Ons beskou die wêreld
Bosbrande in Mexiko
’n Hele aantal bosbrande wat teen die middel van April ongeveer 140 000 hektaar in Mexiko vernietig het, is as “’n ekologiese ramp” beskryf. Volgens Julia Carabias Lillo, ’n sekretaresse van die federale regering van Mexiko, het sowat 6800 brande teen daardie tyd in Mexiko gewoed in wat die kritiekste seisoen van brande in die afgelope 57 jaar genoem is. Hoewel die temperature bo die gemiddelde en die reënval laag was, was die meeste brande “die gevolg van mense se dade—die resultaat van onkunde, van onverantwoordelikheid en selfs van kriminele gedrag”, berig die koerant El Universal. Octavio Escobar López, streekdirekteur van die Komitee vir Natuurlike Hulpbronne, het gesê: “Dit sal ongeveer tien jaar neem om al die flora en fauna terug te kry wat ons in ’n bietjie meer as drie dae verloor het.”
Oefening en langlewendheid
“Dit lyk of die gevaar van [voortydige] dood met 44 persent verminder word as ’n mens net ses keer per maand ’n halfuur lank teen ’n flinke pas stap”, berig The New York Times oor ’n onlangse studie omtrent langlewendheid. Navorsers in Finland het gemiddeld 19 jaar lank byna 8000 stelle tweelinge bestudeer en bevind dat selfs diegene wat net af en toe oefeninge gedoen het “se kans om langer te lewe 30 persent groter is as hulle onaktiewe tweeling”. Die studie is betekenisvol omdat genetiese faktore in aanmerking geneem is om die doeltreffendheid van oefening te bepaal. Steve Farrell, ’n aërobiese navorser wat nie by die studie betrokke was nie, het gesê: “Selfs al het jy swak gene toon hierdie studie duidelik dat jy langer kan lewe as jy fisies aktiewer is.”
Geveerde misdadigers?
Die polisie in Suid-Afrika het ’n diamantsmokkelary oopgevlek waarin voëls gebruik is. Die polisie sê dat werknemers by ’n staatsdiamantmyn posduiwe in kosblikke of los klere stop om hulle in die myn in te smokkel. Daar maak hulle diamante aan die voëls vas en laat hulle dan in die lug vry, berig die Los Angeles Times. Die posduiwe kan kilometers ver met die edelstene vlieg. Gedurende die afgelope paar jaar is vier voëls al gevang wat smokkeldiamante gedra het. In een geval is ’n posduif gevind met ses karaat ongeslypte diamante wat onderaan sy vlerke vasgemaak is. Tot dusver is ongeveer 70 mense wat hierdie metode gebruik het in hegtenis geneem. Die koerant het gesê dat maatskappyamptenare raam dat byna 1 uit 3 diamante wat uit die ou rivierbedding ontgin word deur oneerlike werknemers gesteel word.
Geenmanipulering
Gedurende die afgelope dekade het wetenskaplikes talle dinge aangaande die gene ontdek wat glo komplekse eienskappe en versteurings in mense beheer. Party wetenskaplikes het voorspel dat dit die mensdom eendag in staat sal stel om gene te manipuleer en om ongewenste karaktertrekke uit te skakel. The New York Times berig byvoorbeeld dat Lee Silver, ’n bioloog van die Universiteit van Princeton, beweer dat ons afstammelinge slimmer en meer atleties sal wees en honderde jare lank sal lewe. Maar John Horgan, die skrywer van The End of Science, sê: “Navorsers hoop dat hulle mense se persoonlikheid deur middel van geenmanipulering sal kan verander. Maar tot dusver is nie een van hierdie bewerings wat gene met ingewikkelde eienskappe verbind deur opvolgstudies bevestig nie.” Horgan voeg derhalwe by: “Deur die aandag op die wetenskap se mislukkings sowel as op die werklike suksesse daarvan te vestig, sal wetenskaplikes en joernaliste dalk ’n minder verdraaide, eerliker beeld van die wetenskap se ware vooruitsigte gee.”
Plaasprodukte minder voedsaam?
Is vrugte en groente vandag minder voedsaam as gevolg van gronduitputting? Volgens grondkundiges is die antwoord nee. Die University of California Berkeley Wellness Letter sê: “Vitamiene in plante word deur die plante self vervaardig.” As die grond dus nie die nodige minerale het nie, sal plante nie behoorlik groei nie. Die plant sal dalk nie blom nie, of dit sal dalk eenvoudig verlep en doodgaan. Om dit te voorkom, gebruik boere kunsmis om minerale in die grond terug te sit. Die Wellness Letter sê: “As die vrugte en groente wat jy koop gesond lyk, kan jy seker wees dat hulle die voedingstowwe bevat wat hulle moet hê.”
Huise sonder kombuise gebou
Daar word geraam dat die helfte van alle maaltye in Australië nou nie meer by die huis geëet word nie. Hierdie tendens het so ’n groot uitwerking gehad dat party woonstelle in Sydney sonder kombuise gebou word, berig The Courier-Mail. Daarbenewens moes baie Australiese supermarkte opnuut kyk na die soort voedsel wat hulle aanbied, want Australiërs bestee gemiddeld net 20 minute daaraan om maaltye voor te berei. Die bestuurder van ’n groot supermarkketting in Sydney sê dat Australië die voorbeeld van die Verenigde State volg, waar die meeste maaltye nie by die huis geëet word nie.
Misdaad en rassisme
’n Onlangse toename in misdaad in Griekeland word deur party toegeskryf aan die instroming van vlugtelinge en immigrante uit Oos-Europa en die Balkan, veral Albanië. Richardos Someritis, ’n rubriekskrywer vir die koerant To Vima, sê dat kommer oor hierdie toename in misdaad “xenofobiese en heel dikwels rassistiese gevoelens” teenoor uitlanders in daardie land gewek het. Daar is nietemin bewys dat buitelanders geensins by meer misdade betrokke is as Grieke nie. Opnames het byvoorbeeld getoon dat “96 uit 100 misdade deur [Grieke] gepleeg word”, berig die koerant. “Die oorsake van kriminele bedrywighede is ekonomies en maatskaplik van aard”, sê Someritis, “en hou nie met ‘ras’ verband nie.” Hy gee die media ook die skuld omdat hulle “stelselmatig xenofobie en rassisme kweek” met hulle skewe dekking van misdaad in Griekeland.
Dopgehou deur middel van ’n mikroskyfie
Hardlopers wat in vanjaar se Boston-maraton meegeding het, het iets ekstra saamgedra gedurende die hele wedloop van 42,2 kilometer—’n mikroskyfie. Volgens die tydskrif InformationWeek is ’n elektroniese skyfie aan die klere van alle geregistreerde hardlopers vasgemaak om hulle vordering te monitor. Die skyfies is geprogrammeer om “deur radiofrekwensieontvangers gelees te word wat elke vyf kilometer opgerig is”. Die hardlopers se tyd is dan na die wedloop se hoofkwartier gestuur, waar dit op die Internet gesit is. Sodoende kon maratonentoesiaste hulle gunstelinghardlopers se vordering volg, en enige hardloper wat probeer kul het deur nie die hele roete te hardloop nie, is deur hierdie nuwe tegnologie uitoorlê.
Skaars hert weer in China ontdek
“Die Tibettaanse edelhert, wat meer as 50 jaar lank as uitgestorwe beskou is, is weer in die Shannan-prefektuur in die Outonome Streek Tibet ontdek”, berig China Today. Die edelhert, wat ongeveer 1,2 meter hoog staan en ongeveer 110 kilogram weeg, is jare lank op groot skaal uitgedun deur jagters wat hulle kosbare horings wou hê. Oorlog en omgewingsveranderinge het ook hulle tol geëis. Daar word geraam dat minder as 200 van hierdie pragtige herte nog oor is, en hulle verskyn op die lys van bedreigde spesies.
Geheuespeletjies
Deelnemers aan die eerste Amerikaanse Nasionale Geheuekampioenskap het onlangs hulle vaardighede getoets deur vyf geheuespeletjies te speel. Die toetse was om 100 gesigte van gewone mense te memoriseer, om ’n gedig van 50 reëls (asook leestekens) te memoriseer, om 125 Engelse selfstandige naamwoorde (in die regte volgorde) te onthou, om ’n lys willekeurige nommers te memoriseer en om ’n pak van 52 speelkaarte (wat geskommel en onderstebo neergesit is) te onthou. Een mededinger, Wallace Bustello, het sy mededeelnemers beïndruk deur 109 opeenvolgende nommers wat willekeurig gekies is te onthou. Maar die algehele wenner was die 26-jarige Tatiana Cooley. Volgens die Daily News van New York het sy en haar vader, wat satelliete vir ’n ruimtevaartmaatskappy programmeer, in geheuetoetse by die huis meegeding. “Ek het gewoonlik gewen”, sê Tatiana.
Fees by die Gangesrivier
Miljoene Hindoes het hulle in April in die Gangesrivier gebad toe die Kumbh Mela, of bekerfees, sy klimaks bereik het. Die Kumbh Mela is ’n drie maande lange Hindoe-fees wat die gawe van onsterflikheid vier. Die fees word elke drie jaar gehou en vind beurtelings in die vier Indiese stede plaas waar die nektar van onsterflikheid, volgens legende, op die aarde geval het toe gode en demone in die hemel oor die besit daarvan baklei het. In die verlede het stormlope om in Indië se heilige water te bad die dood van baie tot gevolg gehad.