Getuig waar daar ook al mense is
1 Die apostel Paulus het besef watter rol God se gees in sy bediening speel en gesê: “God het dit deurentyd laat groei.” Hy het ook erken: “Ons is God se medewerkers” (1 Kor. 3:5-9). Dit is ’n wonderlike voorreg. Hoe kan ons in die openbaar toon dat ons dit waardeer om medewerkers van God te wees? Deur die goeie nuus te verkondig aan almal wat ons in die huis-tot-huis-werk en elders ontmoet.
2 Ons is beveel om “dissipels van mense” te maak (Matt. 28:19). As ons met net ’n paar mense praat wanneer ons aan die bediening deelneem, kan ons gou moeg word en voel dat ons nie veel bereik het nie. Aan die ander kant geniet ons ons bediening die meeste wanneer ons baie mense vind om mee te gesels. Dit kan nogal ’n uitdaging bied, aangesien dit ’n mate van persoonlike inisiatief verg om te gaan na waar daar ook al mense is sodat ons met hulle kan gesels.
3 Praktiese voorbeelde: Ons kan vir mense getuig by markte, parke, rusplekke by vulstasies, stasies en taxistaanplekke. Is jy bereid om ’n getuienis te gee wanneer jy van openbare vervoer gebruik maak? Twee Getuies wat in ’n stampvol bus na hulle velddiensvergadering gery het, het oor die prent van die Paradys in die Kennis-boek gesels en God se beloftes vir die toekoms bespreek. Soos hulle gehoop het, het ’n jong man wat naby hulle gestaan het na hulle geluister en was hy beïndruk deur wat hy gehoor het. Voordat hy van die bus afgeklim het, het hy ’n boek geneem en gevra dat iemand hom tuis moet besoek.
4 Baie verkondigers het al die vreugde van informele getuieniswerk gesmaak. ’n Suster het een middag na ’n plaaslike winkelsentrum gegaan en mense genader wat klaar hulle inkopies gedoen het, maar wat nie juis haastig gelyk het nie. Sy het al die lektuur versprei wat sy in haar sak gehad het. ’n Man wat in sy motor gewag het, was bly om die tydskrifte by haar te neem. Hy het vantevore vergaderinge bygewoon, en hulle gesprek het weer sy belangstelling aangewakker.
5 Dit is ’n voorreg om Jehovah se naam te verheerlik. Deur ywer vir die predikingswerk te openbaar, toon ons dat ons nie die doel van God se onverdiende goedhartigheid teenoor ons gemis het nie. Aangesien dit nou “die besonder aanneemlike tyd” is om ander te help, laat ons gaan na waar daar ook al mense is en vir hulle van Jehovah se “dag van redding” getuig.—2 Kor. 6:1, 2.