Ons beskou die wêreld
Krewe vind hulle pad huis toe
“Krewe het ’n onverklaarbare vermoë om hulle pad huis toe te vind, selfs nadat hulle geblinddoek, rondgery en in onbekende water gesit is”, sê Kanada se koerant die National Post. Die navorsers het tientalle krewe naby die Florida Keys gevang, hulle in donker tenks gesit en hulle tot 37 kilometer daarvandaan vrygelaat. Hoewel die krewe se oë bedek was, het hulle altyd in die rigting van die plek beweeg waar hulle gevang is. Die navorsers meen dat dit die gevorderdste vorm van navigasie is wat tot nog toe by ’n ongewerwelde dier gevind is. “Dit maak nie saak wat ons gedoen het nie, die krewe het uitgewerk in watter rigting hulle moes loop om terug te gaan huis toe”, het dr. Kenneth Lohmann, die navorsingshoof, gesê. “Dis nogal ’n merkwaardige ontdekking as jy daaraan dink—hierdie skaaldiertjies kan op die een of ander manier hulle posisie bepaal onder toestande waarin mense heeltemal verdwaal sal wees.”
Nie ’n misdaad nie
“In Mexiko is dit nie ’n misdaad om uit die tronk te ontsnap nie”, berig The Korea Herald. “Mexiko se regstelsel erken dat dit ’n deel van die menslike natuur is om vry te wil wees. En dit straf mense nie as hulle hierdie begeerte probeer bevredig nie.” Gevangenes word net aangekla as hulle wette oortree terwyl hulle ontsnap, iemand beseer, eiendom beskadig, iemand omkoop of met ander gevangenes saamspan. Maar daar is ’n moontlike gevaar. Tronkbewaarders is gemagtig om te skiet wanneer iemand probeer ontsnap. Dit het daartoe gelei dat ’n paar baie vindingryke ontsnappingsmetodes gebruik is. In 1998 het ’n veroordeelde moordenaar byvoorbeeld op dieet gegaan totdat hy net 50 kilogram geweeg het sodat sy vrou hom kon uitdra in die tas waarmee sy sy vuil wasgoed huis toe geneem het. Hy is nege maande later gevang, maar het weer ontsnap en is nog nie sedertdien gesien nie.
Uitbreiding van die Europese Unie
“’n Halfeeu nadat die Koue Oorlog die Vasteland in twee verdeel het, het onderhandelaars ’n ooreenkoms gesluit . . . om Wes- en Sentraal-Europa te verenig”, sê die Paryse dagblad die International Herald Tribune. As die tien genooide lande—Estland, Hongarye, Letland, Litaue, Malta, Pole, Siprus, Slowakye, Slowenië en die Tsjeggiese Republiek—die uitnodiging aanvaar om in 2004 by die Europese Unie aan te sluit, sal nog 75 miljoen mense ’n deel daarvan word. “’n Enkele mark van 450 miljoen mense” sal dus ’n gesamentlike ekonomiese opbrengs van R86 biljoen tot gevolg hê. Dit is naastenby dieselfde as die Verenigde State se opbrengs van R92,5 biljoen. “Europa sal vir die eerste keer in die geskiedenis verenig wees”, het Romano Prodi, voorsitter van die Europese Kommissie, gesê. Een van die talle probleme waarmee die uitgebreide Unie te kampe sal hê, is die uitdaging om in 21 amptelike tale sake te doen.
Westerse troues in Japan
Hoewel net 0,8 persent van Japan se bevolking sê dat hulle Christene is, word Westerse huweliksplegtighede—met ’n wit trourok, ruikers blomme en ’n gangetjie om in af te stap—al hoe gewilder, berig The Japan Times. Een tydskrif het ’n opname gedoen onder 4 132 paartjies wat in 2001 getrou het, en dit het getoon dat 61,2 persent Westerse troues gehad het, 20,1 persent Sjinto-troues en 0,9 persent Boeddhistiese plegtighede. Vir Westerse troues huur maatskappye wat troues reël, gewoonlik “buitelanders met Kaukasiese gelaatstrekke wat nie geestelikes is nie”, aangesien hulle kliënte dit dikwels verkies. “Talle jong paartjies dink dat dit hulle troue ’n meer gesofistikeerde of selfs plegtiger atmosfeer kan gee as ’n buitelander die huwelik waarneem”, het ’n woordvoerster van so ’n maatskappy gesê. Hierdie “naweekpredikante” laat bloot die paartjie die huweliksgelofte aflê en sê dele uit die Bybel voor ’n gehoor op.
Gevaarlike kruie
“Die gewilde opvatting dat plante die liggaam glad nie skade doen nie omdat dit natuurlik is, is verkeerd”, berig die koerant El Financiero van Mexikostad. Volgens Abigail Aguilar Contreras van die Mexikaanse Instituut vir Maatskaplike Sorg kan dit gevaarlik wees om jouself met kruie te behandel. “Die verkeerde gebruik van geneeskragtige plante kan die liggaam skade doen en selfs die dood veroorsaak, aangesien dit aktiewe stowwe of verdowingsmiddels bevat”, sê die koerant. ’n Voorbeeld is geel-oleander, wat vir gewigsverlies gebruik word. Hierdie kruid kan diarree en braking veroorsaak en die hart beskadig. Daarom sal dit goed wees om ’n bekwame kruiedokter te raadpleeg voordat ’n mens besluit om kruie as geneesmiddels te gebruik.
‘Verslaaf aan effektehandel’
“Mense wat aan effektehandel verslaaf is”, trek nou die aandag van ’n Duitse terapeut, berig die Hamburgse koerant Die Welt. Volgens die verslawingsberader Joachim Otto word die verslaafdes deur die “euforiese aantrekkingskrag van vinnige wins” gelok. Hulle het in effekte handelgedryf “omdat hulle bang was dat hulle andersins ’n unieke geleentheid sou laat verbygaan”, maar het toe beheer verloor en verslaaf geraak weens “die geweldige spoed van oordragte, die risiko, die voortdurende gevoel van opwinding”. Nou is baie van hulle diep in die skuld. Party het sonder die medewete van hulle vrou al hulle spaargeld weggedobbel of ’n verband op hulle huis geneem. Die meeste gaan eers vir terapie wanneer hulle gesin dit nie langer kan verduur nie.
’n Tweeling wat in verskillende jare gebore is
“Die tweeling Caleigh en Emily Johnson het baie met mekaar gemeen, maar nie hulle verjaarsdag nie—hulle is in verskillende jare gebore”, berig New York se Daily News. “Caleigh is om 11:24 nm. op 31 Des. gebore. Emily het om 12:19 vm. op 1 Jan. in die wêreld gekom.” Hulle ma, Dawn Johnson, van Barnegat, New Jersey, was in haar skik. “Al is hulle ’n tweeling, wou ek hê dat hulle hulle eie afsonderlike identiteite moet hê”, het sy gesê. “Hulle het dit sommer van die begin af bewys.” Die tweeling, wat op 2 Februarie gebore sou word, was ’n maand te vroeg.
Internettaal nou ook in klaskamers
“Die informele, afgekorte taal van Internetkletskamers en kitsboodskappe word nou ook in Engelse klasse op hoërskool gesien”, sê die koerant Toronto Star. Party onderwysers meen dat die “nuwe tegnologie nie net ’n invloed het op hoe hulle leerlinge skryf nie, maar ook op hoe hulle dink”. Leerlinge het ’n nuwe taal aangeneem wat uit Engelse afkortings bestaan. Mense gebruik gereeld hierdie afkortings om vinniger hulle sê te sê wanneer hulle op die Internet gesels of boodskappe per selfoon stuur. Nou word hierdie verbastering van geskrewe woorde en afkortings ook in huiswerk gesien.
Nuwe bevindings oor koffie
“Kafeïenvrye koffie is nie gesonder as gewone koffie nie en die moontlikheid is net so groot dat dit dié wat dit drink, die hele nag lank wakker sal hou”, sê The Times van Londen. Navorsing deur wetenskaplikes by die Universiteitshospitaal in Zürich, Switserland, toon dat kafeïen moontlik nie die probleem is nie, aangesien albei soorte koffie feitlik dieselfde uitwerking op die hart-bloedvatestelsel en senustelsel het. Die navorsingshoof dr. Roberto Conti erken: “Tot nou toe het ons die uitwerking wat koffie op die hart-bloedvatestelsel het, aan kafeïen toegeskryf, maar ons het gevind [dat] mense wat nie koffiedrinkers is nie en wat kafeïenvrye koffie gegee is, ook hierdie gevolge ondervind. Dit toon hoe min ons weet van die uitwerking van een van ons gewildste drankies en die stimulant wat wêreldwyd die algemeenste gebruik word.”