Bied die Goeie Nuus Aan—Deur kenmerke van die Redenering-boek te gebruik
1 The Watchtower van 1 Junie 1985 het beloof dat die “Handhawers van onkreukbaarheid”-Byeenkoms iets sou voorsien “wat blywende hulp sou verleen “om met ander uit die Skrif te redeneer”. Daardie belofte is op voortreflike wyse vervul met die uitreiking van die boek Redenering uit die Skrif. Het ons nou, na meer as ’n jaar, meer vertroud geraak met die boek se uitsonderlike kenmerke? Neem ons dit saam in die velddiens, gebruik ons dit by elke geleentheid en lei ons nuwelinge en minder ervare persone op om dit te gebruik?
2 Om hierdie uitstekende publikasie doeltreffender te gebruik, kan ons gerus ’n paar van die kenmerke van die boek hersien en kyk hoe dit gebruik kan word. Kyk asseblief na die gedeelte “Gebruiksaanwysings vir Redenering uit die Skrif” (bl. 7). Die eerste drie paragrawe bevat besielende informasie wat ons daaraan herinner om met mense te redeneer wat opregte vrae het of diegene wat gewillig is om na ’n ander standpunt te luister (Hand. 17:2, 3). Die res van die paragrawe sit stap vir stap uiteen hoe die boek ten beste benut kan word.
HANTERING VAN BESWARE
3 Gestel die huisbewoner sê byvoorbeeld die volgende: “Ek glo dat daar iets goeds in alle gelowe steek.” Pleks van ’n gedagte of ’n teks te gebruik wat jy al voorheen gebruik het, sal jy dikwels vind dat dit taktvoller en doeltreffender is om vir die huisbewoner te sê dat jy vir hom iets interessants oor die onderwerp wil wys. Haal die Redenering-boek. uit jou sak en slaan dit oop by die hoofopskrif “Godsdiens” op bladsy 171. Terwyl jy vlugtig na die vetgedrukte vrae kyk, sal jy die vraag op bladsy 172 sien: “Is dit waar dat daar iets goeds in alle gelowe steek?” Dit hou direk verband met die huisbewoner se opmerking. Jy kan party van die kommentare direk uit die boek lees.
4 Jy kon ook eers na die slotgedeelte van die onderwerp “Godsdiens” (bl. 179) geblaai het. Daar sal jy die waardevolle kenmerk “As iemand sê —” vind. Die kommentaar op bladsy 181, “Alle gelowe is goed; jy het joune en ek het myne”, hou direk verband met wat die huisbewoner gesê het. Dan kan jy gepaste gedagtes onder hierdie beswaar lees.
5 Die Redenering-boek kan jou ook help om gesprekke aan te knoop. Probeer om elke week voordat jy velddiens doen een of twee gedagtes uit die gedeelte “Inleidings vir gebruik in die veldbediening” (bl. 9) te hersien. Gebruik ’n paar van hierdie inleidings in die velddiens. Pas hulle aan by die ‘Onderwerp vir gesprekke’ en die gebied. Jy sal weldra vind dat jy aanpasbaarder en bekwamer is om gesprekke te begin.
6 Het jy al ooit ongemaklik gevoel wanneer ’n huisbewoner ’n teks gebruik en dit verkeerd toepas? Onthou, die Redenering-boek kan jou moontlik help met sy kenmerk op bladsy 445, “Tekste wat dikwels verkeerd toegepas word”. Daar vind ons bladsyverwysings vir insiggewende kommentaar oor 85 van die algemeenste tekste wat verkeerd toegepas word.
7 Wanneer ons Bybelstudente vrae vra, kan ons hulle help om die antwoorde met behulp van die Redenering-boek te vind. As ons ’n eksemplaar van die boek by elkeen laat, kan ons hulle help om toegerus te wees om talle van hulle eie vrae sowel as die van hulle vriende en familielede te beantwoord. Ons dank Jehovah vir hierdie pragtige skat wat so ’n ontsaglike impak op ons bedrywigheid in die veldbediening kan hê. Mag ons dit so goed moontlik benut om sy roemryke naam te loof.—Ps. 66:2, 8.