Van ons lesers

Sarkasme Ek het julle artikel “Jongmense vra . . . Wat is verkeerd met sarkasme?” (22 September 1991) waardeer. Dit is iets waaraan ek al baie jare lank skuldig is. Dit was meestal in die vorm van sogenaamde gevatte antwoorde, maar as ek nou terugkyk, kan ek sien dat dit ook ’n soort selfverdedigingsmeganisme was, iets wat minderwaardigheidsgevoelens wat al lank bestaan, wegsteek. Maar noudat ek die artikel gelees het, wil ek van hierdie slegte en soms skadelike gewoonte ontslae raak.

C. T., Engeland

Slaan ag op die liggaam se waarskuwings Ek was verlede jaar drie maande lank in die hospitaal weens probleme met my eierstokke. Ek het jare lank waarskuwingstekens gehad, maar ek het my nie veel daaraan gesteur nie. Ek is uiteindelik na ’n hospitaal toe en het uitgevind dat ek onmiddellik ’n operasie moes ondergaan. As ek julle artikel “Slaan ag op die liggaam se waarskuwings” (8 Oktober 1991) destyds gehad het, sou ek miskien die moed gehad het om vroeër na ’n dokter toe te gaan.

M. U., Japan

Lugversorging Ek het van die artikel “Het jy lugversorging nodig?” (22 Junie 1991) gehou, omdat ek reeds meer as 35 jaar by die instandhouding van lugversorgers betrokke is. Toe ek in die vyftigerjare aanvanklik vir my beroep opgelei is, moes ons die onderwerp van Btu’s ’n paar dae lank bestudeer. Julle het hierdie saak in slegs een paragraaf op ’n baie eenvoudige en verstaanbare manier verduidelik! Ek wens ek het destyds hierdie artikel gehad.

A. D., Verenigde State

Geskil oor bloed Ek het die artikel oor Wyndham Cook, “Vanaand sal jy dood wees” (22 Augustus 1991), so pas gelees. Dit is die eerste keer dat ’n artikel my só ontroer. Ek bid dat Jehovah oor sy ouers sal waak en dat ons almal die voorbeeld van sterk geloof sal volg wat hierdie jong man gestel het.

J. T., Verenigde State

Dit is vir my, as 15-jarige, aanmoedigend om te weet dat jong Christene al sulke toegewydheid aan God getoon het. Dit het my tot trane beweeg om oor Wyndham Cook se voortreflike stryd vir die geloof te lees. Ek bid dat ek in ’n soortgelyke situasie net so getrou sal kan wees.

D. L., Verenigde State

Rommel Dankie vir julle artikel “Wanneer rommel hand-uit ruk” (8 Augustus 1991). Ek voer hierdie stryd al vir die grootste gedeelte van my 44 jaar, en ek kan enige hulp gebruik wat ek kan kry. Dankie vir julle uiters praktiese voorstelle.

C. R., Verenigde State

My man het eerste die artikel gelees en gesê dat ons huis vol rommel is! Ons het onlangs ons huis deeglik skoongemaak en ek het gedink dat ons huis nog nooit beter gelyk het nie. Toe was dit my beurt om die artikel gretig te lees. Ek het so gelag toe ek besef wat die werklike toestand van ons huis is! Julle artikel het my gehelp om berge rommel te verwyder. Dankie.

S. C., Verenigde State

Werkloosheid Ek wil vir julle baie dankie sê vir die reeks artikels oor “Wat jy kan doen as jy jou werk verloor” (8 Augustus 1991). My man het ’n jaar gelede skielik sy werk verloor, en hy kon nog nie daarin slaag om ’n soortgelyke werk te kry nie. Dit is vir ons werklik ’n uitdaging. Dankie dat julle ons altyd vertroos.

R. S., Brasilië

Internasionale konstruksie Ons was werklik ingenome met die artikel “Jy móét dit eenvoudig doen” (22 April 1991). Dit het gekom net ’n week voor ek en my vrou vertrek het om as vrywilligers by ’n Wagtoring-konstruksieprojek in Colombia, Suid-Amerika, te dien. Die artikel het ons ’n ‘voorskou’ gegee van wat om te verwag. Voordat ons weg is, kon ons baie eksemplare onder familie, werkgewers, belangstellendes en Bybelstudente versprei. Dit het hulle gehelp om die werk waaraan ons die voorreg het om deel te neem beter te verstaan.

T. G., Verenigde State