Van ons lesers
Misvormde kind Ek is diep geraak deur Mailyn se ondervinding (“’n Nuwe gesig vir Mailyn”, 22 Mei 2004). Dit het my aangemoedig toe ek gelees het hoe hierdie 11-jarige kind ’n verskriklike beproewing verduur en nogtans met ander oor haar Bybelse hoop praat.
M. B., Italië
Die positiewe beskouing van Mailyn en haar gesin was vir my baie aanmoedigend. In vandag se wêreld plaas die media te veel klem op hoe ’n mens lyk. Dit kan ontmoedigend wees. Ek wil graag hê dat Mailyn moet weet dat haar ware skoonheid vir my baie duidelik is. Ek hoop dat ek die geleentheid sal hê om in haar vreugde te deel wanneer Jehovah vir haar ’n nuwe gesig gee in sy nuwe wêreld. Haar geloof het my versterk.
M. S., Verenigde State
Ek moet binnekort ’n operasie ondergaan om een van my borste te laat verwyder. Wanneer ’n mens se voorkoms weens ’n siekte geskend word, verg dit krag en moed om nie neerslagtig te word nie. Mailyn se dapperheid en optimisme het my versterk. Ek wil vir Mailyn sê: Ek wens jou net die beste toe. Ek dink jy is pragtig!
G. R., Frankryk
Ek is gebore met ’n fisiese gebrek wat ’n haaslip genoem word. Die ander kinders by die skool het my dikwels snaaks aangekyk. Party het selfs op my gespoeg. Ek glo dat dit wat my ma my uit die Bybel geleer het, my moed en selfvertroue gegee het. Selfs nou, op 31, voel ek nog steeds verleë oor my voorkoms. Mailyn se ondervinding het my dus diep geraak. Ek weet dat ons enige uitdagings waarvoor ons nog te staan sal kom, met Jehovah se hulp die hoof sal kan bied.
T. S., Japan
Mailyn is vir my ’n bewys dat dit nie uiterlike voorkoms is wat geluk en tevredenheid meebring nie. Ons kan dit net ervaar wanneer ons ons God dien en liefhet. Mailyn se voorbeeld is vir my ’n aansporing.
A. T., Filippyne
Mishandeling tydens hofmakery Dankie vir die artikel “Jongmense vra . . . Waarom behandel hy my so sleg?” (22 Mei 2004). Ek was in ’n verhouding waarin ek mishandel is. Wanneer dinge verkeerd geloop het, het my kêrel my altyd die skuld gegee. Ek het grootgeword in ’n gesin waar geweld en skeltaal gebruik is, en sy gedrag het dus vir my normaal gelyk. Ek is bly dat ek daardie verhouding verbreek het; hy het bewys dat hy nie ’n geskikte huweliksmaat sal wees nie.
Naam weerhou, Belize
Die artikel het presies beskryf hoe ek voel. Voor en ná my troue het ek die soort situasies deurgemaak wat julle beskryf het. Die sielkundige geweld wat ek ondervind het, het my my selfrespek laat verloor. Ek hoop die artikel spoor baie aan om hulle verhouding tydens hofmakery te ondersoek. Dit is baie verstandig om mekaar voor die troue te leer ken sodat sulke probleme vermy kan word.
M. M., Duitsland
Reisende sade Dankie vir die artikel “’n Saad wat die oseane bevaar” (22 Mei 2004). ’n Paar jaar gelede het ek een van hierdie sade op ’n strand naby my huis opgetel, maar ek het nie besef dat dit ’n saad is nie. Toe ek die artikel lees, was ek verbaas om uit te vind dat die saad wat ek opgetel het, dalk van Sentraal- of Wes-Afrika af gereis het! Baie dankie dat julle sulke interessante artikels publiseer.
M. K., Japan