Waarom word ons oud en gaan ons dood?
“MET die uitsondering van die ontdekking dat ouderdomsveranderinge in individuele selle plaasvind”, erken dr. Leonard Hayflick, “weet ons vandag nie veel meer oor die fundamentele oorsaak van veroudering as wat ons ’n eeu gelede geweet het nie.” Trouens, hy sê: “Ons weet van geen goeie rede waarom veroudering moet plaasvind nie.”
Laboratoriumeksperimente wat ongeveer 30 jaar gelede gedoen is, het getoon dat normale menseselle wat uit ’n fetus geneem is en in die beste omstandighede gekweek is ná ongeveer 50 verdubbelings doodgegaan het. Aan die ander kant het selle wat uit ’n baie ou mens geneem is net tussen twee en tien keer verdeel voor hulle doodgegaan het. National Geographic se boek The Incredible Machine het dus gesê: “Eksperimentele bewyse staaf die idee dat die dood by geboorte in elkeen van ons geprogrammeer word.”
Maar is die staking van selverdeling onafwendbaar? Nee, dit is nie. Volgens twee deskundiges op die gebied van veroudering, professore Robert M. Sapolsky en Caleb E. Finch, “lyk dit in werklikheid of lewende wesens op aarde nie moes verouder nie”. Dit is ironies dat daar selfs ’n paar abnormale menseselle is wat vandag nie verouder nie.
Die boek The Body Machine, onder redaksie van dr. Christiaan Barnard, wat die eerste mens-tot-mens-hartoorplanting uitgevoer het, het verduidelik: “Die ontdekking van ‘onsterflike selle’ het aan bioloë wat in veroudering belangstel hoofbrekens besorg, totdat dit duidelik geword het dat sulke selle abnormaal was.” Ja, party soorte kankerselle kan aanhoudend gekweek word deur skynbaar eindelose verdubbelings! The World Book Encyclopedia het gesê: “As wetenskaplikes kan bepaal hoe sulke abnormale selle bly lewe, sal hulle dalk insig verkry in die proses van selveroudering.” Party kankerselle kan dus vandag in die laboratorium klaarblyklik onbepaald vermenigvuldig, maar normale gekweekte selle word oud en gaan dood.
’n Foutiewe meganisme
Is menslike veroudering en dood, soos The Body Machine dit stel, die gevolg van “’n verlies aan die vermeerderingsvermoë in [normale] selle”? Indien wel, het die boek gesê, “is dit belangrik om die meganisme wat hierdie bepaalde herhalingsvermoë beheer op te spoor en te verstaan ten einde dit te manipuleer in ’n poging om die mens se lewensduur te verleng”.
Jy onthou dalk uit die vorige artikel dat dr. Hayflick gepraat het van ‘die wonderwerke wat ons van bevrugting tot geboorte neem en daarna tot seksuele rypheid en volwassenheid’. Hy het toe verwys na ‘die skynbaar eenvoudiger meganisme wat daardie wonderwerke eenvoudig vir ewig kan onderhou’.
Ondanks jare van gesamentlike pogings kon wetenskaplikes nie ’n meganisme ontdek wat die lewe vir ewig in stand kan hou nie. “Die oorsake van veroudering bly ’n raaisel”, erken die boek The Incredible Machine.
Die oorsaak van veroudering en die dood is egter geen geheim nie. Die antwoord is beskikbaar.
Wat is die antwoord?
Die een wat die antwoord het, is die een wat verantwoordelik is vir ‘die wonderwerke wat ons van bevrugting tot geboorte neem’, ons alwyse Skepper, Jehovah God. “By U is die fontein van die lewe”, sê die Bybel van hom. “Weet dat Jehovah God is. Hy het ons gemaak, en nie ons onsself nie.”—Psalm 36:10; 100:3, NW.
Dink aan hoe wonderlik Jehovah God jou ontwikkeling in die baarmoeder geprogrammeer het en as ’t ware ’n boek van instruksies geskryf het om jou ’n unieke individu te maak! “Ú het my niere gevorm, my in my moeder se skoot geweef”, het ’n Bybelpsalmis geskryf. “My gebeente was vir U nie verborge toe ek in die geheim gemaak is nie . . . U oë het my ongevormde klomp gesien; en in u boek is hulle almal opgeskrywe.” (Psalm 139:13, 15, 16, ons kursiveer.) Ons wonderlik ontwerpte menseliggaam is ongetwyfeld nie die produk van blote toeval nie!
Maar waarom word ons oud en gaan ons dood as Jehovah God ons volmaak geskep het sodat ons vir ewig kon lewe? Ons vind die antwoord in ’n verbod wat geplaas is op die eerste man, Adam, wat deur God in ’n pragtige tuiste op die aarde gesit is. God het hom beveel: “Van al die bome van die tuin mag jy vry eet, maar van die boom van die kennis van goed en kwaad, daarvan mag jy nie eet nie; want die dag as jy daarvan eet, sal jy sekerlik sterwe.”—Genesis 2:16, 17, ons kursiveer.
Wat het gebeur? In plaas van sy hemelse Vader te gehoorsaam, was Adam ongehoorsaam en het hy by sy vrou, Eva, aangesluit deur van die boom te eet. Hulle het ’n valse belofte van ’n rebelse engel gretig aangegryp (Genesis 3:1-6; Openbaring 12:9). Hulle het dus gesterf, soos God gewaarsku het. Hoewel Adam en Eva ontwerp is met die potensiaal om vir ewig te lewe, het dit van gehoorsaamheid aan God afgehang. Deur ongehoorsaam te wees, het hulle gesondig. Toe het hulle, as sondaars, die dodelike gebrek in hulle liggame aan hulle nageslag oorgedra. “Die dood [het] só tot alle mense deurgedring.”—Romeine 5:12; Job 14:4.
Dit beteken egter nie dat daar geen hoop is om veroudering en die dood te oorwin nie. Dit behoort nie moeilik te wees om te glo dat ons alwyse Skepper enige genetiese onreëlmatighede kan genees en die energie kan verskaf om ons lewe vir ewig te laat voortduur nie. Maar hoe gaan hy dit doen? En wat moet ons doen om sy beloftes van ewige lewe te geniet?