Leer ander die suiwer taal
1 Al kom Jehovah se Getuies uit baie ‘nasies, stamme, volke en tale’, is hulle ’n verenigde volk, ’n ware internasionale broederskap (Op. 7:9). In vandag se verdeelde wêreld is dit merkwaardig. Hoe is dit moontlik? Omdat ons ‘tot ’n suiwer taal oorgegaan het’.—Sef. 3:9.
2 Wonderlike gevolge: Wat is hierdie suiwer taal? Dit is die juiste begrip van die waarheid wat in God se Woord gevind word aangaande Jehovah en sy voornemens, veral die waarheid oor God se Koninkryk. Soos Jesus voorspel het, word hierdie waarheid versprei deur middel van ’n sigbare aardse kanaal, “die getroue en verstandige slaaf”, met die gevolg dat mense “uit al die tale van die nasies” ware aanbidding aanneem.—Matt. 24:45; Sag. 8:23.
3 Wanneer mense die suiwer taal leer, word hulle beweeg om hulle lewe in ooreenstemming met Jehovah se standaarde te bring. Hulle leer om “paslik verenig [te] wees in dieselfde denke en in dieselfde gedagtegang” (1 Kor. 1:10). Goddelike onderrigting lei ook daartoe dat hulle gedrag onberispelik is en dat hulle heilsame woorde van waarheid spreek, veral wanneer hulle die goeie nuus aan ander verkondig (Tit. 2:7, 8; Heb. 13:15). Hierdie wonderlike veranderinge strek Jehovah tot eer.
4 Byvoorbeeld, ’n man wat die goeie nuus gehoor het, het baie vrae gehad, wat almal uit die Bybel beantwoord is. Sy hart is geraak deur wat hy gehoor het en hy het twee keer per week begin studeer en die vergaderinge begin bywoon. Hy was verras toe hy hartlik by die Koninkryksaal verwelkom is, aangesien baie van die aanwesiges van ’n ander ras was. In ’n kort tydjie het hy en sy vrou veranderinge in hulle lewe aangebring en is hulle gedoop. Sedertdien het hy sowat 40 ander gehelp om Jehovah te dien, waaronder baie van sy familielede. Ten spyte van ’n fisiese gebrek het hy onlangs begin pionier.
5 Leer ander: Wêreldgebeure veroorsaak dat talle opregte mense hulle denke en lewe opnuut in oënskou neem. Soos Jesus moet ons die begeerte hê om hulle te help. Doeltreffende herbesoeke en Bybelstudies is ’n belangrike manier om opregte mense te help om die suiwer taal te leer.
6 ’n Benadering wat goed werk wanneer mense besig is, is om ’n kort Bybelstudie by hulle deur te hou (km-AF 5/02 bl. 1). Het jy dit al probeer? Wanneer jy voorberei om ’n herbesoek te doen, kan jy uit die byvoegsel tot Ons Koninkryksbediening vir Januarie 2002 ’n aanbieding kies wat by die huisbewoner byval sal vind. Baie van die aanbiedings in hierdie byvoegsel is so saamgestel dat ’n mens direk kan oorgaan na ’n bespreking uit die Vereis-brosjure of die Kennis-boek. Oefen die aanbieding sodat jy maklik van die inleiding na ’n bespreking van een van die paragrawe kan oorskakel. Kies een of twee tekste uit die paragraaf wat jy kan lees en bespreek, en berei ’n vraag voor waarmee jy kan afsluit. Dit sal help om die paragraaf in te lei wat jy met die volgende besoek wil bespreek.
7 Jehovah se volk geniet baie seëninge omdat hulle die suiwer taal geleer het. Mag ons ander ywerig help om saam met ons ‘die naam van Jehovah aan te roep’ en “hom skouer aan skouer te dien”.—Sef. 3:9.