Jou kind verkeer in gevaar!

Kindermolestering is ’n aaklige werklikheid in hierdie siek wêreld. Die tydskrif Lear’s het gesê: “Dit raak meer van ons as kanker, meer van ons as hartsiekte, meer van ons as vigs.” Ontwaak! voel dus dat hy dit aan sy lesers verskuldig is om hulle bewus te probeer maak van hierdie gevaar en van wat daaromtrent gedoen kan word.—Vergelyk Esegiël 3:17-21; Romeine 13:11-13.

IN DIE laaste jare is kindermolestering wêreldwyd betreur. Maar al die mediadekking, veral van beroemdes wat onthul het hoe hulle tydens hulle kinderjare gemolesteer is, het tot gewilde misvattings gelei. Sommige meen dat al hierdie praatjies oor aanvalle op kinders maar net die jongste gier is. Maar in werklikheid is daar nie juis iets nuuts omtrent hierdie soort seksuele aanranding nie. Dit is amper so oud soos die geskiedenis van die mensdom self.

’n Ou probleem

Ongeveer 4000 jaar gelede was die stede Sodom en Gomorra berug vir hulle verdorwenheid. Pedofilie was klaarblyklik een van die streek se vele euwels. Genesis 19:4 vertel van ’n seksmal horde Sodomiete “jonk en oud” wat Lot se twee manlike gaste wou verkrag. Dink hieroor na: Waarom sou blote seuns deur die idee aangevuur wees om mans te verkrag? Hulle was ongetwyfeld reeds by homoseksuele perversiteite betrokke.

Eeue later het die nasie Israel hulle in die omgewing van Kanaän gevestig. Hierdie land was so deurdrenk van bloedskande, sodomie, bestialiteit, prostitusie en selfs die ritualistiese opoffering van kindertjies aan demoongode dat al hierdie skandelike dade uitdruklik in die Mosaïese Wet verbied moes word (Levitikus 18:6, 21-23; 19:29; Jeremia 32:35). Ondanks Goddelike waarskuwings het opstandige Israeliete, waaronder sommige van hulle heersers, hierdie veragtelike gebruike aangeneem.—Psalm 106:35-38.

Antieke Griekeland en Rome was egter in hierdie opsig veel erger as Israel. Kindermoord was in albei iets algemeens, en in Griekeland was dit ’n alom aanvaarde gebruik dat ouer mans met jong seuns omgang gehad het. Seunsbordele het in elke antieke Griekse stad gefloreer. In die Romeinse Ryk was kinderprostitusie so algemeen dat spesiale belastings en vakansiedae spesifiek vir daardie bedryf ingestel is. Meisies is in die arenas verkrag en gedwing om dade van bestialiteit te verrig. Soortgelyke gruweldade was iets algemeens in baie ander antieke nasies.

Wat van hedendaagse tye? Is die mensdom so beskaafd dat sulke afskuwelike seksdade nie vandag baie voorkom nie? Mense wat die Bybel bestudeer, kan hulle nie met hierdie idee vereenselwig nie. Hulle weet goed dat ons era volgens die apostel Paulus deur “swaar tye” gekenmerk sou word. Hy het gepraat van die onbeheerste eieliefde, die genotsug en die verbrokkeling van natuurlike gesinsliefde wat die hedendaagse gemeenskap teister en het bygevoeg: “Goddelose mense en bedrieërs sal voortgaan van kwaad tot erger” (2 Timotheüs 3:1-5, 13; Openbaring 12:7-12). Het kindermolestering, waaraan “goddelose mense en bedrieërs” so dikwels skuldig is, vererger?

’n Dringende probleem

Aanvalle op kinders word dikwels stilgehou, in so ’n mate dat dit al die misdaad genoem is wat moontlik die minste aangemeld word. Dit is nietemin duidelik dat sulke misdade in onlangse dekades kwaai toegeneem het. In die Verenigde State het die Los Angeles Times ’n opname oor die onderwerp gedoen. Daar is bevind dat 27 persent van die vroue en 16 persent van die mans as kinders seksueel misbruik is. Hoe skokkend hierdie statistiek ook al is, is ander noukeurige ramings vir die Verenigde State aansienlik hoër.

In Maleisië is daar gedurende die afgelope dekade vier keer soveel gevalle van kindermolestering aangemeld as in die verlede. In Thailand het ongeveer 75 persent van die mans in een opname erken dat hulle met kinderprostitute geslagsomgang het. In Duitsland skat amptenare dat tot 300 000 kinders elke jaar seksueel misbruik word. Volgens Suid-Afrika se Cape Times is daar gedurende ’n onlangse tydperk van drie jaar 175 persent meer van hierdie soort aanvalle aangemeld. In Nederland en Kanada het navorsers gevind dat ongeveer een derde van alle vroue as kinders seksueel misbruik is. In Finland het 18 persent van die standerdsewemeisies (15 of 16 jaar oud) en 7 persent van die seuns gesê dat hulle al seksuele kontak met iemand gehad het wat ten minste 5 jaar ouer as hulle was.

In verskeie lande het ontstellende feite aan die lig gekom oor godsdienskultusse wat kinders deur sadistiese seksuele gebruike en marteling molesteer. Dikwels word diegene wat aanmeld dat hulle slagoffers van sulke misdade was as ongeloofwaardig beskou en nie met medelye behandel nie.

Kindermolestering is dus niks nuuts of iets ongewoons nie; dit is ’n ou probleem wat vandag epidemiese afmetings aanneem. Die gevolge kan vernietigend wees. Baie slagoffers voel uiters nutteloos en minderwaardig. Kenners op die gebied het ’n lys opgestel van algemene gevolge wat bloedskande vir meisies het, soos om weg te loop, dwelms en alkohol te misbruik, depressie, selfmoordpogings, jeugmisdaad, promiskuïteit, slaapversteurings en leerprobleme. Op die lange duur kan dit daartoe lei dat sy onder andere ’n swak ouer is, seksueel koud is, mans wantrou, met ’n pedofiel trou, lesbies word, prostitusie beoefen en self kinders molesteer.

Hierdie dinge is nie onvermydelike gevolge vir ’n slagoffer nie; en niemand kan wangedrag met reg verskoon bloot op grond van die feit dat hulle in die verlede seksueel misbruik is nie. Die slagoffers van molestering lei nie sonder uitsondering onsedelike lewens of word misdadigers nie; hulle word ook nie heeltemal onthef van hulle persoonlike verantwoordelikheid vir die keuses wat hulle later in die lewe maak nie. Maar hierdie algemene gevolge vir slagoffers hou wesenlike gevare in. Hulle maak die volgende vraag nog dringender: Hoe kan ons kinders teen molestering beskerm?