Het jy geweet?

Waarom het Jesus gesê dat “niemand nuwe wyn in ou wynsakke [gooi] nie”?

▪ Dit was algemeen in Bybeltye om wyn in dierevelle te hou (Josua 9:13). Leersakke is van die hele huid van mak diere soos boklammers of bokke gemaak. Om ’n leersak te maak, is die dooie dier se kop en voete afgesny en is die huid van die karkas versigtig afgeslag sodat die maag nie oopgesny hoef te word nie. Die vel is dan gelooi en al die openinge toegewerk, behalwe die dier se nek of been, wat as die sak se opening sou dien. Hierdie opening kon met ’n prop toegemaak of met ’n toutjie toegebind word.

Mettertyd het die vel verhard en was dit nie meer so elasties nie. Daarom was ou wynsakke nie geskik om nuwe wyn, wat aanhou gis, in te hou nie. Die gisting sou waarskynlik die verharde leer van ou wynsakke laat oopbars. Maar nuwe leersakke was meer soepel en kon die druk weerstaan wat deur die voortdurende gisting van die nuwe wyn veroorsaak is. Jesus het dus ’n feit genoem wat algemene kennis in sy tyd was. Hy het gesê wat sou gebeur as iemand nuwe wyn in ou wynsakke sit: “Dan sal die nuwe wyn die wynsakke laat bars, en dit sal uitloop en die wynsakke sal bederf wees. Maar nuwe wyn moet in nuwe wynsakke gegooi word.”—Lukas 5:37, 38.

Wie was die “dolkstekers” waarvan daar gepraat word in verband met Paulus se inhegtenisneming deur die Romeine?

▪ Volgens die verslag in Handelinge het ’n Romeinse militêre bevelvoerder die apostel Paulus tydens ’n opskudding by die tempel in Jerusalem in hegtenis geneem omdat hy gedink het dat Paulus die leier van ’n oproerige groep van “vierduisend dolkstekers” was (Handelinge 21:30-38). Wat is bekend omtrent hierdie dolkstekers?

Die Griekse woord vir “dolkstekers” kom van die Latynse sicarii, wat “gebruikers van die sica”, of dolk, beteken. Die eerste-eeuse geskiedskrywer Flavius Josefus beskryf die Sikariërs as ’n groep fanatiese Joodse patriotte, onversetlike vyande van Rome, wat georganiseerde politieke moorde gepleeg het.

Josefus vertel dat die Sikariërs “mense helder oordag, en in die middel van die stad, doodgemaak het; hulle het dit hoofsaaklik gedurende die feeste gedoen, wanneer hulle tussen die skare beweeg het en dolke onder hulle kleed weggesteek het, waarmee hulle hulle vyande gesteek het”. Wanneer hulle slagoffers dood neergeval het, het die Sikariërs gemaak of hulle verontwaardig is oor die moord sodat niemand hulle daarvan sou verdink nie. Josefus voeg by dat die Sikariërs later ’n vername rol in die Joodse opstand teen Rome in 66-70 HJ gespeel het. Die Romeinse bevelvoerder sou dus gretig wees om die vermeende leier van so ’n groep in hegtenis te neem.

[Prent op bladsy 15]

’n Ou wynsak

[Prent op bladsy 15]

’n Kunstenaarsvoorstelling van ’n dolksteker