Van ons lesers
Kweekhuiseffek Die formaat en uitleg van die artikels oor die kweekhuiseffek (8 September 1989) is so goed gedoen dat dit ’n mens lus gemaak het om verder te lees. Die gebruik van prente en vensters in teenstelling met bladsye sonder prente het ’n mens die gevoel gegee dat jy wel tyd het om dit te lees. Ek het gevind dat ek nie die tydskrif wou neersit voor ek dit klaar gelees het nie. Gevolglik wou ek die inhoud daarvan met ander deel.
G. G., Verenigde State
Die skryfwerk, kunswerk en fotografie het heel opvallend verbeter. Ons was veral beïndruk deur die “Kweekhuis”-Ontwaak! Ons het verskeie swak artikels oor dieselfde onderwerp in tydskrifte en koerante gelees wat sake nie só verduidelik het dat die meeste mense dit kan verstaan nie. Wat ’n instrument sal hierdie nommer tog wees om met die mense hier in warm suidelike Kalifornië te kan praat!
Mnr. en Mev. J. P. M., Verenigde State
Skokkende orgaanbron Ontwaak! het ongelukkig ’n ongegronde gerug herhaal, wat heel verstaanbaar is, aangesien dit lyk asof die Europese Parlement imprimatur aan hierdie berigte verleen het. Hierdie gerugte het die humanitêre kwessie van aanneming skade berokken.
T. L., U.S. Information Agency, Verenigde State
“Ontwaak!” van 22 Maart 1989 se item met die titel “Skokkende orgaanbron” was gebaseer op ’n resolusie wat deur die Europese Parlement, ’n geloofwaardige organisasie, uitgegee is. Maar daardie organisasie beweer nou dat dit die slagoffer van ’n valse berig was. “Ontwaak!” het sake sedertdien ondersoek en uitgevind dat hoewel daar in 1987 verskeie opspraakwekkende arrestasies vir kindersmousery in Guatemala was daar geen bewys is dat kinders vir orgaanoorplantings verkoop is nie. Die oorspronklike berigte sê eerder dat babas onwettig bekom en verkoop is met die oog op aanneming.—RED.
Vriende Ek is 11 jaar oud en wil julle graag bedank vir die artikel “Jongmense vra . . . Waarom is dit so moeilik om vriende te bly?” (22 September 1989). My beste vriend het my net as vanselfsprekend aanvaar. Met behulp van julle publikasie het ek besluit om ’n ware vriend te vind.
B. S., Australië
Down se sindroom Toe ek die artikel oor Suzy (8 Augustus 1989) gelees het, het dit my emosioneel so geroer dat ek dwarsdeur die hele verhaal gehuil het. Ek waardeer ook die feit dat Jehovah ons die wonderlike hoop op die opstanding gegee het, aangesien ek my vader aan die dood afgestaan het. My hart en gebede gaan uit tot Suzy se gesin.
B. E., Verenigde State
Herbenutte papier Julle nommer van 8 September 1989, bladsy 29, het ’n interessante item bevat oor die herbenutting van papier, waardeur die immertoenemende besoedeling van ons omgewing in toom gehou kan word. Nogtans word nòg Die Wagtoring nòg Ontwaak! op herbenutte papier gedruk. Iemand wat sekere standaarde aanmoedig maar terselfdertyd in stryd daarmee optree, kan net as skynheilig bestempel word.
F. S., Bondsrepubliek Duitsland
Daar is tans nie genoeg herbenutte papier van geskikte gehalte beskikbaar om in ons grootskaalse drukwerk te voorsien nie. Aangesien herbenutte papier ook tot 20 persent duurder is as papier wat uit suiwer vesel gemaak word, sal dit ongetwyfeld ’n rukkie duur voordat dit algemeen vir produksiedrukwerk gebruik word. Waar moontlik word afvalpapier van ons drukkerye nietemin vir herbenutting verkoop. En aansienlike hoeveelhede herbenutte materiale word ook gebruik in die produksie van buiteblaaie vir ons hardebandpublikasies.—RED.