Gewone pionierdiens—’n Uitnodiging om groter geluk te smaak
1 Hoe reageer jy op ’n uitnodiging om aan iets deel te neem wat vreugde en verkwikking verskaf? Waarskynlik met waardering en gretigheid. Jesus het sy dissipels vriendelik uitgenooi om blywende geluk en verkwikking te geniet. Hy het gesê: “Neem my juk op julle en leer van My,... en julle sal verkwikking vind vir julle siele.” Daardie juk van Christendissipelskap beteken dat ons op ons beurt ander moet nooi om deel te hê in die verkondiging van die goeie nuus van die Koninkryk. Die gewone pionierdiens is ’n uitstekende manier om ’n groter aandeel te hê in hierdie werk, en in die geluk en die verkwikking wat dit verskaf.—Matt. 11: 28-30, NW; 28:19.
2 Sedert die 1979-diensjaar het die gemiddelde aantal gewone pioniers in Suid-Afrika met 191 persent gestyg! Die gemiddelde getal gewone pioniers het van 886 in 1979 tot 2 581 in die 1986-diensjaar gestyg. Aan die begin van die huidige diensjaar het 2 971 gewone pioniers gerapporteer, ’n vermeerdering van 9,9 persent vergeleke met die vorige hoogtepunt van 2 704 in April 1986. Wat is een boodskap wat hierdie groeiende menigte voltydse werkers oordra? Dit is dat ’n toenemende aantal Koninkryksverkondigers geluk en tevredenheid vind deur hulle kragtig in Jehovah se diens in te span. Hulle geesdrif het ander aangespoor om ernstig te oorweeg of hulle hul sake so kan reël dat hulle gewone pioniers kan word. Oorweeg jy hierdie moontlikheid biddend?
WIE KAN PIONIERS WEES?
3 ’n Jong broer wat in sy laaste jaar op hoërskool die gewone pionierdiens betree het, het berig: “Ek was nog nooit in my hele lewe so gelukkig nie.” Nadat sy in September vanjaar as ’n pionier begin dien het, het ’n moeder van twee jong kinders gesê: “Ek is nou gelukkiger as ooit.” Na die dood van haar man het ’n ander suster geskryf: ‘Ek spoor enigeen wat moontlik kan opreg aan om aan die pionierdiens deel te neem. Dit kan jou net nader aan Jehovah en jou gemeente bring.’ Hoe bly is hierdie mense tog dat hulle gereageer het op die uitnodiging om die gewone pionierdiens te betree!
4 Ons kan onsself maklik wysmaak dat ons nie pioniers kan wees nie. Maar met inspanning en gebed kan ons onderskei of ons omstandighede ons sal toelaat om gewone pioniers te word. Een suster wat nou met vreugde as ’n gewone pionier dien, het erken dat toe sy die redes waarom sy nie ’n gewone pioner is nie opgeweeg het teen die redes waarom sy een moet wees, dit duidelik geword het dat sy die pionierdiens moet betree. Sy het haar weifelagtigheid oorkom en toegelaat dat haar geloof en liefde vir Jehovah seëvier.—Kyk Prediker 11:4.
5 Staan jy op die punt om af te tree, of het jy alreeds afgetree? As jou gesondheid en omstandighede dit vir jou moontlik maak om die gewone pionierdiens te betree, kan jou lewe sinvoller en doelgerigter word. Dan is daar egpare wat nie nou die verantwoordelikheid het om vir kinders te sorg nie. Kan jy, as jy in hierdie situasie is, jou geluk vergroot deur die gewone pionierdiens te betree?
6 Diegene wat aan die pionierdiens deelneem voordat hulle ’n gesin het, het later die voordeel dat hulle uit ondervinding kan praat wanneer hulle hul kinders aanmoedig om die pionierdiens as ’n doel na te streef. Party het selfs pioniers gebly terwyl hulle ’n gesin grootmaak (Spr. 22:6). Talle gewone pioniers is getroude broers en susters, en baie van hulle het kinders. Hulle het nietemin hulle sake so gereël dat hulle pioniers kan wees. Watter positiewe, geestelike atmosfeer skep dit tog in die huis!
7 Ongetroude persone maak ’n groot persentasie van al die pioniers in Suid-Afrika uit. Baie van hulle het nie gesinsverantwoordelikhede nie en het gou besef watter gulde geleentheid hulle het om Jehovah se hart te verbly terwyl hulle self groter geluk smaak deur as gewone pioniers te dien.
8 Jy nader moontlik die einde van jou skoolopleiding. Wat gaan jy doen as jy die skool verlaat? Jesus het vermaan dat ons ons ‘oog reg moet hou’ deur nie toe te laat dat materiële dinge en fisiese geriewe die vernaamste dinge in ons lewe word nie. ’n Goeie atleet weet dat dit verstandig is om van enigiets ontslae te raak wat hom kan belas en kan verhinder dat hy ’n suksesvolle wedloop aflê. Jou kanse om Jehovah se guns te wen en die wêreld se strikke te vermy, sal eweneens aansienlik verbeter as jy besig bly in Jehovah se diens. Pionierdiens versterk jou toewyding en spoor jou aan om druk besig te bly met geestelike dinge. Moet jy dan nie, indien jou omstandighede dit toelaat, verplig voel om ’n gewone pionier te wees nie?—Matt. 6:22; 1 Kor. 15:58; 1 Tim. 6:7, 8.
9 As ons Jehovah se wil doen, sal ons nou en vir ewig geluk smaak. Jesus het dit baie duidelik gestel deur wat hy verkondig en gedoen het (Joh. 4:34; Hebr. 12:2). Ons lewe word waarlik bevredigend wanneer ons besig bly om ander te nooi om van ‘die water van die lewe te neem, verniet’. Kan jy jou geluk vergroot deur hierdie uitnodiging om ’n gewone pionier te word aan te neem?—Openb. 22:17; Spr. 11:25.