God se Koninkryksregering—Vandag ’n werklikheid

“Hoe kan soveel lande, met sulke uiteenlopende kulture wat in verskillende stadiums van ontwikkeling is, ooit saamstem? Daar is al gesê dat net ’n aanval van ’n ander planeet die menseras sal verenig.”—The Age, ’n Australiese koerant.

’N AANVAL van ’n ander planeet? Of dit al die nasies van die aarde sal verenig of nie, Bybelprofesieë praat wel van ’n naderende krisis wat die nasies van die wêreld sal laat saamspan. En die krisis sal inderdaad deur magte in die buitenste ruimte teweeggebring word.

Koning Dawid van eertydse Israel het hierdie wêreldsituasie in ’n profesie genoem. Hy het onder goddelike inspirasie geskryf: “Die konings van die aarde neem stelling in en die hoë amptenare het soos een man saamgespan teen Jehovah en teen sy gesalfde en gesê: ‘Laat ons hulle bande stukkend skeur en hulle toue van ons afwerp!’” (Psalm 2:2, 3; Handelinge 4:25, 26). Let daarop dat die heersers van die wêreld soos een man sal saamspan teen Jehovah, die Skepper van die heelal, en teen sy gesalfde, of sy aangestelde Koning, Jesus Christus. Hoe sal dit gebeur?

Volgens Bybelchronologie en vervulde profesieë is God se Koninkryk in die jaar 1914 in die hemele opgerig met Jesus Christus as Koning.a Die nasies van die wêreld het op daardie stadium een gedagte in gemeen gehad. In plaas van hulle aan die soewereiniteit van God se pas opgerigte Koninkryk te onderwerp, was hulle in ’n magstryd gewikkel—die Groot Oorlog, of die Eerste Wêreldoorlog.

Hoe beskou Jehovah God hierdie reaksie van menseheersers? “Hy wat in die hemel sit, sal lag; Jehovah sal hulle bespot. In dié tyd sal hy hulle in sy toorn aanspreek, en in sy brandende misnoeë sal hy hulle ontstel.” Dan sal Jehovah vir sy Seun, die gesalfde Koning van die Koninkryk, sê: “Vra my, sodat ek nasies as jou erfdeel kan gee en die eindes van die aarde as jou besitting. Jy sal hulle met ’n ystersepter breek, asof hulle ’n pottebakkershouer is, sal jy hulle stukkend slaan.”—Psalm 2:4, 5, 8, 9.

Hierdie finale verbryseling van die vyandige nasies met ’n ystersepter sal by Armageddon, of Har–Magedon, plaasvind. Die laaste boek van die Bybel, Openbaring, beskryf hierdie epogmakende gebeurtenis as “die oorlog van die groot dag van God die Almagtige”, waarheen “die konings van die hele bewoonde aarde” versamel word (Openbaring 16:14, 16). Onder demooninvloed sal die nasies van die aarde uiteindelik verenig wees met een doel voor oë—om teen God die Almagtige oorlog te voer.

Die tyd wanneer mense sal saamspan om teen God se soewereiniteit te veg, kom vinnig nader. Ironies genoeg, hulle “eenheid” sal vir hulle geen persoonlike voordele meebring nie. Hulle optrede sal eerder die langverwagte vrede vir die hele mensdom voorafgaan. Hoe so? In daardie finale stryd sal God se Koninkryk “al hierdie koninkryke [van die wêreld] verbrysel en daar ’n einde aan maak, en self sal dit tot onbepaalde tye bly staan” (Daniël 2:44). God se Koninkryk, en geen menslike organisasie nie, is die regering wat die mensdom se begeerte na wêreldvrede sal vervul.

Die Hoofadministrateur van die Koninkryksregering

Dít is die Koninkryk waarvoor talle opregte mense al gebid het, deur te sê: “Laat u koninkryk kom. Laat u wil geskied, soos in die hemel, so ook op die aarde” (Matteus 6:10). God se Koninkryk is nie ’n abstrakte toestand van die hart nie, maar eerder ’n werklike regering wat wonderlike dinge vermag het sedert dit in 1914 in die hemel opgerig is. Kom ons ondersoek ’n paar sleutelfaktore wat toon dat God se Koninkryk ’n werklikheid is en dat dit vandag ten volle funksioneer.

Eerstens het dit ’n magtige en doeltreffende uitvoerende afdeling met die gekroonde Koning, Jesus Christus, aan die hoof daarvan. In 33 G.J. het Jehovah God vir Jesus Christus as die Hoof van die Christengemeente aangestel (Efesiërs 1:22). Sedertdien oefen Jesus sy hoofskap uit en het hy sodoende bewys gelewer van sy administratiewe bevoegdheid. Byvoorbeeld, toe ’n groot hongersnood Judea in die eerste eeu getref het, het die Christengemeente onmiddellik opgetree om hulp te verleen aan sy lede. Noodlenigingswerk is georganiseer, en Barnabas en Saulus is van Antiogië af gestuur met noodlenigingsvoorraad.—Handelinge 11:27-30.

Noudat die Koninkryksregering in werking is, kan daar beslis niks minder van Jesus Christus verwag word nie. Wanneer rampe—aardbewings, hongersnood, oorstromings, orkane, storms of vulkaniese uitbarstings—plaasvind, reageer die Christengemeente van Jehovah se Getuies vinnig om in die behoeftes van medegelowiges en ander in die betrokke gebiede te voorsien. Toe verwoestende aardbewings El Salvador byvoorbeeld in Januarie en Februarie 2001 getref het, is noodlenigingswerk in al die dele van die land georganiseer, en groepe van Jehovah se Getuies uit Kanada, Guatemala en die Verenigde State het hulp voorsien. Drie van hulle plekke van aanbidding asook meer as 500 huise is binne ’n kort tyd herbou.

Onderdane van God se Koninkryksregering

Sedert God se hemelse Koninkryk in 1914 opgerig is, word die onderdane daarvan uit volke regoor die wêreld versamel en georganiseer. Dit is ter vervulling van ’n merkwaardige profesie wat deur Jesaja opgeteken is: “Aan die einde van die dae sal die berg van die huis van Jehovah [sy verhewe ware aanbidding] stewig gevestig word bo die top van die berge, . . . en al die nasies sal daarheen stroom.” Die profesie toon dat “baie volke” sal opgaan na daardie berg en Jehovah se voorskrifte en wette sal aanneem.—Jesaja 2:2, 3.

Hierdie bedrywigheid het die merkwaardigste beweging in hedendaagse tye laat ontstaan—’n internasionale broederskap van meer as 6 000 000 Christene in meer as 230 lande van die aarde. By internasionale byeenkomste van Jehovah se Getuies is waarnemers dikwels verbaas om die liefde, vrede en eenheid onder die groot skares mense te sien, al is hulle van verskillende nasionaliteite, kulture en taalgroepe (Handelinge 10:34, 35). Sou jy nie saamstem dat ’n regering wat honderde etniese groepe in vrede en eenheid kan saambring, doeltreffend en bestendig moet wees nie—asook ’n werklikheid?

God se Koninkryk en onderrigting

Elke regering het standaarde waaraan sy burgers moet voldoen, en almal wat onder daardie regering wil lewe, moet hulle aan die standaarde daarvan onderwerp. God se Koninkryk het eweneens standaarde waaraan almal moet voldoen wat as onderdane daarvan wil kwalifiseer. Maar om dit vir soveel mense met sulke uiteenlopende agtergronde moontlik te maak om dieselfde standaarde aan te neem en daarby te bly, is sekerlik ’n ontsaglike taak. Hier is dus nog ’n faktor wat daarvan getuig dat God se Koninkryk ’n werklikheid is—die doeltreffende onderrigprogram wat nie net die verstand bereik en verander nie, maar ook die hart.

Hoe voer die Koninkryksregering hierdie ontsaglike taak uit? Deur die apostels se metode te volg om “van huis tot huis” te getuig en God se Woord op ’n individuele grondslag aan ander te leer (Handelinge 5:42; 20:20). Hoe doeltreffend is hierdie vorm van onderrigting? Jacques Johnson, ’n Katolieke priester, het in ’n Kanadese weekblad geskryf oor sy pogings om ’n vrou te probeer oorreed om haar studie met Jehovah se Getuies te staak. “Ek was heeltemal verbaas en het besef dat ek ’n verlore stryd voer”, het hy gesê. “Ek het begin besef dat hierdie Getuievroue oor etlike maande betekenisvolle bande gesmee het met hierdie jong moeder wat aan haar huis gebonde was. Hulle het ’n verhouding met haar opgebou deur haar te help, vriende met haar te maak en innige bande met haar te smee. Sy het kort voor lank ’n aktiewe lid van hulle godsdiens geword, en daar was min wat ek kon doen om dit te keer.” Net soos die hart van hierdie voormalige Katoliek geraak is deur die Bybelboodskap wat Jehovah se Getuies mense leer en deur hulle Christelike gedrag, word die harte van miljoene regoor die wêreld geraak.

Hierdie vorm van onderrigting—Koninkryksonderrigting—is op die Bybel gegrond en handhaaf die waardes en sedelike standaarde daarvan. Dit leer mense om mekaar lief te hê en te eer, ongeag wat hulle agtergrond is (Johannes 13:34, 35). Dit help mense ook om ag te gee op die vermaning: “Moenie langer na hierdie stelsel van dinge gevorm word nie, maar word verander deur julle verstand te hervorm, dat julle kan seker maak wat die goeie en aanneemlike en volmaakte wil van God is” (Romeine 12:2). Miljoene wat hulle vorige lewenswyse die rug toegekeer het en bly is om volgens die wette en beginsels van die Koninkryksregering te lewe, ervaar nou vrede en geluk en het wonderlike toekomsvooruitsigte.—Kolossense 3:9-11.

’n Uitstekende hulpmiddel om hierdie wêreldwye eenheid te verkry, is hierdie tydskrif, Die Wagtoring. Deur middel van gekoördineerde vertaalmetodes en veeltalige uitgewerstoerusting, word die hoofartikels van Die Wagtoring gelyktydig in 135 tale uitgegee, en meer as 95 persent van sy lesers oor die hele wêreld kan die materiaal tegelykertyd in hulle eie taal bestudeer.

’n Mormoonse skrywer het ’n lys opgestel van die uitsonderlikste gevalle van suksesvolle sendingwerk buite sy eie kerk. Hy het Die Wagtoring en Ontwaak!, wat deur Jehovah se Getuies uitgegee word, die beste evangelistiese tydskrifte genoem en gesê: “Niemand kan ooit die Wagtoring of Ontwaak! daarvan beskuldig dat dit ’n oorgeruste gesindheid bevorder nie—inteendeel, dit spoor mense tot waaksaamheid aan, iets wat ek selde in ander godsdienspublikasies teëkom. Die Wagtoring en Ontwaak! se feitelike, goed nagevorste, aktuele inhoud is verkwikkend.”

Daar is oorweldigende getuienis dat God se Koninkryk ’n werklikheid is en dat dit ten volle funksioneer. Jehovah se Getuies vertel hulle bure vreugdevol en ywerig van “hierdie goeie nuus van die koninkryk” en nooi hulle om onderdane daarvan te word (Matteus 24:14). Is hierdie vooruitsig vir jou aantreklik? Jy kan die seëninge geniet wat dit meebring om met diegene te assosieer wat die standaarde van die Koninkryk geleer word en daarvolgens probeer lewe. Nog beter, jy kan later die vooruitsig geniet om onder Koninkryksheerskappy te lewe in die beloofde nuwe wêreld waarin “regverdigheid [sal] woon”.—2 Petrus 3:13.

[Voetnoot]

[Prent op bladsy 5]

In 1914 het die nasies in ’n wêreldoorlog gewikkel geraak

[Prente op bladsy 6]

Noodlenigingswerk deur vrywilligers is ’n bewys van Christelike liefde in aksie

[Prent op bladsy 7]

Wêreldwyd vind Jehovah se Getuies baat by dieselfde onderrigprogram