Getuig vir “alle soorte mense”
1 Wanneer ons mense van verskillende kulture of godsdiensagtergronde ontmoet, onthou ons dat dit Jehovah se wil is “dat alle soorte mense gered moet word en tot juiste kennis van die waarheid moet kom” (1 Tim. 2:4). Buiten ’n aantal spesiaal voorbereide traktate en brosjures het ons twee uitstekende publikasies wat te eniger tyd gebruik kan word om mense te help wie se godsdiensopvoeding hulle nie die waarheid oor God en Christus geleer het nie.
2 Die boek Die mensdom se soeke na God gee insig in die oorsprong van die wêreld se vernaamste godsdienste en kan dus oral mense help om hulle opvattings te vergelyk met wat die Bybel oor die enigste ware God leer. Aan die ander kant kan die boek Die grootste mens wat nog geleef het, wat die aandag op die lewe van Jesus Christus vestig, iemand help om beter vertroud te raak met die Seun van God en na hom toe getrek te word, soos dit met baie mense in die eerste eeu die geval was (Joh. 12:32). Wanneer dit ook al gepas is, kan jy hierdie boeke probeer aanbied deur die volgende wenke te gebruik.
3 As jy dink dat dit gepas sal wees om die “Grootste mens”-boek vir iemand aan te bied, kan jy vra:
◼ “Wat gaan deur jou gedagte wanneer jy aan Jesus Christus dink? [Wag vir ’n antwoord.] Baie geskiedkundiges erken dat Jesus die grootste mens is wat nog geleef het. [Haal ’n voorbeeld in die inleiding tot die Grootste mens-boek aan.] Die Bybel toon dat Jesus se lewe vir ons ’n voorbeeld is om na te volg.” Lees 1 Petrus 2:21 en die eerste paragraaf op die laaste bladsy van die inleiding tot die Grootste mens-boek. As die huisbewoner daarin belangstel om van Jesus te leer, kan jy die boek teen ’n bydrae van R15,00 aanbied. Lees Johannes 17:3 voordat jy gaan en vra: “Hoe kan ons hierdie kennis inneem wat tot die ewige lewe lei?” Tref definitiewe reëlings om terug te gaan met die antwoord.
4 Wanneer jy teruggaan om te verduidelik hoe ’n mens lewegewende kennis kan inneem, kan jy sê:
◼ “Ek het belowe om terug te kom om vir jou te wys hoe ons kennis kan inneem wat tot die ewige lewe lei.” Wys vir hom die Kennis-boek en gebruik die eerste hoofstuk om ’n studie te demonstreer.
5 As jy graag die boek “Die mensdom se soeke na God” wil aanbied, kan jy vra:
◼ “Met soveel verskillende godsdienste vandag, het jy al ooit gewonder hoe ons kan vasstel watter een deur God goedgekeur word?” Nadat die huisbewoner geantwoord het, kan jy die Mensdom se soeke-boek op bladsy 377 oopmaak. Verwys na punt nommer 7 en vra of die huisbewoner saamstem dat die ware godsdiens al die rasse van die mensdom moet verenig. Slaan een van die teksverwysings na en bespreek van die ander punte op die lys as die tyd dit toelaat. Bied die boek aan teen ’n bydrae van R7,50. Wanneer jy gaan, kan jy vra: “Hoe moet die ware godsdiens iemand se gedrag beïnvloed?” Tref reëlings vir ’n herbesoek om die vraag te beantwoord.
6 Wanneer jy teruggaan om te verduidelik hoe die ware godsdiens ’n mens se lewe beïnvloed, kan jy vra:
◼ “Hoe dink jy behoort godsdiens mense se gedrag te beïnvloed? [Wag vir ’n antwoord.] Christus het vir ons ’n standaard gegee waarvolgens godsdiens gemeet moet word.” Lees Matteus 7:17-20 direk van bladsy 12 in die boek Die mensdom se soeke na God. Nooi dan die huisbewoner om paragraaf 20 op bladsye 13-14 te lees. Bespreek paragrawe 25-9 op bladsye 16-18 as die tyd dit toelaat. Dit kan tot ’n studie in die Vereis-brosjure of die Kennis-boek lei.
7 Hoe om ’n gesprek aan te knoop: Daar is baie leermiddele in die boek Die mensdom se soeke na God wat gebruik kan word om gesprekke tydens die eerste besoek of herbesoek aan te knoop. Jy kan ’n gesprek begin deur eenvoudig ’n gepaste vraag te vra. Kyk byvoorbeeld na hierdie vrae en onderwerpe en ook die bladsye waar hulle bespreek word:
“Vrae wat beantwoord moet word”—bladsye 17-18.
“Was Jesus ’n mite?”—bladsy 237.
“Wie het die Bybel geskryf?”—bladsy 241.
“Die Qur’ān en die Bybel”—bladsy 285.
“Bewyse van die Bybel se egtheid”—bladsye 340-1.
“Wat Jehovah se Getuies glo”—bladsye 356-7.
“Hoe om die ware godsdiens te identifiseer”—bladsy 377.
8 Jy kan na die gekose bladsy(e) in die Mensdom se soeke-boek blaai en die punt onder bespreking verduidelik. Tref dan reëlings vir ’n herbesoek deur ’n verdere vraag te vra wat uit die Vereis-brosjure of die Kennis-boek beantwoord kan word. Maak seker dat jy die huisbewoner na die Openbare Vergadering nooi en ’n strooibiljet by hom laat.
9 Alle soorte mense wat opreg van hart is, is op soek na die waarheid oor God en Christus. Ons kan hulle in ons getuieniswerk help. Laat ons dus voortgaan om ‘hard te werk en ons in te span, omdat ons ons hoop gevestig het op ’n lewende God, wat ’n Redder is van alle soorte mense’.—1 Tim. 4:10.