’n Moeilike vraag

DAAR is baie verskillende idees oor lewe en die dood. Party mense dink dat hulle ná hulle dood aanhou lewe, dalk in ’n ander vorm of op ’n ander plek. Sommige dink dat hulle weer gebore sal word as iemand of iets anders. En ander dink weer dat die dood die einde van alles is.

Wat jy oor hierdie onderwerp glo, hang dalk af van hoe jy grootgeword het of jou kultuur. Waar kan ons dan betroubare antwoorde op hierdie moeilike vraag kry, aangesien daar soveel verskillende idees oor die dood is?

Godsdiensleiers leer mense al honderde jare lank die leerstelling oor die onsterflikheid van die mensesiel. Volgelinge van amper al die groot godsdienste​—Christene, Hindoes, Jode, Moslems en ander—​glo dat die mens ’n onsterflike siel het. Hulle glo dat die siel in die geesteryk aanhou lewe nadat die liggaam doodgegaan het. Boeddhiste glo weer dat ’n persoon oor en oor gebore kan word en dat die lewenskrag, of verstandelike energie, binne-in ’n persoon dan uiteindelik ’n gelukkige toestand met die naam Nirwana bereik.

As gevolg van sulke leerstellings het die meeste mense regoor die wêreld begin glo dat die dood lei tot lewe in ’n ander wêreld. Daarom is die dood vir baie mense ’n belangrike stap in die kringloop van die lewe, en dit lyk vir hulle asof die dood deel is van God se wil. Maar wat sê die Bybel oor hierdie onderwerp? Lees asseblief die volgende artikel. Die antwoord sal jou dalk verbaas.