Sy maag is sy behoud!
HY IS nie vinnig nie. Vir baie is hy gewis nie mooi nie. Maar wat ’n ongewone maag het hy tog! Waarvan praat ons? Die blaasoppie. Wanneer die blaasoppie bedreig word, “ondergaan hy ’n merkwaardige gedaanteverwisseling,” sê die tydskrif Natural History. Sy liggaam, wat omtrent 50 sentimeter lank word, swel op “totdat die vis drie keer sy gewone grootte is en ’n stywe, amper volmaakte sfeer word, bedek met ’n stekelrige harnas—nie ’n goeie ontwerp vir swem nie, maar beslis ’n afskrikmiddel vir aanvallers”.
Die vis blaas hom op deur sy maag vol water te pomp, sodat dit byna ’n honderd keer groter as normaal word! Die blaasoppie se verbasende prestasie is te danke aan ’n eenvoudige, elegante ontwerp—die gebruik van plooie.
Eintlik bestaan die blaasoppie se maag uit plooie binne-in plooie, verduidelik Natural History. Die grootste plooie is omtrent drie millimeter breed “met selfs kleiner voue binne-in elke plooi; en hierdie patroon word voortgesit tot die plooie so klein is dat dit slegs deur ’n mikroskoop gesien kan word,” sê die artikel.
Die blaasoppie se vel moet natuurlik saam met sy maag rek. Om dit te doen, maak die vel, wat uit twee lae bestaan, van twee beginsels gebruik. Die vel se binnelaag is ook soos die maag geplooi, maar die buitelaag is elasties. Hierdie elastiese bedekking verhoed dat die vel verrimpel en die blaasoppie se hidrodinamiese ontwerp belemmer wanneer hy afgeblaas is.
Die blaasoppie swel nie net op om hom teen moontlike vyande te beskerm nie. Wanneer sy vel rek, gaan staan die stekels regop. Moet dus nie aan ’n blaasoppie raak as jy hom sien terwyl jy snorkel nie! En wees ook versigtig vir sy bek; hy kan tot op die been byt!
Toe God Job uitgevra het oor Sy skeppingswerke, het Job geantwoord: “Ek het te wete gekom dat u alles kan doen, en daar is geen idee wat vir u onbereikbaar is nie” (Job 42:2). Ja, selfs die blaasoppie, ’n regte klein pokkel wat nouliks ’n resies of ’n skoonheidswedstryd sal wen, gee oorvloedige bewys van God se skeppingskrag en sy wysheid.—Romeine 1:20.
[Foto-erkennings op bladsy 31]
Bo: Photo by John E. Randall; onder: © Jeff Rotman