Van ons lesers
Gebed in sport Dankie vir “Die Bybelse beskouing: Gebed in sport—Luister God daarna?” (8 Mei 1990). Ek het gewoonlik vurig tot God gebid voor ’n handbalwedstryd. Gedurende belangrike wedstryde het ek gebid vir krag om te wen. (Ons het nooit enige van daardie wedstryde gewen nie.) Nou weet ek dat sulke gebede nie in ooreenstemming met God se wil was nie.
M.A.L.S., Brasilië
Jongmene—uitdaging van die negentigerjare Ek het die boek Vrae wat jongmense vra—Antwoorde wat werk gelees toe ek dit gekry het. Julle artikels oor jongmense (8 September 1990) het my aangemoedig om dit weer te begin lees. En ek moet sê, ek geniet dit die tweede keer nog meer!
B. B., Verenigde State
Ek is ’n 13-jarige meisie en ek wil julle vertel dat ek die artikels oor jongmense regtig geniet het. Ek het ’n intekening op die Ontwaak! Maar wanneer ek die tydskrifte in die pos kry, bêre ek hulle gewoonlik. Hierdie een het my aandag getrek en toe het ek dit gelees en dit baie geniet. Daarna het ek my ander eksemplare van die Ontwaak! uitgehaal en party van die artikels gelees. Nou het ek my ma gevra om die Bybel met my te studeer.
A. P., Verenigde State
Selfmoord My moeder, ’n getroue kneg van God, het haar lewe geneem na ’n maand van diep depressie. Haar dood het ’n onbeskryflike las en hartseer op ons almal gelaat wat haar liefgehad het. Die gedagte dat ek haar dalk nooit weer sal sien nie, het dit moeiliker gemaak om die pyn van haar dood te verduur. Julle artikel (“Die Bybelse beskouing: Selfmoordslagoffers—Sal hulle opgewek word?”, 8 September 1990) het my gehelp om meer “normaal” te voel en gemoedsrus te hê, omdat ek weet dat ek die hoop kan koester dat sy ’n opstanding sal kry.
T. M., Verenigde State
Die artikel is met medelye geskryf. Maar kan gekwelde persone sulke medelye nie dalk beskou as regverdiging om “die maklike uitweg” te neem nie?
N. G., Verenigde State
Gevoelens van knaende wanhoop kan die dood aanloklik laat lyk vir iemand wat uiters depressief is. (Vergelyk Job 10:1.) Maar aangesien selfmoord moord is, is dit ’n skending van God se wet en ’n onaanvaarbare uitweg vir ’n Christen. As iemand deur selfmoordgedagtes geteister word, moet hy nie God se barmhartigheid as vanselfsprekend aanvaar nie, maar hy moet hulp vra sodat hy selfvernietigende drange kan weerstaan (Jakobus 1:14, 15). Hy kan aan die pynlike leemte dink wat sy dood in die lewe van sy geliefdes sal laat. Hy moet onthou Jehovah “is naby die wat gebroke is van hart” en sy sorge op Hom werp (Psalm 34:19; 55:23). Hy moet mede-Christene ook van sy wanhoop vertel en hulle ondersteuning aanvaar. As iemand nietemin voor selfmoordgevoelens swig, kan bedroefde persone troos put uit die gedagte dat hulle geliefde se toekoms by ’n liefdevolle God berus.—RED.
Hoe ek my by my verlamming aangepas het Nadat ek “Hoe ek geleer het om ander te help” (22 September 1990) gelees het, wil ek net dankie sê vir so ’n opbouende en positiewe artikel. Omdat ek heeltemal gesond is, wonder ek partykeer hoe ek my by soortgelyke omstandighede sou aanpas. Ons gaan almal gebuk onder geweldige druk van hierdie wêreld, maar Tony Wood bied dit en nog meer die hoof deur op Jehovah te vertrou.
P. G., Engeland
Rolprente Dankie vir julle artikel “Jongmense vra . . . Hoe kan ek ’n gepaste rolprent kies?” (8 Augustus 1990). Vandag weet die meeste jongmense nie watter soort rolprente gepas vir ’n Christen sal wees nie, en hulle vra ook nie hulle ouers of hulle na ’n rolprent moet kyk of nie. Ek het baie van die gedagte gehou dat as ’n mens na ’n rolprent kyk wat onvanpas is, hy die TV moet afskakel.
J. N. S., Brasilië