Die Asiatiese patrys—’n vreemdeling in Hawaii

EK EN my vriende het uitgesien na ons besoek aan die Hawaise eiland Maui. Wat ons veral wou sien, was ’n sonsopkoms vanaf die 3 055 meter hoë vulkaan Haleakala. Daar is vir ons gesê dat dit ’n unieke ondervinding is. Die enigste nadeel was dat ons twee-uur die oggend moes opstaan om van Kapalua, waar ons gebly het, na die ander kant van die eiland te ry. Toe moes ons teen die steil opdraand die berg opry. Ons het gedink dat daar op so ’n onmoontlike uur niemand anders op die pad sou wees nie. Allesbehalwe! Ons was in ’n lang ry voertuie wat stadig teen die kronkelende pad na die kruin opbeweeg het. Toe ons bo kom, was dit nogal koud. Maar ons het komberse saamgebring om ons warm te hou.

Honderde mense het geduldig gewag vir die sonsopkoms, wat ongeveer sesuur sou plaasvind. Daar was ’n atmosfeer van groot afwagting, en kameras was gereed om hierdie asemrowende gesig vas te vang. Net toe, op die kritieke oomblik, het ’n groot wolkbank die krater oorskadu en ons ons unieke foto’s ontsê! Maar dit is altyd ’n kans wat ’n mens waag met die berge naby die Stille Oseaan. Ons moes toe maar teleurgesteld vir lief neem met wat gebeur en wag dat die wolke stadig onder die hitte van die stygende son verdwyn. Toe gebeur daar nog iets! Voor ons het ’n panoramiese uitsig ontvou oor die barre krater wat deur staproetes oorkruis is. Alles was nie verlore nie.

Skielik het ons ’n vreemde geluid gehoor—’n reeks afgekapte kloekgeluide wat geëindig het in “chuKAR, chuKAR”. Toe sien ons waarvandaan dit kom. Dit was ’n pragtige Eurasiese voël—die Asiatiese patrys, wat ook die chukar genoem word. Sy Latynse naam is Alectoris chukar. Dit bring die meeste van die broeiseisoen op die grond deur, waar dit slaap. Dit het nie probeer wegvlieg nie, maar het eerder weggehardloop.

Hoe het hierdie voël op die paradysagtige eiland Maui beland? Blykbaar is Asiatiese patryse hierheen ingevoer. Op die Noord-Amerikaanse vasteland word hulle dikwels vir jagdoeleindes vrygelaat. Ons het bevoorreg gevoel dat ons hierdie sku voël ten minste van naderby kon sien.—Bygedra.