Behou ’n gebalanseerde beskouing van musiek
DIE musiekbedryf het vandag ’n omset van miljarde rande. Gewilde musikante en hulle bestuurders verdien baie geld. Maar dit is so dat hartseer, ontydige dood en selfmoord die lot van party uiters suksesvolle musikante was. En daar is meer as genoeg bewyse dat party musiek sedelik, emosioneel en geestelik verderflik is en tot gewelddadige, antisosiale gedrag kan lei.
Dit is nietemin goed om ’n gebalanseerde beskouing van musiek te hê. Hoewel daar baie dinge is wat in hierdie kunsvorm verkeerd en skadelik is, kan musiek ’n mens se lewe verryk en ’n mate van vreugde en tevredenheid bring. Dit kan ons emosioneel en geestelik ophef. Neem net ’n paar voorbeelde.
Die 150 psalms van die Bybel is letterkundige meesterstukke—liriese gedigte, heilige liedere en gebede. Vandag word dit met plesier in honderde tale gelees. Maar die eertydse Hebreërs het nie net die psalms gelees nie; hulle het dit gesing. Hulle het dit dikwels met pragtige musiekbegeleiding gedoen—’n kragtige manier om die wysheid van hulle God, Jehovah, soos dit in die woorde uitgedruk is, met die emosies te verbind wat opgeleide sangers aan die luisteraars kon oordra. Hebreeuse musiek was alles behalwe te eenvoudig of selfs primitief, en die gehalte en styl daarvan was blykbaar meer verhewe as dié van die omliggende nasies van die tyd.
Later het die Christene van die eerste eeu psalms en ander gewyde liedere gesing om God te loof en om gespanne emosies te kalmeer. Musiek het dus hulle lewe verryk. En deur gewyde liedere te sing, het hulle die kennis van God, wat hulle nodig gehad het om hulle lewe te rig, dieper in hulle hart vasgelê.—Matteus 26:30; Handelinge 16:25.
Die eertydse Grieke het geglo dat musiek die menslike persoonlikheid ontwikkel en ’n man of ’n vrou meer volkome maak. In hierdie 20ste-eeuse wêreld, wat opvoeding in die wetenskap, ekonomie en logika beklemtoon, word die ontwikkeling van die emosionele sy van ’n mens se persoonlikheid deur middel van die kunste dikwels verwaarloos.
Bly gebalanseerd
Dit kan ’n voordelige en aangename ondervinding wees om na ’n mooi musiekstuk te luister. Maar ’n mens kan selfs meer genot daaruit put om ’n musiekinstrument te bespeel of saam met ’n groep vriende te sing. Musiekgeletterdheid kan ’n deur tot baie geleenthede van ware genot wees.
Soos met ander goeie dinge in die lewe is dit natuurlik nodig om matigheid en goeie oordeel aan die dag te lê en selektief te wees wat hierdie soort vermaak betref. Dit is nie net waar van die soort musiek wat ons kies nie, maar ook hoeveel tyd ons daaraan bestee om na musiek te luister of musiek te maak.
As ’n sekere soort musiek ’n negatiewe uitwerking op jou emosies, optrede en verhoudings begin hê, moet jy jou keuse van musiek verander. Beskerm dus jou ore om jou emosies te beskerm om jou hart en verstand te beskerm!
Dit is veral waar wat die lirieke betref. Dit kan jou begin vorm volgens die denke van diegene wat nie jou beskouing van die lewe en sedelikheid deel nie en eerder goddelose, onsedelike lewenswyses bevorder. In party gevalle kan selfs die titel van ’n liedjie die verkeerde gevoelens begin opwek.
God se Woord, die Bybel, vermaan diegene wat hom wil behaag om hulle “liggame aan te bied as ’n offerande wat lewend, heilig en vir God aanneemlik is, ’n heilige diens met [hulle] denkvermoë” (Romeine 12:1). Dit spreek vanself dat ons emosies ’n deel van daardie ‘lewende offerande’ is. As ons dus ooit vind dat ons emosies, deur die krag van musiek, ons goeie oordeel en denkvermoë begin vertroebel en ons verkeerde dinge laat doen, is dit tyd om die musiek waarna ons luister te verander. Onthou: Die krag van musiek kan jou hart en jou verstand—óf ten goed óf ten kwade—beïnvloed!
[Venster/Prent op bladsy 10]
Musiek verbeter leervermoë
“Navorsing toon dat ’n baba se leervermoë verbeter kan word as hy gereeld harmonieuse musiek hoor. Maar in baie huise hoor hulle dit nooit nie.”—Audio, Maart 1999.