Ons beskou die wêreld
Vroue is minder bevoorreg
“Arm vroue in landelike gebiede is die mense in die wêreld wat die swaarste kry”, sê die Verenigde Volke se publikasie, UN Chronicle. “Hulle is sieker en meer ongeletterd as mans en kry nie die geleenthede wat mans kry om hulle posisie te verbeter nie.” Twee belangrike studies oor wêreldarmoede in 1990 deur twee internasionale ontwikkelingsinstansies, die Verenigde Nasies se Ontwikkelingsprogram en die Wêreldbank, het tot daardie droewe slotsom gekom. “Omtrent ’n halfmiljoen vrouens, 99 persent van hulle in die ontwikkelende wêreld, sterf elke jaar met ’n bevalling”, berig die UN Chronicle.
Belofte oor die omgewing
“Ons mense het ’n gevaar vir onsself geword. Ons moet betyds optree.” Hierdie onheilspellende woorde het deel uitgemaak van ’n belofte oor die omgewing wat deur rektore uit 22 lande in Afrika, Asië, Europa en Noord- en Suid-Amerika afgelê is. Hulle het plegtig belowe dat hulle universiteite meer onderrig oor omgewingsake sal gee as in die verlede en dat hulle die klasgeld wat vir omgewingsnavorsing gebruik word, sal vermeerder. Die amptenare, wat verlede Oktober by ’n konferensie in Talloires, Frankryk, bymekaargekom het, het ook gemeenskaplike doelwitte uiteengesit “vir ’n langdurige toekoms vir die omgewing”.
“Gerantsoeneerde” wonders
As gevolg van die droogte moes die “wonderwater” van die wêreldberoemde poel by Lourdes in Frankryk gerantsoeneer word, en dit het ontsteltenis veroorsaak onder besoekers wat op soek is na wondergenesings. Godsdiensowerhede laat pelgrims elk net ’n kwart van die water van die fontein toe, wat, volgens tradisie, in 1858 na ’n verskyning van die Madonna opgeborrel het. Alle ekstra bottels is gekonfiskeer en die water is in die poel teruggegooi. “In al die kerke in Frankryk bid hulle tot die Maagd van die Reën, maar dit is tevergeefs. In elk geval kon sy dit nie net op Lourdes laat reën nie”, het die koerant Corriere della Sera opgemerk.
Probleme met troeteldiere
Die toenemende gewildheid van honde as huisdiere het ’n bron van kommer onder stads- en gesondheidsowerhede in Frankryk geword. Die Franse weekblad L’Express berig dat daar elke dag 20 ton hondemis van die strate en sypaadjies van Parys teen ’n koste van meer as 400 frank (R182,00) per kilo opgetel word. Maar benewens die koste en ergernis, het ’n ernstiger sy van die saak aan die lig gekom. Hondemis is die oorsaak van ’n siekte wat deur die parasiet Toxocara canis veroorsaak word. Daar is gevind dat die helfte van die kinders se speelplekke en sandkaste in Parys besmet is met die uiters geharde mikroskopiese eiers van die parasiet wat onder skoensole en huisdiere se pote vassit en sodoende in huise inkom. Die teenwoordigheid daarvan in die mens word grootliks onderskat. Moegheid, maagpyn, allergieë en hart- en slagaarprobleme is vroeë simptome van die siekte.
Kerkverliese
Die ledelyste van die vernaamste Protestantse kerke in die Verenigde State toon nog steeds ’n afname, sê die 1990 Yearbook of American and Canadian Churches. Hoewel die jaarboek, wat deur die National Council of Churches in Amerika uitgegee word, toon dat die verliese in die meeste gevalle minder as 1 persent is, is hulle sedert die middel-sestigerjare konstant. Die Dissipels van Christus, die Episkopaalse Kerk, die Presbiteriaanse Kerk (VSA), die Verenigde Kerk van Christus, die Verenigde Metodistekerk, die Evangelies-Lutherse Kerk in Amerika en die Amerikaanse Baptistekerke in die VSA het almal verliese gely. Die verslag meld Jehovah se Getuies egter as een van die godsdienste wat ’n vermeerdering in getalle getoon het. Jehovah se Getuies in die Verenigde State het in 1989 ’n vermeerdering van 3 persent en in 1990 ’n vermeerdering van 4 persent gehad.
Slegte nuus vir rokers
Op 25 September 1990 het die Centers for Disease Control in die Verenigde State die volgende verslag uitgegee: “Die gesondheidsvoordele as ’n mens ophou rook: ’n Verslag van die geneesheer-generaal, 1990.” Van die vernaamste gevolgtrekkings wat hulle gemaak het, is: “1) Mense van alle ouderdomme ondervind groot en onmiddellike gesondheidsvoordele wanneer hulle ophou rook . . . ; 2) gewese rokers leef langer as dié wat aanhou rook; 3) wanneer ’n mens ophou rook, is die risiko van longkanker en ander soorte kanker, hartaanvalle, beroerte en chroniese longkwale kleiner.”
Tabakverkope aan die Sowjetunie
Onlangs het ’n groep woedende rokers in die Sowjetunie op die punt gestaan om te betoog weens ’n tekort aan sigarette in daardie land. Twee maatskappye in die Verenigde State het belowe om die tekort te verlig. Hulle is van plan om meer as ’n maand se voorraad, 34 miljard sigarette, aan die Sowjetunie te verkoop. Interessant genoeg, woordvoerders vir die Amerikaanse maatskappye het gesê dat die geneesheer-generaal se gesondheidswaarskuwing oor kanker en ander siektes wat met tabakgebruik geassosieer word, nie op die sigarette sal voorkom nie.
Giftige paddaslymlekkery
Dr. Alan Emery van die Canadian Museum of Nature het aan The Globe and Mail gesê dat daar gedurende die afgelope tien jaar wêreldwyd ’n bevolkingsontploffing onder strandpaddas is. Die strandpadda, of Bufo marinus, “skei ’n giftige melkwit vloeistof af wat die Drug Enforcement Agency van die VSA bufotenien noem”. In Queensland, Australië, het die padda so ’n plaag geword dat die regering “paddaslym as ’n onwettige bestanddeel onder sy Dwelmmisbruikwet geklassifiseer het”. Die slym wat die strandpadda afskei is giftig en “veroorsaak hallusinasies, ernstige braking en stuipe”. Die Globe het berig dat twee Kanadese wat hulle vingers afgelek het nadat hulle aan ’n padda gevat het dodelik siek geword het en in die hospitaal opgeneem moes word.
Slaap vir die brein
Waarom het ons slaap nodig? By ’n onlangse konferensie in Straatsburg, Frankryk, is ’n kontroversiële teorie aangevoer. Daar is gesê dat slaap minder voordeel vir die liggaam inhou as vir die brein, wat deur middel van slaap van die dag se inspanning herstel. Toetse toon dat “die mens se liggaamsfunksies feitlik onbelemmerd kan voortgaan, selfs na etlike dae sonder slaap”, berig Die Zeit, maar “die brein is anders”. In proefgevalle het mense las gehad van “gebrek aan opmerksaamheid en konsentrasie, verswakte geheue, ’n stadiger gedagtegang en oriënteringsprobleme” wanneer hulle sonder slaap moes klaarkom.
Herbouing van Babilon gestaak
Eertydse Babilon, die beroemde stad van koning Nebukadnesar met sy hangende tuine, het meer as 2500 jaar gelede ineengestort onder die aanslae van oorwinnaars. ’n Baie kleiner Babilon het behoue gebly tot omstreeks die vierde eeu G.J., toe dit ook ’n algehele puinhoop geword het. Hedendaagse Irak het onlangs beplan om die gewese vesting van keiserlike mag tot sy eertydse prag en praal te herbou. (Sien die Ontwaak! van 8 Maart 1988, bladsy 30.) Maar onlangse politieke gebeure in die Midde-Ooste het sulke konstruksieplanne in die wiele gery, sê The New York Times. Jesaja 13:19, 20 bevat ’n interessante profesie oor Babilon se ondergang, wat sê dat “mense . . . daar in ewigheid nie [sal] woon nie, en dit sal van geslag tot geslag nie bewoon word nie”.
Kerkbelasting in Duitsland
In die Bondsrepubliek Duitsland kry kerke finansiële ondersteuning deur middel van ’n kerkbelasting wat werkgewers van salarisse aftrek. Een werkgewer het geweier om kerkbelasting wat van sy werknemers se salarisse afgetrek is, in te gee. Waarom? In 1664 is sy voorouers van towery beskuldig en is hulle gemartel en doodgebrand, en hy hou die kerk daarvoor verantwoordelik. Hy is voor die hof gedaag, wat bevind het dat sy optrede ongegrond is. “Anders”, berig die tydskrif Polizei, “kan enigeen wie se voorouers ten onregte gely het, . . . weier op grond van gewete om ’n verpligting wat [deur die Staat] aan hom opgelê is, na te kom.”
Stadige musiek en drankgebruik
Navorsing wat in kroeë gedoen is waar country and western-musiek gespeel word, het bevind dat “sodra stadiger musiek speel, die mense meer begin drink”, sê die tydskrif Psychology Today. Die studie is gedoen oor ’n tydperk van twee jaar en het 2000 groepe drinkers ingesluit. James Schaefer, ’n navorser in die projek, het gesê dat “strawwe drinkers verkies om na stadige, kermende, eensame, selfbejammerende musiek te luister”. Schaefer sê: “Die klante lei dalk dikwels die soort lewe wat uitgebeeld word in die liedjies waarna hulle wil luister.”