Van ons lesers
Spesiale behoeftes Dankie vir die artikel oor hoe om dié met spesiale behoeftes te help (22 Augustus 1989). Ek het ’n ernstige verlammende siekte wat my spiere, gewrigte en organe aantas. As gevolg hiervan het ek talle operasies gehad en moet ek rolstoele, looprame, kieries en verskillende soorte stutte gebruik. Aangesien ek net 25 jaar oud is, word baie aanmerkings gemaak, direk en indirek, wat werklik seermaak. Hoewel party mense eenvoudig nuuskierig is, is ander onbeleef en onbedagsaam. So ’n artikel help nie net gestremde persone nie, maar help ook diegene wat geseën is met goeie gesondheid; hulle leer om meer begrip te toon.
D. H., Verenigde State
Skinder Ek was ongeveer ’n jaar gelede die slagoffer van skadelike skinderpraatjies. Ek was aanvanklik gekrenk en seergemaak, maar ek en my vader het die herkoms van die gerug daardie selfde dag nagespoor en dit stopgesit. Die artikel (22 Julie 1989) het my gehelp om hierdie verskriklike leuen te vergeet.
P. M., Verenigde State
Ek is 17 jaar oud, en party persone het van my geskinder. Een aand het ek een van hulle gesien en ek het nie geweet wat om te doen nie. Toe ek by die huis kom, het ek op die artikel oor skinder afgekom. Ek het Jehovah van harte bedank dat hy my gebede verhoor het. Ek het geleer hoe om teenoor sulke persone op te tree en gesien dat ek myself nie te ernstig moet opneem nie. Per slot van rekening is ek nie so belangrik dat hulle die res van my lewe oor my sal praat nie; en wat nog belangriker is, is dat my ware vriende en Jehovah weet dat wat hulle rondvertel het nie waar is nie. Dankie dat julle bewus is van die behoeftes van jongmense!
L. U., Brasilië
Haaibionika Ek het die artikel oor kunsmatige haaivel met belangstelling gelees (“Ons beskou die wêreld”, 8 Augustus 1989). Ek werk by ’n maatskappy wat etlike jare al aan hierdie einste projek werk. Sulke artikels in Ontwaak! wat die verbasende skeppingsontwerpe bspreek wat in die natuur gevind word, het my talle geleenthede gebied om met ander oor ons Skepper te gesels.
M. H., Verenigde State
Vloekery Ek het onlangs aan julle ’n brief geskryf oor die probleem van vloekery onder jongmense. Tot my groot verbasing het ek net vandag die nommer van 22 Augustus 1989 met die artikel “Is dit verkeerd om nou en dan te vloek?” ontvang. Ek weet hierdie artikel is opgestel lank voor ek geskryf het, en dit is bemoedigend en geloofversterkend om persoonlik te ondervind dat my gebed om hulp deur julle publikasies verhoor is.
J. A., Verenigde State
Veilige kos Ek dien as ’n reisende bedienaar van Jehovah se Getuies, vergesel deur my vrou. Ons hou nie daarvan om ons gashere te belas met ’n klomp reëls oor voedselversorging nie en ondervind dus spysverteringsprobleme. Julle kan julle net voorstel hoe nuttig hierdie artikel (22 Junie 1989) vir ons is! Ons wil julle werklik bedank dat julle aan alles dink wat goed is vir God se volk.
R. P., Venezuela
Dood te koop Alles wat in julle artikel (8 Julie 1989) geskryf is, is leersaam en waar. Ek weet want ek het meer as tien jaar lank gerook. Die gevolg: moegheid, sweterigheid en humeurigheid wanneer ek nie tabak het nie. Ek het besluit om op te hou rook, maar my voorneme het net twee maande gehou. ’n Ruk later het ek saam met Jehovah se Getuies begin studeer, die Bybel se raad in 2 Korinthiërs 7:1 leer toepas en uiteindelik rook laat vaar. Ek hoop om spoedig as ’n Getuie gedoop te word.
A. P., Spanje