Wat het God vir jou gedoen?
‘NIKS!’ antwoord party dalk. ‘Ek moet hard werk en vir myself sorg.’ As jy so voel, moet jy net ’n oomblik nadink. Hoe het jy ontstaan?
Ongeveer nege maande voor jy gebore is, het twee baie klein organismes binne-in jou moeder bymekaargekom. Saam het hulle ’n nuwe, unieke organisme gevorm.
Die grootste van die twee organismes was ’n eiersel wat deur jou moeder voorsien is. Die kleiner organisme was ’n spermsel van jou vader—so klein dat as al die sperma waardeur al die mense in die wêreld voortgebring is langs mekaar geplaas word dit, volgens Sheila Kitzinger se boek The Experience of Childbirth, “skaars meer as [2,5 sentimeter] sou beslaan”. Maar die oomblik toe jou vader se spermsel jou moeder se eiersel binnegedring het, is jou genetiese kode vasgestel en is jy ontvang!
Uiters ingewikkelde ontwikkelingsprosesse het toe begin. Hulle was “so ingewikkeld dat wetenskaplikes, na meer as ’n eeu van ondersoek, nog nie eens naby daaraan is om hulle te ontleed nie”, het Andrea Dorfman in Science Digest geskryf.
Dieselfde skrywer meld ’n voorbeeld van groeiprosesse wat wetenskaplikes dronkslaan: “Groeibeheer is net so ’n ingewikkelde kwessie. Die linker- en die regterarm ontwikkel byvoorbeeld heeltemal onafhanklik van mekaar uit millimeterlange weefselknoppies, en tog word hulle ewe lank. Hoe weet die selle wanneer om op te hou vermeerder? . . . Elke orgaan het blykbaar ’n interne vorm van groeibeheer. ” Is ons nie bly dat dit die geval is nie?
Wat veroorsaak en beheer groei in alle lewende organismes? ’n Verstandelose krag wat die natuur genoem word? ’n Lukrake proses wat evolusie genoem word? Is dit nie duidelik dat die verstommend ingewikkelde, geweldig uiteenlopende en uiters pragtige lewensvorme op hierdie verruklike planeet net die werk van ’n almagtige Skepper kan wees nie? Moet ons dan nie uiters dankbaar wees vir wat hy vir ons gedoen het nie?
Oneindige bewys van skeppingswonders
Ons vind elke dag—selfs elke uur—baat by skeppingswonders. Wat gebeur byvoorbeeld wanneer ons slaap? Brein- en spieraktiwiteit neem outomaties af. Dit is nie omdat ons dit doen nie, want ons raak dikwels aan die slaap sonder dat ons dit besef. En hoe verkwikkend is ’n goeie slaap tog! Party kan weke sonder kos bly, maar diegene wat meer as drie dae nie slaap nie, sukkel om te dink, te sien en te hoor.
Miskien bring iemand vir jou soet koffie wanneer jy soggens wakker word. Suiker, wat eens seldsaam en duur was, is nou so volop dat ons selde daaraan dink. Maar hoe word dit gemaak? Dit word in plante gevorm deur middel van fotosintese—die reaksie van sonlig met water en koolstofdioksied. Terselfdertyd word suurstof, wat noodsaaklik is vir alle lewende wesens op die aarde, vrygestel. Fotosintese is ’n hoogs ingewikkelde proses wat nog steeds nie ten volle deur wetenskaplikes verstaan word nie. “Hoe . . . vind fotosintese plaas?” vra die boek The Plants (Life Nature Library). “Dit is soos om te vra hoe lewe begin—ons weet eenvoudig nie.”
Terwyl jy jou koffie drink, onthou jy miskien ’n televisieprogram van die vorige aand. Jy sien weer daardie interessante tonele in jou geestesoog. Hoe is hulle na jou brein oorgesein, soos ’n rol film daar bewaar en word hulle dan teruggespeel sodat jy dit aan ander kan beskryf? Wonderlik, nie waar nie? Hoe het die mens die intelligensie gekry om die verbasende dinge te doen wat hy verrig? Beslis nie van diere nie. Is die mensebrein nie ontsagwekkend nie?
Die dag het skaars begin. Maar hoe baie het ons nie reeds om die Skepper voor dankbaar te wees nie? Daar is egter nog so baie.