Musiek wat God behaag

Musiek is al beskryf as “die oudste en natuurlikste van al die skone kunste”. Soos taal is dit ’n merkwaardige gawe wat mense onderskei van diere. Musiek wek die emosies op. Dit kan die oor streel en in die gedagtes draai. Bowenal kan musiek God behaag.

SOOS die Bybel toon, was die Israeliete ’n musikale volk. Musiek was “in Bybelse tye ’n belangrike kunsvorm”, sê Unger’s Bible Dictionary. As deel van hulle daaglikse lewe was sang sowel as instrumentale musiek aspekte van hulle aanbidding. Maar dit was die mensestem wat die meeste gebruik is.

Koning Dawid het verteenwoordigers onder die Leviete aangestel “vir die leiding van die sang” by die tabernakel, voordat die tempel ingewy is wat deur Salomo, sy seun, gebou is (1 Kronieke 6:31, 32). Toe die verbondsark, wat Jehovah se teenwoordigheid voorgestel het, in Jerusalem aangekom het, het Dawid gereël dat party van die Leviete ‘Jehovah roem en loof en prys’. Hulle het hulle lofliedere begelei “met harp- en siterinstrumente, . . . met die simbale . . . en . . . met trompette”. Hierdie manne is “met hulle name aangewys . . . om die HERE te loof dat sy goedertierenheid tot in ewigheid is”.—1 Kronieke 16:4-6, 41; 25:1.

Die refrein “[Jehovah se] goedertierenheid is tot in ewigheid” verskyn baie keer in die Psalms, die Bybelboek wat die meeste met musiek geassosieer word. Dit vorm byvoorbeeld die tweede deel van elk van die 26 verse van Psalm 136. “Die bondigheid daarvan maak dit geskik vir ’n volk se lippe”, sê ’n Bybelgeleerde. “Almal kon dit onthou, as hulle dit eers gehoor het.”

Die opskrifte van die psalms toon hoe algemeen musiekinstrumente gebruik is. Psalm 150 meld die basuin, harp, tamboeryn, fluit en simbale, asook snaarinstrumente. Maar dit vestig hoofsaaklik die aandag op die mensestem. Die aansporing in vers 6 is: “Laat alles wat asem het, die HERE loof! Halleluja!”

Aangesien musiek ons gevoelens uitdruk, het droewige gedagtes in Bybeltye tot klaagliedere of dreunsange aanleiding gegee. Maar hierdie vorm van sang was beperk in Israel se musiek. “Slegs in ’n klaaglied sou die dreunsangstyl verkieslik wees bo die melodie van musiek of die modulasie en mondelinge beklemtoning van suiwer spraak”, sê die Bybelensiklopedie Insight on the Scriptures.a

Jesus en sy getroue apostels het die nag voor sy dood lofliedere tot Jehovah gesing, ongetwyfeld die Hallel-Psalms (Psalms 113-118). Dit het Jesus se dissipels sekerlik versterk sodat hulle die verlies van hulle Heer kon verwerk! Boonop het hulle ongetwyfeld meer vasbeslote geword in hulle voorneme om getroue knegte van die Allerhoogste Soewerein van die heelal, Jehovah, te bly terwyl hulle vyf keer die refrein “sy goedertierenheid is tot in ewigheid” gesing het.—Psalm 118:1-4, 29.

Die vroeë Christene van Efese en Kolosse het “psalms en lofliedere tot God” gesing. Daarbenewens het hulle ook “geestelike liedere” gehad wat hulle in hulle harte gesing het (Efesiërs 5:19; Kolossense 3:16). Deur sang sowel as spraak het hulle hulle monde gepas gebruik om lof te betuig. Het Jesus dan nie gesê: “Uit die oorvloed van die hart spreek die mond” nie?—Matteus 12:34.

Musiek wat God mishaag

Nie alle musiek wat in die Bybel genoem word, het God behaag nie. Dink byvoorbeeld aan wat by die berg Sinai gebeur het, waar Moses die Wet, insluitende die Tien Gebooie, ontvang het. Wat het Moses gehoor toe hy van die berg afgekom het? “Nie die geluid van sang oor ’n magtige daad nie”, “nie die geluid van sang oor ’n nederlaag nie”, maar “die geluid van ander sang”. Dit was musiek wat verband gehou het met afgodediens, ’n gebruik wat God mishaag het en tot die dood van ongeveer 3 000 van daardie musiekmakers gelei het.—Exodus 32:18, 25-28, NW.

Hoewel mense enige soort musiek kan komponeer, speel en geniet, is dit nie te sê dat alle musiek God behaag nie. Waarom nie? Die Christenapostel Paulus verduidelik: “Almal het gesondig en skiet te kort aan die heerlikheid van God” (Romeine 3:23). Heidense vrugbaarheidsrites, die leerstelling van die onsterflikheid van die mensesiel en die verering van Maria as “die moeder van God” word dikwels as temas in musikale komposisies gebruik. Maar hierdie opvattings en gebruike bring oneer op die God van waarheid, want dit is in stryd met wat in sy geïnspireerde Woord, die Bybel, geopenbaar word.—Deuteronomium 18:10-12; Esegiël 18:4; Lukas 1:35, 38.

Hoe om musiek verstandig te kies

Daar is ’n verstommende verskeidenheid musiek beskikbaar. CD-omslae word ontwerp om mense te lok om allerhande musiekopnames te koop. Maar as ’n aanbidder van God Hom wil behaag, moet hy versigtig wees en verstandig kies sodat hy sang- en instrumentale musiek vermy wat deur valse godsdiensoortuigings geïnspireer is of wat die aandag op onsedelikheid of demonisme vestig.

Albert, wat vroeër as ’n Christensendeling in Afrika gedien het, erken dat hy daar nie dikwels die geleentheid gehad het om die klavier te speel nie. Maar hy het oor en oor na die paar plate geluister wat hy saamgeneem het. Noudat hy terug is in sy eie land besoek Albert Christengemeentes as ’n reisende opsiener. Hy het min tyd om na musiek te luister. “My geliefkoosde komponis is Beethoven”, sê hy. “Deur die jare heen het ek opnames van sy simfonieë, konserte, sonates en kwartette versamel.” Dit het hom baie vreugde verskaf om daarna te luister. Elkeen het natuurlik sy eie musieksmaak, maar as Christene hou ons Paulus se raad in gedagte: “Hetsy julle eet of drink of enigiets anders doen, doen alles tot heerlikheid van God.”—1 Korintiërs 10:31.

Musiek en toewyding

Susie se eerste liefde was musiek. “Ek het op 6 begin klavier speel, op 10 begin viool speel en eindelik op 12 die harp begin speel”, verduidelik sy. Susie het later na die Koninklike Musiekskool in Londen, Engeland, gegaan om die harp te bestudeer. Sy het vier jaar lank saam met ’n beroemde Spaanse harpspeelster en nog ’n jaar by die Parys-konservatorium gestudeer, waartydens sy ’n honneursgraad in musiek gekry het, sowel as diplomas vir harpspel en klavieronderrig.

Susie het met ’n gemeente van Jehovah se Getuies in Londen begin assosieer. Daar het sy opregte belangstelling en liefde onder mede-Getuies gevind. Haar liefde vir Jehovah het geleidelik toegeneem, en haar ywer vir sy diens het haar beweeg om maniere te soek om hom te dien. Dit het tot toewyding en doop gelei. “’n Musiekloopbaan is ’n toegewyde lewenswyse, en daarom was ’n lewe van toewyding nie vir my iets onbekends nie”, sê Susie. Haar tyd vir konsertoptredes het al hoe minder geword omdat sy in gehoorsaamheid aan Jesus se opdragte deelgeneem het aan die Christelike bediening om die goeie nuus van God se Koninkryk te verkondig.—Matteus 24:14; Markus 13:10.

Hoe voel sy noudat sy minder tyd aan musiekuitvoerings bestee? “Partykeer ’n bietjie gefrustreerd omdat ek nie meer tyd het om te oefen nie”, erken sy, “maar ek speel nog steeds my instrumente en geniet nog steeds musiek. Musiek is ’n gawe van Jehovah. Ek geniet dit meer noudat ek sy diens eerste in my lewe stel.”—Matteus 6:33.

Musiek tot lof van God

Albert en Susie tesame met die byna sesmiljoen ander Getuies van Jehovah loof Jehovah God gereeld met musiek. By Christelike vergaderinge wat in Koninkryksale in 234 lande gehou word, begin en sluit hulle hulle vergaderinge waar moontlik deur liedere tot Jehovah te sing. Pragtige melodieë in majeur- en mineursleutels met skriftuurlike lirieke bring lof aan Jehovah God.

Almal wat aanwesig is, sing hartlik saam dat Jehovah ’n God is wat omgee (Lied 44). Hulle sing ’n loflied tot Jehovah (Lied 190). Hulle liedere gee erkenning aan die vreugdes en verantwoordelikhede van die Christenbroederskap, Christelike lewe en Christelike hoedanighede. Wat ook tot hulle genot bydra, is die verskeidenheid musiekstyle wat Getuies uit Asië, Australië, Europa en Noord- en Suid-Amerika gebruik het toe hulle die melodieë gekomponeer het.b

“Sing tot eer van die HERE ’n nuwe lied; sing voor die HERE, o ganse aarde! Sing tot eer van die HERE, loof sy Naam”, is die openingswoorde van ’n grootse koninklike lofsang wat in die psalmis se dag geskryf is. “Verkondig sy heil van dag tot dag. Vertel onder die nasies sy eer, onder al die volke sy wonders” (Psalm 96:1-3). Dit is wat Jehovah se Getuies in jou omgewing doen, en hulle nooi jou om saam met hulle hierdie lofliedere te sing. Jy sal welkom wees by hulle Koninkryksale, waar jy kan leer hoe om Jehovah te loof met musiek wat hom behaag.

[Voetnote]

[Prent op bladsy 28]

Sing lofliedere tot Jehovah