“’n Woord op sy tyd gespreek”
1 Vind jy dit moeilik om die boodskap van die lewe vir ander te vertel? Voel jy dat jy iets diepsinnigs moet sê om dié wat na jou luister te beïndruk? Toe Jesus sy dissipels uitgestuur het, het hy vir hulle gesê: “Terwyl julle gaan, preek en sê: ‘Die koninkryk van die hemele het naby gekom’” (Matt. 10:7). Die boodskap was eenvoudig en maklik om oor te dra. Dit is vandag nog net dieselfde.
2 Dikwels is net ’n paar woorde nodig om ’n gesprek te begin. Toe Filippus die Etiopiese eunug ontmoet het, het hy hom gevra: “Verstaan u werklik wat u lees?” (Hand. 8:30). “’n Woord op sy tyd gespreek” het werklik in hierdie geval tot ’n lonende gesprek gelei!—Spr. 25:11.
3 Jy kan ’n soortgelyke benadering in jou bediening gebruik. Hoe? Deur oplettend te wees en woorde te kies wat by die omstandighede pas. Vra ’n vraag en luister na die antwoord.
4 ’n Paar eenvoudige vrae: Jy kan enige van hierdie vrae gebruik om ’n gesprek aan te knoop:
◼ “Gebruik jy die Onse Vader in jou aanbidding?” (Matt. 6:9, 10). Haal ’n gedeelte daarvan aan en sê dan: “Sommige mense vra: ‘Wat is God se naam wat Jesus gesê het geheilig moet word?’ Ander vra: ‘Wat is die Koninkryk waarvoor Jesus gesê het ons moet bid?’ Het jy bevredigende antwoorde op hierdie vrae gekry?”
◼ “Het jy al ooit gewonder: ‘Wat is die doel van die lewe?’” Toon dat dit met ’n kennis van God verband hou.—Pred. 12:13; Joh. 17:3.
◼ “Dink jy dat die dood ooit weggeneem sal word?” Gebruik Jesaja 25:8 en Openbaring 21:4 om ’n betroubare antwoord te gee.
◼ “Is daar ’n eenvoudige oplossing vir al die probleme in die wêreld?” Toon dat God sê “jy moet jou naaste liefhê”.—Matt. 22:39.
◼ “Sal ’n kosmiese ramp eendag ons aarde vernietig?” Vertel van die Bybel se belofte dat die aarde vir ewig sal bestaan.—Ps. 104:5.
5 Wees vriendelik en bied die goeie nuus op ’n eenvoudige, direkte manier aan. Jehovah sal jou pogings seën om selfs “’n woord” van waarheid vir ander te vertel.