Groter klem op die Bybel!
1. Hoofsaaklik vir wie is Die Wagtoring aanvanklik uitgegee, en vir wie is The Golden Age uitgegee?
1 Op 1 Oktober 1919 het die eerste nommer van die tydskrif The Golden Age verskyn. Dit was ’n baie nuttige hulpmiddel in die predikingswerk. Waarom? Omdat dit spesiaal vir die publiek bedoel was. Dit was nie die geval met Die Wagtoring nie, wat baie jare lank hoofsaaklik as ’n tydskrif vir die “klein kuddetjie” beskou is (Luk. 12:32). Koninkryksverkondigers het met soveel geesdrif op die nuwe tydskrif gereageer dat die verspreiding van The Golden Age baie jare lank aansienlik groter as dié van Die Wagtoring was.
2. Wat word The Golden Age vandag genoem, en wat was van die begin af die doel daarvan?
2 Die tydskrif The Golden Age is uitgegee om vir mense te wys dat Christus se Duisendjarige Heerskappy, wat werklik ’n goue eeu vir die mensdom sal inlui, die ware oplossing vir die mens se probleme is. In die daaropvolgende dekades is ’n aantal veranderinge aan The Golden Age aangebring om in die veranderende behoeftes van die tye te voorsien. In 1937 is die naam na Vertroosting verander. In 1946 het dit die Ontwaak! geword, soos ons dit vandag ken.
3. In die vervulling van watter profesie is die Ontwaak! ’n kragtige hulpmiddel?
3 Hierdie tydskrif het van die begin af ’n kragtige bydrae gelewer tot die groot getuienis wat sedert 1919 gegee is (Matt. 24:14). Maar weens die dringendheid van ons tye is dit klaarblyklik verstandig om verdere veranderinge aan die Ontwaak! aan te bring.
4. (a) Wat moet iemand doen om in “die dag van Jehovah se toorn” verberg te word? (b) Wat spoor die ‘engel wat in die middel van die hemel vlieg’, almal aan om te doen, volgens Openbaring 14:6, 7?
4 Miljoene mense geniet dit om die Ontwaak! te lees omdat dit ’n groot verskeidenheid niegodsdienstige onderwerpe op ’n interessante manier bespreek. Die meeste van die mense wat elke jaar die Gedenkmaal bywoon, lees ongetwyfeld gereeld die Ontwaak! Maar as iemand hoop om in “die dag van Jehovah se toorn” verberg te word, sal hy hulp nodig hê om meer te doen as om net ons publikasies gereeld te lees.—Sef. 2:3; Op. 14:6, 7.
5. (a) Waarop sal die Ontwaak! van Januarie 2006 af groter klem lê? (b) Wat sal baie lesers dalk beweeg word om te doen, en ter vervulling van watter profesie?
5 Gevolglik sal die Ontwaak! van Januarie 2006 af groter klem op God se Koninkryk lê. Dit sal lesers meer regstreeks aanspoor om hulle tot die Bybel te wend om oplossings vir hulle probleme te kry en sal groter klem lê op die Bybel se verduideliking van huidige gebeure. Sodoende sal lesers ’n beter begrip van huidige gebeure verkry en miskien deur wat hulle lees, beweeg word om meer van Jehovah te leer.—Sag. 8:23.
6, 7. (a) Hoe sal die Ontwaak! baie mense kan help om 1 Tessalonisense 2:13 toe te pas? (b) Hoe gereeld sal die Ontwaak! uitgegee word, en hoeveel tale sal deur die verandering geraak word?
6 Die Ontwaak! sal nog steeds onderwerpe van algemene belang bevat. Maar daar sal groter klem op die Bybel gelê word (1 Tess. 2:13). Aangesien Die Wagtoring diep Bybelse inligting bevat en die Ontwaak! se inhoud meer skriftuurlik sal wees, is dit klaarblyklik onnodig om voort te gaan om elke maand twee nommers van die Ontwaak! uit te gee. Die Ontwaak! sal dus van Januarie 2006 af as ’n maandelikse tydskrif verskyn. Dit sal die voorbereiding, vertaling en versending van ons lektuur baie vereenvoudig.
7 Hierdie verandering sal sowat 40 persent van die tale raak waarin die Ontwaak! uitgegee word. In die meeste tale is die Ontwaak! reeds ’n maandelikse of ’n kwartaallikse tydskrif. Daar sal geen verandering wees wat Die Wagtoring betref nie.
8. Hoe kan verkondigers die Ontwaak! saam met Die Wagtoring gebruik?
8 Verkondigers kan die Ontwaak! van elke maand saam met enigeen van die twee nommers van Die Wagtoring vir daardie maand aanbied. Diegene wat die Ontwaak! aanbied, sal die hele maand dieselfde nommer kan gebruik sonder dat hulle hulle aanbieding in die middel van die maand hoef te verander, soos nou die geval is.
9. Watter rol sal die Ontwaak! aanhou speel?
9 Sedert sy eerste nommer in 1919 het die tydskrif wat eers bekend gestaan het as The Golden Age, toe Consolation en nou Ontwaak!, ’n groot rol in die predikingswerk gespeel. Ons bid dat Jehovah sal aanhou om die verspreiding van hierdie tydskrif te seën en dat dit nog baie mense uit “alle nasies en stamme en volke en tale” sal help om hulle tot God se Koninkryk te wend as hulle enigste hoop.—Op. 7:9.