Pasop vir valse profete!
’NBRASILIAANSE egpaar het al gaan slaap toe hulle diewe by hulle huis hoor inbreek. Die vreesbevange egpaar het dit reggekry om deur die slaapkamervenster te ontsnap en die polisie te ontbied. Maar die vrou was agterna so ontsteld oor die ondervinding dat sy nie in die huis kon slaap nie en na haar ma se huis toe moes gaan.
Enigiemand by wie se huis daar al ingebreek is of wat op ’n ander manier beroof is, sal verstaan hoe sy gevoel het. So ’n ondervinding kan ontstellend wees, en ongelukkig ly al hoe meer mense op hierdie manier. Daar is egter ’n vorm van diefstal wat baie ernstiger gevolge het.
Wat is hierdie ernstiger vorm van diefstal, en wie is die diewe? Jesus Christus het inligting daaroor verskaf toe hy van ons dag gepraat het en gesê het: “Baie valse profete sal opstaan en baie mense mislei” (Mattheüs 24:11). Valse profete is diewe. In watter opsig? Wat steel hulle? Hulle diefstal hou verband met hulle profesieë. Om dit dus ten volle te verstaan, moet ons eers uitvind wat dit volgens die Bybel beteken om te profeteer.
Wat dit beteken om te profeteer
Wanneer jy aan profesieë dink, is die voorspelling van die toekoms moontlik die eerste ding wat in jou gedagte opkom. Dit was beslis ’n aspek van die werk van God se eertydse profete, maar dit was nie hulle vernaamste werk nie. Toe die profeet Esegiël byvoorbeeld in ’n visioen beveel is om ‘tot die wind te profeteer’, moes hy bloot ’n bevel van God bekend maak (Esegiël 37:9, 10, NW). Tydens Jesus se verhoor voor die priesters het hulle op hom gespoeg en hom geslaan, en sy vervolgers het spottend gesê: “Profeteer vir ons, Christus! Wie is dit wat U geslaan het?” Hulle het Jesus nie gevra om die toekoms te voorspel nie. Hulle het hom uitgedaag om deur God se krag diegene te identifiseer wat hom geslaan het.—Mattheüs 26:67, 68.
Trouens, die hoofgedagte van die woorde in die oorspronklike Bybeltaal wat met “profeteer” of “profesie” vertaal word, is basies om God se voorneme in verband met ’n saak bekend te maak of, soos die boek Handelinge dit stel, om “die groot dade van God” bekend te maak (Handelinge 2:11). Dit is in hierdie sin dat baie mense deur valse profete beroof word.
Maar wie is die valse profete, en wat steel hulle? Kom ons kyk na die geskiedenis van die nasie Israel ná die tyd van Jeremia om hierdie vraag te beantwoord.