’n Onvergeetlike besoek aan die Ngorongoro-krater
Deur Ontwaak!-medewerker in Tanzanië
“A S ENGELE in die tuin van Eden foto’s geneem het, sou hulle natuurfoto’s nie veel verskil het van dié wat vandag in die Ngorongoro-krater geneem kan word nie.” So skryf Reinhard Künkel in sy boek oor hierdie fassinerende besienswaardigheid in Tanzanië. Die Ngorongoro-krater is waarlik ’n pragtige plek, en dit wemel van duisende wilde diere. Kom saam met ons en geniet die natuurskoon!
’n Asemrowende uitsig
Nadat ons vier uur lank per motor op stowwerige paaie gery het, kom ons uiteindelik by die rand van die Ngorongoro-krater. Vanaf die balkon van ons hotel geniet ons die asemrowende uitsig. Die panorama is waarlik uitsonderlik. Natuurkenners het dit selfs al “die agtste wonder van die wêreld” genoem, en ons kan sien waarom.
Waar kom die naam Ngorongoro vandaan? Niemand weet presies nie. Volgens die Bewaringskorporasie van Oos-Afrika sê sommige dat Ngorongoro die naam was van ’n Masai-beesklokmaker wat in die krater gewoon het. Ander meen dat die naam afkomstig is van ’n groep dapper Datogo-krygers wat 150 jaar gelede deur die Masai in ’n veldslag in die krater oorwin is. Maar wanneer ons ’n paar sebras naby die parkeerterrein sien wei, maak die oorsprong van die naam skielik nie meer saak nie. Ons kom tot baie na aan hulle toe ons in ons voertuig klim, maar dit lyk nie of hulle ons eens raaksien nie. Ons ry af na die bodem van die krater om nog diere te sien.
Die krater is 2 236 meter bo seevlak en is die grootste ongebroke caldera, of ingestorte vulkaan, ter wêreld. Dit het ’n deursnee van 19,2 kilometer en beslaan ’n oppervlak van 304 vierkante kilometer. Ons beweeg stadig teen die 610 meter hoë kratermuur af met ons koppe wat by die motorvensters uitsteek sodat ons foto’s kan neem. Toe ons op die rand was, was die oggendlug koel en vars, maar binne-in die krater is dit verbasend warm.
Terwyl ons bestuurder stadig op die kraterbodem met ons rondry, gaan ons verby die klein soutpan met ’n klomp pienk flaminke. Die kraterrand wat nou in die verte is, steek skerp af teen die blou lug, en terwyl ons tussen ander vreemde geluide luister na die geluide van sebras en wildebeeste, kan ons nie anders as om met ontsag vervul te word nie. Dit is waarlik ’n paradys!
Dierelewe in die krater
Ons verwag om buffels, olifante, sebras, wildebeeste, wildsbokke, swartrenosters en blou-apies in die Ngorongoro-krater te sien, en ons word nie teleurgestel nie. Roofdiere soos jagluiperds, hiënas, jakkalse en leeus met swart maanhare is ook hier te vinde. In ’n poel is seekoeie besig om af te koel. Dit lyk nie of hulle omgee om vir ’n foto te poseer nie.
Skielik hou ons bestuurder stil! Hy beduie na ’n swartrenoster wat net ’n paar meter voor ons verbyloop. Die swartrenoster lyk heel tuis in die krater, en dit is ’n besondere voorreg om een van so naby in sy natuurlike habitat te sien. Hierdie vreesinboesemende diere is na aan uitwissing; volgens skatting is daar minder as 20 in die krater. Wilddiewe wat renosters vir hulle horings doodmaak, is al hier gevang. Die horings word onwettig verkoop om dolkhewwe en medisyne te maak. Wildbewaarders patrolleer die krater gereeld om wilddiewe uit te hou.
’n Voëlliefhebber kan verwag om ’n verskeidenheid pragtige voëls te sien, waaronder volstruise, gompoue, mahemme, bosluisvoëls, reiers, sekretarisvoëls, rooibekrenostervoëls en tallose pienk kleinflaminke. Meer as ’n honderd voëlsoorte wat nie in die naburige Serengeti- Nasionale Park aangetref word nie, kom in die krater voor. Daar is baardspegte, geelborskleinjantjies, bontroklaksmanne en paradysvlieëvangers. Die rooskeelkalkoentjie kan in die lang gras gesien word, en selfs die seldsame swartkraai is al hier gesien.
Hoewel die meeste diere hulle glad nie aan ons sal steur nie, moet ons in ons voertuig bly. Maar die Masai, wat net buitekant die krater in tradisionele grasdakmodderhutte woon, mag hulle troppe in die krater laat wei. Dit lyk asof die wilde diere hulle aanvaar het.
Die skoonheid en rustigheid van die Ngorongoro-krater is beslis uitsonderlik en vul ons met ontsag. Ons besoek is ’n onvergeetlike ondervinding.
[Prent op bladsy 15]
Renoster
[Prent op bladsy 15]
Masai-herders by die rand van die krater
[Prent op bladsy 15]
Masai-vrou
[Prent op bladsy 16]
Jagluiperds
[Prent op bladsy 16]
Mahem
[Prent op bladsy 16]
Flaminke
[Prent op bladsy 16]
Seekoei
[Prent op bladsy 16, 17]
Ngorongoro-krater
[Prent op bladsy 17]
Sebras
[Prent op bladsy 17]
Buffel
[Prent op bladsy 17]
Olifante
[Prent op bladsy 17]
Blou-apie