Volhard met die predikingswerk!
1 Dit is God se wil dat “alle soorte mense gered moet word en tot juiste kennis van die waarheid moet kom” (1 Tim. 2:4). Daarom het hy ons die toewysing gegee om die goeie nuus te verkondig (Matt. 24:14). As ons verstaan waarom ons met die predikingswerk moet volhard, sal geen ontmoediging of potensiële afleiding waarvoor ons te staan kom ons terughou nie.
2 Waarom volhard? Daar is baie afleidings in die wêreld wat maak dat mense vergeet wat ons hulle vertel of dit nie ernstig opneem nie. Ons moet dus aanhou om hulle aan God se boodskap van redding te herinner (Matt. 24:38, 39). Daarbenewens verander omstandighede in mense se lewe voortdurend. Selfs wêreldtoestande kan oornag ingrypend verander (1 Kor. 7:31). Die mense vir wie ons getuig, kan môre, volgende week of volgende maand voor nuwe probleme of sorge te staan kom wat hulle ernstig sal laat nadink oor die goeie nuus wat ons hulle bring. Is jy nie dankbaar dat die Getuie wat vir jou die waarheid gebring het, volhard het nie?
3 Om God se barmhartigheid na te volg: Jehovah het geduldig tyd toegelaat voordat hy oordeel aan die goddelose gaan voltrek. Hy gebruik ons om regskapenes deurentyd aan te spoor om hulle tot hom te wend en gered te word (2 Pet. 3:9). Ons sal bloedskuldig wees as ons nie voortdurend God se barmhartige boodskap aan die mense verkondig en hulle waarsku oor die komende voltrekking van God se oordeel aan almal wat nie hulle slegte weë verander nie (Eseg. 33:1-11). Al word ons predikingswerk nie altyd goed ontvang nie, moet ons nooit ophou om alles in ons vermoë te doen om opregtes te help om God se groot barmhartigheid te waardeer nie.—Hand. 20:26, 27; Rom. 12:11.
4 Om ons liefde te openbaar: Dit is Jehovah God wat, deur Jesus Christus, beveel het dat die goeie nuus oor die ganse aarde verkondig moet word (Matt. 28:19, 20). Selfs wanneer mense weier om te luister, het ons die geleentheid om ons liefde en toegewydheid aan God te toon deur aan te hou om te doen wat reg is.—1 Joh. 5:3.
5 Mag ons vasbeslote wees om met die predikingswerk te volhard! Laat ons dit ywerig doen terwyl dit nog Jehovah se “dag van redding” is.—2 Kor. 6:2.