Uiteindelik—’n Regering wat ’n einde sal maak aan misdaad

DIE Bybel het voorspel dat mense in ons dag ‘liefhebbers van hulleself, liefhebbers van geld, aanmatigend, hoogmoedig, lasteraars, ongehoorsaam aan ouers, ondankbaar, dislojaal, sonder natuurlike geneentheid, nie bereid tot enige ooreenkoms nie, kwaadsprekers, sonder selfbeheersing, wreedaardig, sonder liefde vir goedheid’ sal wees (2 Timoteus 3:2, 3). Dit is hierdie soort mense wat misdade pleeg.

Aangesien mense misdade pleeg, sal misdaad afneem in die mate dat hulle ten goede verander. Maar dit was nog nooit vir mense maklik om ten goede te verander nie. Vandag is dit moeiliker as ooit tevore, want ons leef sedert 1914, ’n datum wat deur Bybelchronologie vasgestel is, in “die laaste dae” van hierdie stelsel van dinge. Soos die Bybel voorspel het, word hierdie tydperk gekenmerk deur ‘kritieke tye wat moeilik is om deur te kom’. Hierdie kritieke tye word veroorsaak deur Satan die Duiwel, die grootste misdadiger van almal, wat ‘groot toorn het, omdat hy weet dat hy ’n kort tydperk het’.—2 Timoteus 3:1; Openbaring 12:12.

Dit verklaar waarom misdaad vandag toeneem. Satan weet dat hy en sy stelsel binnekort vernietig gaan word. Gedurende die kort tydperk wat oor is, probeer hy die slegte eienskappe wat in 2 Timoteus hoofstuk 3 genoem word op elke moontlike manier in mense aanwakker. Indien ’n regering dus ’n einde aan misdaad wil maak, moet dit van Satan se invloed ontslae raak en ook mense help verander sodat hulle nie langer sal optree op die wyse wat vroeër beskryf is nie. Maar is enige regering opgewasse vir hierdie bomenslike taak?

Geen menseregering is in staat om dit te doen nie. J. Waskowitsj, ’n onderwyser in die regte in die Oekraïne, sê dat “’n gemeenskaplike, bekwame liggaam [nodig is], wat die pogings van al die staats- en openbare organisasies sal verenig en koördineer”. En president Fidel Ramos van die Filippyne het by ’n wêreldkonferensie oor misdaad gesê: “Omdat modernisering ons wêreld kleiner gemaak het, het misdaad landsgrense oorgesteek en het dit in ’n transnasionale probleem ontwikkel. Gevolglik moet die oplossings ook transnasionaal wees.”

“’n Wêreldwye tragedie”

Die Verenigde Nasies is ’n transnasionale (internasionale) liggaam. Sedert die stigting daarvan het dit misdaad probeer bekamp. Maar dit het geensins meer oplossings as wat die landsregerings het nie. Die boek The United Nations and Crime Prevention sê: “Die meeste nasies kan nie meer binnelandse misdaad in toom hou nie, en transnasionale misdaad het so toegeneem dat die internasionale gemeenskap dit nie meer kan stuit nie. . . . Georganiseerde misdaad deur kriminele groepe het onrusbarende afmetings aangeneem, met besonder ernstige gevolge in die vorm van geweld, intimidasie en korrupsie onder staatsamptenare. Tienduisende het die onskuldige slagoffers van terrorisme geword. Gewetenlose smokkelary met verslawende dwelmmiddels het ’n wêreldwye tragedie geword.”

James Madison, die vierde president van die Verenigde State, het eenkeer gesê: “In die samestelling van ’n regering waarin mense gesag uitoefen oor mense lê die groot probleem hierin: jy moet eers die regering in staat stel om die burgers te beheer; en daarna moet jy hom verplig om homself te beheer.” (Vergelyk Prediker 8:9.) Die ideale oplossing sal dus wees om regerings waarin “mense gesag uitoefen oor mense” te vervang met ’n stelsel waarin God regeer. Maar is so ’n oplossing realisties?

Die regering wat misdaad sal beëindig

Ware Christene glo wat die Bybel oor God se Koninkryk sê.a Dit is ’n werklike regering. Hoewel die Koninkryk onsigbaar is omdat dit in die hemel is, kan die sukses daarvan op die aarde gesien word (Matteus 6:9, 10). Dit bestaan uit Christus Jesus en 144 000 mense wat “uit elke stam en taal en volk en nasie” geneem is om “as konings oor die aarde [te] heers”. Hierdie magtige regering sal oor “’n groot skare” onderdane regeer wat, soos die Bybel voorspel, ook “uit alle nasies en stamme en volke en tale” kom (Openbaring 5:9, 10; 7:9). Die regeerders sowel as die onderdane het dus internasionale agtergronde, ’n waarlik verenigde volk uit alle nasies, wat Goddelike goedkeuring geniet.

Deur God se heerskappy te aanvaar, het Jehovah se Getuies in groot mate die probleem van misdaad in hulle eie geledere oorkom. Hoe? Deur die wysheid van Bybelbeginsels te leer waardeer, deur dit in hulle lewe toe te pas en deur toe te laat dat die sterkste krag in die heelal, God se gees, en die vrug daarvan—liefde—hulle aandryf. God se Woord sê: “Beklee julle . . . met liefde, want dit is ’n volmaakte band van eenheid” (Kolossense 3:14). Jehovah se Getuies in meer as 230 lande lê hierdie liefde en eenheid aan die dag, en dit toon hoe God se Koninkryk reeds stappe doen om misdaad te beëindig.

Dit kan toegelig word deur die uitslae van ’n opname in 1994 waaraan 145 958 Getuies van Jehovah in Duitsland deelgeneem het. Baie van hulle het erken dat hulle ernstige tekortkominge te bowe moes kom om Getuies te kon word. Hulle is deur hulle studie van die Bybel beweeg om dit te doen. Byvoorbeeld, 30060 het rook opgegee of dwelmverslawing oorkom; 1437 het dobbelary laat vaar; 4362 het hulle gewelddadige of kriminele gedrag verander; 11 149 het eienskappe soos jaloesie of haat te bowe gekom en 12 820 het vrede in gespanne gesinsverhoudinge herstel.

Hoewel hierdie bevindings Jehovah se Getuies in net een land insluit, is dit kenmerkend van Getuies regoor die wêreld. Neem byvoorbeeld ’n jong Oekraïner met die naam Joeri. Toe hy die Bybel saam met Jehovah se Getuies begin studeer het, was hy ’n sakkeroller. Hy het selfs na Moskou gereis waar hy geweet het dat die skares sy “werk” makliker sou maak.

In 1993 was Joeri weer in Moskou, tussen skares mense. Maar dit was nie nodig vir enige van die meer as 23 000 mense wat op Vrydag, 23 Julie, by die Lokomotief-stadion teenwoordig was om op hulle hoede vir hom te wees nie, want hy is nou een van Jehovah se Getuies. Trouens, Joeri was op die verhoog en het deelgeneem aan ’n program wat voor ’n internasionale gehoor aangebied is. Hy het ten goede verander en gehoorsaam die Bybelbevel: “Laat die steler nie meer steel nie.”—Efesiërs 4:28.

Talle ander soos Joeri het ’n kriminele lewenswyse laat vaar om vir die lewe in God se nuwe wêreld van regverdigheid in aanmerking te kom. Dit beklemtoon die woorde van waarheid wat sir Peter Imbert, ’n voormalige Britse polisiebeampte, gespreek het: “Misdaad sou oornag beheer kon word as almal bereid was om hulle in te span.” Die Bybelonderrigprogram wat deur God se regering aangebied word, gee opregtes van hart die dryfkrag wat hulle nodig het “om hulle in te span”.

’n Wêreld sonder misdaad

Enige vorm van misdaad toon ’n gebrek aan liefde vir ander. Christene volg die voorbeeld van Jesus, wat gesê het: “Jy moet Jehovah jou God liefhê met jou hele hart en met jou hele siel en met jou hele verstand.” En: “Jy moet jou naaste liefhê soos jouself.”—Matteus 22:37-39.

Die enigste regering wat vasbeslote is om ’n einde aan misdaad te maak deur mense te leer om hierdie twee gebooie te gehoorsaam, is God se Koninkryk. Vandag vind meer as vyfmiljoen Getuies van Jehovah by hierdie onderrigting baat. Hulle is vasbeslote om te keer dat kriminele neigings in hulle hart posvat en is bereid om persoonlik enige poging aan te wend om tot ’n misdaadvrye wêreld by te dra. Wat God in hulle lewe vermag het, is maar net ’n voorsmaak van wat hy in sy nuwe wêreld onder die heerskappy van sy hemelse regering gaan doen. Stel jou ’n wêreld voor waarin daar geen polisiemanne, regters, regsgeleerdes of gevangenisse nodig sal wees nie!

Om dit op ’n wêreldskaal teweeg te bring, sal die grootste regeringsomwenteling in die geskiedenis behels, wat deur God self bewerkstellig sal word. Daniël 2:44 sê: “In die dae van dié konings [wat vandag bestaan] sal die God van die hemel ’n [hemelse] koninkryk verwek wat in ewigheid nie vernietig sal word nie, en die heerskappy daarvan sal aan geen ander volk oorgelaat word nie; dit sal al daardie koninkryke verbrysel en daar ’n einde aan maak, maar self sal dit vir ewig bestaan.” God sal Satan ook verbrysel en sy bose invloed tot ’n einde bring.—Romeine 16:20.

Wanneer menseregerings deur God se hemelse regering vervang is, sal mense nooit weer oor mekaar regeer nie. Hemelse konings—konings wat selfs hoër as die engele is—sal die mensdom lei in die weë van regverdigheid. Dan sal daar nie meer sluipmoorde, gifgasaanvalle of terroristebomme wees nie! Daar sal nie meer maatskaplike ongeregtighede wees wat tot misdaad aanleiding gee nie! Daar sal nie meer rykes en armes wees nie!

Professor S. A. Aluko, van die Obafemi Awolowo-universiteit in Nigerië, het opgemerk: “Die armes kan snags nie slaap nie omdat hulle honger is; die rykes kan nie slaap nie omdat die armes wakker is.” Maar binnekort sal almal rustig kan slaap in die wete dat ’n regering—God se regering—uiteindelik ’n einde gemaak het aan misdaad!

[Voetnoot]

[Prent op bladsy 10]

’n Voormalige dief en sy slagoffer, nou as Christenbroers verenig