’n Wêreldwye oplossing—is dit moontlik?
DESKUNDIGES stem saam dat tuberkulose (TB) ’n wêreldwye probleem is wat ’n wêreldwye oplossing verg. Geen land kan TB alleen beheer nie, aangesien miljoene mense elke week internasionale grense oorsteek.
Baie meen dat internasionale samewerking vereis dat arm lande, wat die kwaaiste deur TB getref word, deur ryk lande gehelp word. Soos dr. Arata Kochi sê, “is dit in die belang van ryk lande om minder ontwikkelde lande te help om tuberkulose te bestry, voordat hulle eie land die strydtoneel word”.
Maar ryk lande, wat te kampe het met wat hulle meen dringender prioriteite en probleme is, het nie die armer lande te hulp gesnel nie. Party arm lande verwaarloos dikwels self gesondheidsorg en bestee eerder groot bedrae geld aan hulle wapentuig. Teen die middel van 1996 is net 10 persent van die wêreld se TB-pasiënte met die DOTS-metode behandel, te min om te keer dat die epidemie vererger.
Die WGO sê: “Die kennis en goedkoop geneesmiddels om TB te genees, bestaan al dekades lank. Wat die wêreld nou nodig het, is ’n deurbraak deur mense met mag, invloed en medelye wat sal toesien dat hierdie medisyne regoor die wêreld doeltreffend gebruik word.”
Die toekomstige oorwinning
Kan ons met vertroue op mense met mag en invloed reken om die probleem op te los? Die geïnspireerde Bybelpsalmis het geskryf: “Vertrou nie op prinse, op die mensekind, by wie geen heil is nie.” Op wie kan ons dan vertrou? Die teks sê verder: “Welgeluksalig is hy wat die God van Jakob het as sy hulp, wie se hoop is op die Here sy God, wat hemel en aarde gemaak het, die see en alles wat daarin is.”—Psalm 146:3, 5, 6.
As die Ontwerper en Skepper van die aarde het Jehovah God die krag sowel as die wysheid om ’n einde aan siekte te maak. Het hy medelye? Jehovah beloof deur sy geïnspireerde profeet: “Ek sal met [my volk] medelyde hê soos ’n man medelyde het met sy seun wat hom dien.”—Maleagi 3:17.
Die slothoofstuk van die Bybel beskryf ’n visioen wat aan die apostel Johannes gegee is. Hy het “bome van die lewe [gesien] wat twaalf vrugteoeste voortbring, wat elke maand hulle vrugte oplewer”. Hierdie simboliese bome en die vrugte wat hulle voortbring, beeld Goddelike voorsienings af wat gehoorsame mense in staat sal stel om vir ewig op die aarde te lewe.—Openbaring 22:2.
Johannes het verder geskryf: “Die blare van die bome was vir die genesing van die nasies.” Die simboliese blare beeld seëninge van God af wat sal lei tot die genesing van die mensdom, geestelik sowel as fisies. Ons kan dus seker wees dat TB in die regverdige nuwe wêreld onder God se heerskappy heeltemal en vir altyd oorwin sal word.—Openbaring 21:3, 4.
[Prent op bladsy 8, 9]
God beloof permanente genesing vir die mensdom