Van ons lesers
Werkloosheid Ek wil vir julle sê hoe bemoedigend die artikel “Wat het van die ‘lewenslange betrekking’ geword?” (8 Oktober 2000) vir my was. Die wenke oor hoe om vir afskaling voor te berei en hoe om werkloosheid te oorleef, was wonderlik. Ek voel meer op my gemak vir die onderhoud waarvoor ek moet gaan.
F. W., Verenigde State
Chinese apteek Ek is bekommerd oor die teorie agter die alternatiewe behandeling wat in die artikel “’n Besoek aan ’n Chinese apteek” (8 November 2000) beskryf is. Ek het geen beswaar teen die gebruik van kruie nie. Maar is daar nie meer betrokke by jin en jang as net warm en koud nie? Julle het ’n leerstelling wat sy oorsprong by die okkulte en valse godsdiens het, oorvereenvoudig. Maak hierdie oorsprong dit nie gevaarlik nie?
V. A., Verenigde State
Dit is waar dat die beginsel van jin en jang in die Ooste al op baie gebiede toegepas is, insluitende waarsêery. Maar dit sal nie die gebruik daarvan op ander maniere wat nie deur die Skrif verbied word nie, soos om ’n mediese diagnose te maak, uitsluit nie. Individuele Christene moet dus besluit of hulle vorme van geneeskunde sal gebruik wat op hierdie beginsel gebaseer is.—RED.
Kinders se probleme Ek is diep geraak deur die reeks “Kinders se probleme—Uiteindelik die oplossing!” (8 Desember 2000). Ek het slegte herinneringe van my kinderdae. My ma het gedrink en het my amper elke dag mishandel. Na ’n ruk het ek depressief geraak en wou ek dikwels sterf. Die artikel het my herinner aan hoe belangrik die band tussen kinders en ouers is. Noudat ek Jehovah se liefde vir my ondervind het, probeer ek om meer begrip vir my ma te toon; sy het ’n soortgelyke ondervinding in haar kinderjare gehad.
U. P., Republiek van Korea
Ek is ’n onderwyseres wat oorspronklik van Argentinië af kom, en ek dink dit sal wonderlik wees as alle ouers en onderwysers die raad in hierdie tydskrif toepas—en in die Bybel, wat julle so baie aanhaal.
F. S., Spanje
Woede Ek het die nuusbrokkie “Woede en jou hart” in “Ons beskou die wêreld” (8 Desember 2000) gelees. Dit is so waar. Ek het ’n hartprobleem wat my dikwels moeg en siek laat voel. Dit is vir my ’n uitdaging om skool toe te gaan omdat ek nie kan toelaat dat ek kwaad word nie. Maar met Jehovah God se hulp kry ek dit reg om woede uit my lewe te hou.
A. F., Verenigde State
Prostaatprobleme Ek het die onlangse artikel “Hulp met prostaatprobleme” (8 Desember 2000) baie waardeer. Maar dit het glad nie melding gemaak van die radioaktiewe saadinplantingsprosedure nie. Daar is onlangs in bekende Amerikaanse tydskrifte daaroor berig gelewer en dit het min newe-effekte.
H. Z., Verenigde State
Dankie dat jy ons lesers van hierdie behandeling bewus maak. Verslae toon dat radioaktiewe saadterapie (bragiterapie) minder ontwrigtend vir ’n pasiënt is as tradisionele chirurgie en dat dit in sommige gevalle net so doeltreffend is. Nog tyd sal egter moet verloop voor dokters sal weet watter langtermynuitwerking dit het. Intussen moet pasiënte presies uitvind wat hulle opsies is voor hulle ’n keuse maak.—RED.
Yellowstone Ek moet julle gelukwens met die artikel “Yellowstone—smeltkroes van water, rots en vuur”! (8 Desember 2000). Ek en my vrou het dit gedurende die laaste jaar geniet om in hierdie park te werk. My vrou het aan ’n navorsingsdatabasis gewerk en ek het die vleilande opgemeet. Toe hierdie artikel verskyn, het ons baie opgewonde geraak en moes ons dit eenvoudig dadelik lees. Uitstekende werk! Goeie keuse van foto’s en goeie navorsing. Die inligting was in alle opsigte akkuraat. Maar ’n mens moet eenvoudig hierdie plek self kom sien! Daar is geen einde aan die natuurskoon nie.
D. S., Verenigde State