Ons lesers vra
Waarom gebruik Jehovah se Getuies nie die kruis in hulle aanbidding nie?
Jehovah se Getuies glo vas dat die dood van Jesus Christus die losprys voorsien het wat die ewige lewe moontlik maak vir diegene wat geloof in hom beoefen (Matteus 20:28; Johannes 3:16). Maar hulle glo nie dat Jesus aan ’n kruis gesterf het, soos dikwels in tradisionele prente uitgebeeld word nie. Hulle glo dat Jesus aan ’n regop paal sonder ’n dwarsbalk gesterf het.
Die gebruik van die kruis kan teruggevoer word na Mesopotamië, tot tweeduisend jaar voor Christus. Gedurende die Bronstydperk, eeue voordat Jesus gebore is, het kruise selfs Skandinawiese rotsgraverings versier. Nie-Christene het die kruis gebruik “as ’n towerteken . . . wat beskerming verleen [en] geluk bring”, het Sven Tito Achen, ’n Deense geskiedkundige en kenner op die gebied van simbole, geskryf in die boek Symbols Around Us. Dit is geen wonder dat die New Catholic Encyclopedia erken nie: “Die kruis word in voor-Christelike sowel as nie-Christelike kulture aangetref, waar dit hoofsaaklik verwys na dinge in die kosmos of die natuur.” Waarom het die kerke dan die kruis as hulle heiligste simbool gekies?
W. E. Vine, ’n gerespekteerde Britse geleerde, noem hierdie naakte feite: “Teen die middel van die 3de eeu n.C. . . . is heidene in die kerke aanvaar . . . en toegelaat om die meeste van hulle heidense tekens en simbole te behou. Gevolglik is die Tau of T, . . . met die dwarsstuk effens laer af, aangeneem.”—Vine’s Expository Dictionary of Old and New Testament Words.
Vine sê verder dat die selfstandige naamwoord “kruis” sowel as die werkwoord “kruisig” in die oorspronklike Grieks verwys na “’n regop paal . . . wat verskil van die kerklike vorm van ’n kruis met twee balke”. In ooreenstemming hiermee sê die Companion Bible van die Universiteit van Oxford: “Volgens die getuienis . . . is die Here tereggestel aan ’n regop paal, en nie aan twee stukke hout wat teen enige hoek oor mekaar geplaas is nie.” Dit is duidelik dat die kerke ’n onbybelse tradisie aangeneem het.
Achen, die geskiedkundige wat vroeër aangehaal word, sê: “Dit is te betwyfel of die Christene in die twee eeue ná die dood van Jesus ooit die simbool van die kruis gebruik het.” Hy voeg by dat die kruis vir die vroeë Christene “seker hoofsaaklik dood en boosheid voorgestel het, soos die guillotine of die elektriese stoel vir latere geslagte”.
Nog belangriker, ongeag wat gebruik is om Jesus te folter en tereg te stel, geen beeld of simbool daarvan moet ’n voorwerp van verering of aanbidding vir Christene word nie. “Vlug vir die afgodediens”, beveel die Bybel (1 Korintiërs 10:14). Jesus self het gemeld wat in werklikheid sy ware volgelinge sou kenmerk. Hy het gesê: “Hieraan sal almal weet dat julle my dissipels is, as julle liefde onder mekaar het.”—Johannes 13:35.
In alle sake wat met aanbidding verband hou, probeer Jehovah se Getuies om, soos die eerste-eeuse Christene, die Bybel te volg eerder as tradisie (Romeine 3:4; Kolossense 2:8). Daarom gebruik hulle nie die kruis in hulle aanbidding nie.
[Prent op bladsy 22]
Reliëf van ’n heidense assiriese koning wat ’n kruis dra, omstreeks 800 v.g.j.
[Erkenning]
Photograph taken by courtesy of the British Museum