tsopa daa ligbi ɔ. Ke i kɛ Mawu sɛɛ ní ta a, ye tsui nɔɔ ye mi.”​—Mateo 26:39.

Nyumu ko nɛ a tsɛɛ lɛ ke Julian ɔ hu ngɛ si fɔfɔɛ ko nɛ ngɛ kaa Petra nɔ ɔ mi. Hiɔ ko nɛ ha we nɛ juɛmi ɔ kɛ se mi wu ɔ nɛ tsu ní saminya (multiple sclerosis) fia Julian. Maa pee jeha 30 sɔuu ji nɛ ɔ nɛ e ngɛ hiɔ nɛ ɔ tsae se e jɔɛ. Julian de ke, “Amlɔ nɛ ɔ, i nyɛ we nyɛɛmi. Se i ngɛ bua jɔmi ejakaa i kɛ ye wami ngɛ ni kpahi ye buae. Ke o yeɔ buaa ní kpahi ɔ, e haa nɛ o jeɔ o juɛmi kɛ jeɔ o nyagba amɛ a nɔ. Yehowa hu wo si kaa e maa ye bua wɔ be tsuaa be. E yeɔ e si womi ɔ nɔ daa, titli ɔ ngɛ be nɛ níhi a mi wa ha wɔ mi. Kaa bɔ nɛ e ba ngɛ bɔfo Paulo blɔ fa mi ɔ, imi hu ma nyɛ ma de ke: ‘Kristo lɛ woɔ mi he wami nɛ e haa nɛ i nyɛɔ peeɔ nɔ́ tsuaa nɔ́.’”​—Filipi Bi 4:13.

KE O NƆ KO GBO

Niheyo ko nɛ a tsɛɛ lɛ Antonio de ke, “Benɛ ye papaa gbo ngɛ lɔle osla mi ɔ, sisije ɔ, e pee mi kaa i ngɛ nlae. E dɔ mi wawɛɛ, ejakaa pi nɛ e ngɛ blɔ ɔ mi poe, mohu ɔ e ngɛ nyɛɛ ngɛ blɔ ɔ tue kɛkɛ nɛ lɔle ɔ fia lɛ. Se nɔ́ ko be nɛ ma nyɛ ma pee ngɛ he. E sɛ diblii mi ligbi enuɔ loko e gbo. I bɔ mɔde kaa ma ye ye he nɔ nɛ i be ya foe ngɛ ye yayo hɛ mi. Se ke imi nɔ kake i ngɛ ɔ, i yeɔ aywilɛho nɛ i foɔ ya. I biɔ ye he ke, ‘mɛni he je nɛ nɔ́ ko kaa kikɛ ba a?’

“Benɛ i kɛ nyagba nɛ ɔ kpe ɔ, i sɔle kɛ bi Yehowa si abɔ kaa e ye bua mi nɛ ma kpa aywilɛho yemi. Yehowa ye bua mi nɛ i nyɛ nɛ i pee jã. I kai hu kaa Baiblo ɔ de ke ‘haomi’ ma nyɛ maa ba nɔ fɛɛ nɔ nɔ. Nɛ akɛnɛ Mawu yi lakpa he je ɔ, i ngɛ nɔ mi mami kaa ke gbogboehi a si temi ɔ ba a, ma na ye papaa ekohu.”​—Fiɛlɔ 9:11; Yohane 11:25; Tito 1:2.

Robert nɛ a wo e ta kɛ sɛ hlami ɔ hu de ke: “Benɛ i kɛ ye yo ɔ sɔle kɛ bi Yehowa yemi kɛ buami ɔ, wa na kaa niinɛ Mawu haa nɔ he jɔmi kaa bɔ nɛ a tu he munyu ngɛ Filipi Bi 4:6, 7 ɔ. Enɛ ɔ ye bua wɔ nɛ wa nyɛ tu gbogboehi a si temi ɔ he hɛ nɔ kami nɛ wa ngɛ ɔ he munyu kɛ tsɔɔ amaniɛ bɔli nɛ ba bi wɔ sane ɔ. E ngɛ mi kaa wa bi nyumuyo ɔ gbo ngɛ ɛloplee oslaa a mi mohu lɛɛ, se daa nɛ ɔ, wa kaiɔ ní komɛ nɛ wa pee kɛ bla kaa weku nɛ ha nɛ wa ná bua jɔmi ɔ. Wa bɔɔ mɔde kaa wa ma susu lɔ ɔmɛ a he.

“Benɛ wa nyɛmimɛ Odasefo ɔmɛ de ke a na wɔ nɛ wa to wa tsui si kɛ ngɛ wa hemi kɛ yemi ɔ mi tsɔɔe ngɛ TV nɔ ɔ, wa ha nɛ a nu sisi kaa sɔlemi nɛ a kɛ fi wa se ɔ ji nɔ́ nɛ ye bua wɔ. I he ye kaa, bua womi munyuhi nɛ wa nyɛmimɛ ɔmɛ tu kɛ wo wɔ he wami ɔ ji odase nɛ tsɔɔ kaa Yehowa ngɛ wɔ yee buae.”

Níhi nɛ wa tu a he munyu nɛ ɔ maa nɔ mi kaa Mawu ma nyɛ maa wo nɔ tsuaa nɔ nɛ e kɛ nyagba loo haomi fɛɛ ko ngɛ kpee ɔ bua. Mo hu nɛɛ? Ke nyagba nɛ o kɛ ngɛ kpee ngɛ o si himi mi ɔ mi wa kaa mɛni po, Yehowa ma nyɛ maa ye bua mo nɛ e maa wo mo bua.b Mo bi Yehowa nɛ e ye bua mo. Ejakaa e ji “Mawu nɛ woɔ nɔ bua ngɛ nɔ́ tsuaa nɔ́ mi.”​—2 Korinto Bi 1:3.