Van ons lesers
Wanneer jy by die skool lastig geval word Ek was so bly om die artikel “Jongmense vra . . . Wat kan ek doen sodat hy my sal uitlos?” (22 Mei 1991) te ontvang. Hierdie is my eerste jaar op hoërskool en daar is alreeds baie ouens wat my probeer dwing om ’n verhouding aan te knoop. Een van hulle wil my net nie uitlos nie. Hy het my na die skooldans, vir ete en selfs vir ’n naweek in die berge genooi. “Nee”, laat hom nie ophou nie. Maar die artikel het my voorneme versterk om hom te weerstaan.
P. B., Verenigde State
Hoewel ek maar 17 jaar oud is, het ek reeds situasies teëgekom soos dié wat in die artikel beskryf word. Maar omdat ek die aandag geniet het, het ek dit nooit probeer stopsit nie. Nou verstaan ek dat ’n mens sulke toenadering onmiddellik moet verwerp.
L. A. R., Brasilië
Die artikel het my gehelp om die toenemende onsedelikheid by my werk te hanteer. Dit het die gevare uitgewys en die argumente met skriftuurlike voorbeelde ondersteun. Dit is duidelik dat sulke artikels nie net jongmense help nie maar ongetroudes van alle ouderdomme.
K. H., Duitsland
Die artikel het my gehelp om nog meer vasbeslote te wees om, soos die Sulammitiese meisie, “’n muur” te wees.
E. S., Filippyne
TMG-sindroom Dankie vir die artikel “Uit die kake—die groot bedrieër” (22 Junie 1991). Ek het twee jaar lank ’n harde suising in my ore gehad as gevolg van TMG-sindroom. Julle artikel het my gehelp om te besluit watter soort dokter ek moet gaan spreek. Ek voel dat Jehovah hierdie artikel vir my en talle ander TMG-lyers voorsien het.
R. B., Verenigde State
“Ontwaak!” deel nie mediese advies uit nie, maar ons stel graag nuttige inligting aan ons lesers beskikbaar. Dit is nie verbasend dat die artikel oor TMG wêreldwyd ’n buitengewoon groot reaksie van lesers uitgelok het nie.—RED.
Rook Nadat ek die twee “Jongmense vra . . . ”-artikels oor rook gelees het (8 en 22 Augustus 1991), kan ek dit wat geskryf is net bevestig. Ek het op 13 begin rook omdat ek deur my skoolvriende omgepraat is. Maar toe ek op 15 ’n Christen word en ophou rook, het my “vriende” my verlaat. Later het werkmaats my weer onder druk geplaas om te rook. Gelukkig werk ek nou saam met ’n mede-Christen en die lug om ons is nou skoon—letterlik en geestelik.
B. S., Duitsland
Rehabilitasie Dankie vir die artikel “Die krag van die waarheid om te rehabiliteer” (22 Julie 1991). Ek dien tans tronkstraf uit en dit het my bemoedig om van iemand anders te hoor wat sy lewe verander het. Die owerhede probeer om misdadigers te rehabiliteer, maar stuur hulle dan net terug in Satan se wêreld om weer misdade te pleeg. Ek het, met die hulp van ’n paar baie simpatieke bedienaars van Jehovah se Getuies, gevind dat die enigste blywende rehabilitasie behels dat ons God soek en hom dien.
J. S., Verenigde State
Lewensruimte Ek wil julle bedank vir die artikel “Wen die stryd om meer lewensruimte!” (22 April 1991). Ons woon in ’n klein woonstelletjie en dit lyk altyd asof ons te veel dinge het. Hierdie artikel was baie nuttig vir ons omdat ons besluit het om van alles ontslae te raak wat ons nie gebruik nie. Dit was nie ’n maklike ding om te doen nie en ons probeer nog om dit te bereik. Baie dankie, dit lyk asof hierdie artikel spesiaal vir ons geskryf is.
L. C., Guatemala