Praat elke dag oor Jehovah
1 Mense geniet dit om te gesels oor wat hulle ook al na aan die hart lê, want uit die oorvloed van die hart praat die mond (Luk. 6:45b). Wat lê ons na aan die hart? Die psalmis het geskryf: “My tong sal u geregtigheid prys, u lof die hele dag deur” (Ps. 35:28). Hy het innige waardering vir Jehovah gehad en dit as ’n ware voorreg beskou om oor God te praat en hom by elke geleentheid te prys. Die psalmis het talle goeie dinge gehad om hom oor te verheug omdat hy intiem met Jehovah bekend was (Ps. 35:9). Hoe kan ons sy goeie voorbeeld navolg?
2 Praat in jou huis oor Jehovah: Gesinslede behoort daagliks oor Jehovah te praat. Ouers wat ’n groot liefde vir Jehovah het, sal in al hulle bedrywighede spontaan van hom praat (Deut. 6:5-7). Deur dit te doen, sal die kinders sien dat hulle vader en moeder in ooreenstemming met hulle geloof lewe en God se wet liefhet. Die kinders sal dan die gesinsbybelstudie as ’n opregte blyk van hulle ouers se godvrugtige toegewydheid beskou.—2 Pet. 3:11.
3 Praat met jou broers oor Jehovah: Gedurende ons weeklikse teokratiese roetine het ons baie geleenthede om ons verstand en hart met geestelike voedsel te voed. Daar is altyd goeie dinge om oor te gesels (Luk. 6:45a). Het jy ’n punt in jou persoonlike studie of weeklikse Bybellees teëgekom wat jy veral geniet het? Vertel jou broers daarvan, en help hulle sodoende om hulle liefde vir Jehovah te vergroot.—Ps. 35:18; Heb. 10:24.
4 Praat met ander oor Jehovah: In ons daaglikse omgang met mense—by die werk, by die skool en met ongelowige gesinslede—moet dit baie duidelik wees dat ons lewe daarop toegespits is om van Jehovah te getuig. Ons gesprekke moet eerder God verheerlik as wat ons dit met kru en growwe wêreldse uitdrukkings bederf. Praat daagliks, by elke geleentheid, met ander oor die goeie nuus wat hy ons beveel het om te verkondig.—Hand. 5:42; Kol. 4:6.
5 Mag ons, as ware aanbidders van Jehovah, daagliks geleenthede aangryp om oor ons weergalose God, Jehovah, te praat.—Ps. 106:47.