Vind baat by die Teokratiese Bedieningskool vir 1996—Deel 3
1 Die apostel Paulus wou hê dat sy broers ten behoewe van hom moes bid sodat hy die vermoë kon verkry om die goeie nuus met vrymoedigheid te spreek (Ef. 6:18-20). Ons wil ook graag daardie selfde vermoë aankweek. Daarom waardeer ons die hulp wat voorsien word deur die Teokratiese Bedieningskool, waarby vergaderingbywoners wat aan die vereistes voldoen, aangemoedig word om aan te sluit.
2 As studente ontvang ons persoonlike raad om ons te help om ons spraak- en onderrigvermoë te verbeter (Spr. 9:9). Ons kan ook baat vind deur te luister na die raad wat ander studente ontvang en deur dit wat ons leer op onsself toe te pas. Wanneer ons ’n toewysing voorberei, moet ons die bronnemateriaal sorgvuldig bestudeer om seker te maak dat ons verduideliking daarvan akkuraat is. Die hoofpunte en die tekste wat ons gebruik, moet inpas by die ontwikkeling van die algemene tema. As die toewysing ’n ander persoon insluit, moet dit geoefen word lank voordat dit in die skool aangebied word. Namate ons vordering maak, moet ons probeer om ex tempore te praat en eerder notas as ’n manuskrip te gebruik.
3 Almal wat ’n toewysing op die skool het, moet vroeg kom, hulle Spraakraadgewingstrokie vir die skoolopsiener gee en voor in die saal sit. Susters moet die skoolopsiener voor die tyd in kennis stel wat hulle agtergrond is en of hulle vir hulle deel gaan staan of sit. As ons op hierdie maniere saamwerk, dra dit daartoe by dat die program vlot verloop, en dit help diegene wat na die verhoog omsien om alles vooraf gereed te maak.
4 Voorbereiding vir Toespraak Nr. 2: Een doel van die Bybellesing is om die student te help om sy leesvermoë te verbeter. Hoe kan dit die beste gedoen word? Die beste manier om die materiaal onder die knie te kry, is om dit oor en oor hardop te lees. Om die betekenis en die regte uitspraak van enige onbekende woorde te leer, moet die student dit in ’n woordeboek opsoek. Dit sal moontlik ook vereis dat ’n mens vertroud moet raak met die betekenis van die uitspraaksimbole wat die woordeboek gebruik.
5 Die New World Translation in Engels help met die uitspraak van eiename en ongewone woorde wat in die Bybel gevind word. Dit doen dit deur hulle in lettergrepe te verdeel en aksenttekens te voorsien. (Sien “Die hele Skrif is deur God geïnspireer en is nuttig”, bladsye 325-6, paragrawe 27-8.) Gewoonlik kry die lettergreep voor die aksentteken die hoofklem. As die beklemtoonde lettergreep op ’n vokaal eindig, word dit as ’n lang vokaal uitgespreek. As ’n lettergreep op ’n konsonant eindig, is die vokaal in daardie lettergreep ’n kort vokaal. (Vergelyk Saʹlu met Salʹlu.) Party broers luister na die Genootskap se kassette ter voorbereiding vir hulle Bybelleestoewysings.
6 Ouers kan hulle jong kinders help om vir die leestoewysing voor te berei. Dit kan insluit dat hulle luister wanneer die kind oefen en hom dan nuttige wenke gee om te verbeter. Die spreektyd laat tyd toe vir ’n kort inleiding en ’n gepaste slot wat ’n toepassing van die hoofpunte gee. Sodoende ontwikkel die student sy vermoë om ex tempore te praat.
7 Die psalmis het biddend gevra: “Here, open my lippe, dat my mond u lof kan verkondig” (Ps. 51:17). Mag ons deelname aan die Teokratiese Bedieningskool ons help om hierdie selfde begeerte te bevredig.