’n Wêreld sonder gierigheid

“SONDER ’n wêreldwye omwenteling in die menslike bewustheidsfeer sal niks in ons menswees ten goede verander nie, en sal die ramp waarop die wêreld afstuur . . . onafwendbaar wees.”—Vaclav Havel, president van die Tsjeggiese Republiek.

Baie mense besef dat die huidige wêreldstelsel nie kan voortbestaan nie. Party, soos Vaclav Havel, glo dat ’n wêreldwye verandering in mense se denke en dade die enigste oplossing is. ’n Waarnemer van die huidige wêreldsituasie sê byvoorbeeld: “Vir honderdmiljoene van dié wat brandarm is, sal die vooruitsig op voedsel en ander noodsaaklikhede nie verbeter nie . . . tensy die nasies van die wêreld daadwerklik optree om huidige neigings te verander.”—Food Poverty & Power.

Is dit egter realisties om ons hoop om staande te bly op die een of ander fundamentele verandering in die menslike natuur te vestig? Kan ons met vertroue op regerings staatmaak om ‘daadwerklik op te tree om huidige neigings te verander’? Party mense dink so. ‘God het ons wilsvryheid gegee, en dit is ons plig om dinge te verander’, sê hulle. Maar die naakte feite van die geskiedenis laat ernstige vrae ontstaan oor die mens se begeerte en vermoë om die nodige veranderinge aan te bring. Hierdie beskouing is nie pessimisties nie, maar eerder realisties. Sal jy ’n chirurg met jou lewe vertrou as jy weet dat al sy vorige pasiënte gesterf het?

’n Kwessie van opvoeding?

“Die probleem is opvoedkundig van aard”, sê Ted Trainer, in Developed to Death—Rethinking Third World Development. Hy sê dat “ons nie kan hoop om ’n oorgang te bereik na ’n wêreldorde wat staande sal bly nie”, tensy mense geleer kan word om te besef dat ’n fundamentele verandering nodig is. Dit ly geen twyfel dat mense geleer moet word hoe belangrik ’n verandering in gesindhede en dade is as ons wil hê dat die wêreld moet voortbestaan nie. Trouens, dit is noodsaaklik, en die Bybel praat van so ’n onderrigtingsprogram. Dit sê dat die aarde “vol [sal] wees van die kennis van die HERE”. Dan sal niemand enige “kwaad doen of verderf aanrig” op die hele aarde nie.—Jesaja 11:9.

Maar geen opvoeding, nie eens God se onderrigtingsprogram, sal op sigself die aarde bevry van gierige mense wat baie skade aanrig en wydverspreide verderf veroorsaak nie. Opvoeding sal slegs veranderinge voortbring in mense wat wil verander, mense wat volgens God se standaarde wil lewe. Volgens Jesus Christus is hulle in die minderheid (Matteus 7:13, 14). Die Bybel baseer dus nie sy belofte van veranderinge op die een of ander hersenskim dat die mensdom eendag skielik sal agterkom hoe ernstig die probleem is en hulle weë sal verander nie. Dit sê dat God daadwerklik sal optree om die aarde van gierige mense te bevry.

Goddelike ingryping

Baie mense beskou hierdie idee van daadwerklike optrede deur God as ’n droom of ’n illusie. “Intellektuele deurbrake in die agtiende eeu het ons gedwing om die vertroostende gedagte te laat vaar van ’n God wat sal ingryp en die mens se huis sal regruk”, sê World Hunger: Twelve Myths. Maar moet ons ons vertroue stel in die intellektuele argumente en filosofieë van mense wat nie meer glo aan “’n God wat sal ingryp” nie? Is dit nie eerder húlle oplossings wat ’n illusie is nie?

Dit is verstandiger om ons hoop om staande te bly te baseer op die onfeilbare profesieë in die Bybel wat toon dat God gaan ingryp. Om God se beloftes te glo, is nie net ’n “vertroostende gedagte” nie—dit is die enigste realistiese hoop wat ons het om staande te bly!

‘Verderf die verderwers van die aarde’

Wat belowe God presies? Wel, vir eers belowe hy om die aarde te bevry van diegene wat die omgewing besoedel en vernietig. Openbaring 11:18 sê dat hy ’n “vasgestelde tyd” het om “die verderwers van die aarde te verderf”. Wat sal dit beteken? Dit sal die einde beteken van almal wat tans die armes en die swakkes verdruk. God sal “aan die ellendiges van die volk reg verskaf, die kinders van die behoeftige verlos en die verdrukker verbrysel”. Hy sal ontslae raak van die gieriges en hulle onskuldige slagoffers voorspoedig laat wees. “Hy sal die behoeftige red wat daar roep om hulp . . . Hy sal hulle siel verlos van verdrukking en geweld.”—Psalm 72:4; 12-14.

Wat ’n verandering sal dit tog teweegbring! Volgens die apostel Petrus sal hierdie verandering so alomvattend wees dat dit “nuwe hemele en ’n nuwe aarde” sal voortbring (2 Petrus 3:13). Op hierdie “nuwe aarde” sal elkeen ’n regmatige deel van die aarde se opbrengs geniet (Miga 4:4). Daar is selfs nóú volop voedsel vir almal. Die probleem is ongelyke verdeling. “Daar is al geraam dat ons genoeg op die potensieel bewerkbare deel van die aardbol kan produseer om 38-48 miljard mense te onderhou”, sê Anne Buchanan in haar boek Food Poverty & Power.

Hierdie planeet sal voortbestaan. Die Skepper daarvan “het dit nie geskape om woes te wees nie, maar dit geformeer om bewoon te word” (Jesaja 45:18). God se optrede teen gierige mense sal beteken dat daar ’n kort tydperk van “groot verdrukking” sal wees (Matteus 24:21). Oorlewendes van daardie verdrukking sal dan ’n paradysaarde geniet wat bewoon sal word deur mense wat glad nie gierig is nie (Psalm 37:10, 11; 104:5). Dit sal wees soos die Bybel belowe: “Die Here HERE sal die trane van alle aangesigte afvee.”—Jesaja 25:8.

Jy kan een van die vreugdevolles wees wat baat sal vind by God se optrede om die aarde van gierigheid te reinig. As jy werklik God se wil wil doen, moet jy dan gebruik maak van al die hulp wat voorsien word sodat jy nóú in ’n gierige wêreld staande kan bly. Doen stappe om die “groot verdrukking” te oorleef. Jehovah se Getuies kan jou help om uit te vind wat jy moet weet. Kom gerus met hulle in aanraking by die plaaslike Koninkryksaal of skryf na die naaste adres op bladsy 5.