Ons beste vriend is in die geesteryk

DIE Bybel gee ons ’n duidelike beeld van diegene wat in die geesteryk woon. Jehovah God is oppermagtig in die hemel. Naas Jehovah het Jesus Christus die grootste mag en gesag. Engele wat getrou aan God is, dien as bedienaars vir God sowel as sy volk op aarde. Satan en sy demone staan God teë en mislei mense. Die dooies slaap in die dood totdat God hulle opwek.

Die demone wil ons aanbidding hê

Aangesien die dooies leweloos is, hou dit geen voordeel in om hulle te aanbid nie. Deur offerandes aan die dooies te bring, bevorder ons net Satan en die demone se leuens.

Begeer God se engele ons aanbidding? Glad nie! Getroue engele verheerlik God en moedig mense aan om dieselfde te doen. Die apostel Johannes het by twee geleenthede probeer om engele te aanbid, maar hulle het hom bestraf en gesê: “Pas op! Moet dit nie doen nie! . . . Aanbid God.”—Openbaring 19:10; 22:8, 9.

Satan en sy demone wil, in teenstelling met getroue engele, wel aanbid en verheerlik word. Dit was duidelik toe Satan Jesus probeer versoek het toe Jesus ’n mens op aarde was. Die Bybel deel ons mee: “Die Duiwel [het Jesus] saamgeneem na ’n buitengewoon hoë berg en hom al die koninkryke van die wêreld en hulle heerlikheid gewys, en hy het vir hom gesê: ‘Al hierdie dinge sal ek jou gee as jy neerval en ’n daad van aanbidding teenoor my verrig.’”—Matteus 4:8, 9.

Jesus het geantwoord: “Gaan weg, Satan! Want daar staan geskrywe: ‘Dit is Jehovah jou God wat jy moet aanbid, en dit is aan hom alleen wat jy heilige diens moet verrig’” (Matteus 4:10). Jesus het Jehovah se Wet geken, en hy het geweier om dit te skend.—Deuteronomium 6:13.

Hoewel Satan Jesus nie kon oorhaal om hom te aanbid nie, het hy dit wel met ander reggekry. Min mense aanbid Satan natuurlik doelbewus. Satan en die demone het nietemin deur middel van bedrieëry, misleiding, leuens en vrees soveel mense van die ware aanbidding van Jehovah afgekeer dat die apostel Johannes geskryf het: “Die hele wêreld lê in die mag van die bose” (1 Johannes 5:19). Diegene wat aanbidding beoefen op maniere wat in stryd met God se Woord is, eer Satan en nie Jehovah nie. Die Bybel waarsku dat “die nasies die dinge wat hulle opoffer aan demone opoffer en nie aan God nie”.—1 Korintiërs 10:20.

Aanbidding kom Jehovah toe

Ons aanbidding moet tot God alleen gerig wees. Jehovah het aan Moses gesê: “Jy mag geen ander gode voor my aangesig hê nie. Jy mag vir jou geen gesnede beeld of enige gelykenis maak van wat bo in die hemel is, of van wat onder op die aarde is, of van wat in die waters onder die aarde is nie. Jy mag jou voor hulle nie neerbuig en hulle nie dien nie; want Ek, die HERE jou God, is ’n jaloerse God.”—Exodus 20:3-5.

Hoewel Jehovah se majesteit ontsagwekkend is, is hy genaakbaar. Die dissipel Jakobus het geskryf: “Kom nader aan God, en hy sal nader aan julle kom” (Jakobus 4:8). Die apostel Paulus het gesê: “[God is] nie ver van elkeen van ons af . . . nie” (Handelinge 17:27). En die apostel Johannes het geskryf: “Dít is die vertroue wat ons teenoor [Jehovah] het, dat hy ons hoor, ongeag wat ons volgens sy wil vra. Verder, as ons weet dat hy ons hoor met betrekking tot wat ons ook al vra, weet ons dat ons die dinge gaan kry wat ons gevra het, aangesien ons dit van hom gevra het.”—1 Johannes 5:14, 15.

Let op dat Johannes geskryf het dat Jehovah ons versoeke sal toestaan as ons “volgens sy wil” vra. Om te weet wat God se wil is, moet ons uitvind wat die Bybel leer. Jehovah se Getuies sal jou met graagte help om die Bybel te verstaan.

Namate jy meer aangaande Jehovah leer, sal jy meer kennis opdoen oor diegene wat in die geesteryk woon. Hierdie kennis bring vryheid mee van bygelowe, opvattings en tradisies wat Satan gebruik om mense in vrees en slawerny te hou. Deur middel van juiste kennis van God sal jy leer om op hom te vertrou vir hulp om die alledaagse lewensprobleme te vermy of te oorkom. Jy kan ’n vriend van God word. En God sal vir jou “’n toevlug en sterkte [wees], ’n hulp wat maklik gevind kan word in benoudhede”.—Psalm 46:1, NW.

Bose magte gaan vernietig word

Moet nooit daaraan twyfel dat die goeie geesmagte oor die bose geesmagte sal seëvier nie. ’n Oorlog is reeds in die geesteryk gevoer wat die hemele van Satan en sy bose metgeselle gereinig het. Die boek Openbaring sê: “Oorlog het in die hemel uitgebreek: Migael [die verrese Jesus Christus] en sy engele het teen die draak geveg, en die draak en sy engele het geveg, maar hy het nie geseëvier nie, en ook is daar nie langer vir hulle ’n plek in die hemel gevind nie. Toe is die groot draak neergeslinger, die oorspronklike slang, die een wat Duiwel en Satan genoem word, wat die hele bewoonde aarde mislei; hy is na die aarde neergeslinger, en sy engele is saam met hom neergeslinger.”—Openbaring 12:7-9.

Wat was die resultaat van daardie oorlog? Die verslag sê voorts: “Wees om dié rede bly, o hemele en julle wat daarin woon! Wee die aarde en die see, want die Duiwel het na julle toe neergedaal en het groot toorn, omdat hy weet dat hy ’n kort tydperk het” (Openbaring 12:12). Diegene in die hemel kon hulle verbly, aangesien Satan en sy demone nie meer daar was om moeilikheid te veroorsaak nie. Maar die feit dat hy uit die hemel gewerp is, het baie weë, groot probleme, vir diegene op die aarde meegebring. Ons lewe nou in daardie tyd van weë.—2 Timoteus 3:1-5.

’n Toekoms sonder boosheid

Maar die Bybel bied ook hoop. Dit verseker ons dat die Duiwel “’n kort tydperk” het voordat hy buite aksie gestel word. Wanneer dit gebeur, sal Jehovah wonderlike seëninge teweegbring vir almal op aarde wat sy vriende wil wees. Beskou ’n paar van sy beloftes vir die toekoms:

“Daar [sal] volheid van koring wees in die land, op die top van die berge.”—Psalm 72:16.

“My uitverkorenes sal die werk van hulle hande self geniet. Hulle sal hul nie tevergeefs vermoei . . . nie.”—Jesaja 65:22, 23.

“Geen inwoner sal sê: Ek is siek nie.”—Jesaja 33:24.

“Dan sal die oë van die blindes geopen en die ore van die dowes ontsluit word. Dan sal die lamme spring soos ’n takbok, en die tong van die stomme sal jubel.”—Jesaja 35:5, 6.

“En [God] sal elke traan van hulle oë afvee, en die dood sal daar nie meer wees nie, en ook verdriet en geskreeu en pyn sal daar nie meer wees nie. Die vorige dinge het verbygegaan.”—Openbaring 21:4.

“Die regverdiges sal die aarde besit en vir ewig daarop woon.”—Psalm 37:29.

Net Jehovah, die ware God, kan sulke wonderlike beloftes vervul. Niks sal keer dat hy sy voorneme volbring nie. “By God sal geen verklaring ’n onmoontlikheid wees nie.”—Lukas 1:37.

[Prente op bladsy 9]

Wanneer jy God se vriend word, sal hy jou help om lewensprobleme die hoof te bied